મહાભારત · અધ્યાય 3.172

તતો નિવાતકવચાઃ સર્વેવેગેન ભારત ।
અભ્યદ્રવન્માં સહિતાઃ પ્રગૃહીતાયુધા રણે ॥

આચ્છાદ્ય રથપન્થાનમુત્ક્રોશન્તો મહારથાઃ ।
અવૃત્ય સર્વતસ્તે માં શરવર્ષૈરવાકિરન્ ॥

તતોઽપરે મહાવીર્યાઃ શૂલપટ્ટસપાણયઃ ।
શૂલાનિ ચ ભુશુણ્ડીશ્ચ મુમુચુર્દાનવા મયિ ॥

સુમહત્તુમુલં વર્ષં ગદાશક્તિસમાકુલમ્ ।
અનિશં સૃજ્યમાનં તૈરપતન્મદ્રથોપરિ ॥

અન્યે મામભ્યધાવન્ત નિવાતકવચા સુધિ ।
શિતશસ્ત્રાયુધા રૌદ્રાઃ કાલરૂપાઃ પ્રહારિણઃ ॥

તાનહં વિવિધૈર્બાણૈર્વેગવદ્ભિરજિહ્મગૈઃ ।
ગાણ્ડીવમુક્તૈરભ્યઘ્નમેકૈકં દશભિર્મૃધે ॥

તે કૃતા વિમુખાઃ સર્વે મત્પ્રયુક્તૈઃ શિલાશિતૈઃ ।
તતો માતલિના તૂર્ણં હયાસ્તે સમ્પ્રયોદિતાઃ ॥

અથ માર્ગાન્બહૂસ્તત્ર વિચેરુર્વાતરંહસઃ ।
સુસંયતા માતલિના પ્રામથ્નન્ત દિતેઃસુતાન્ ॥

શતં શતાસ્તે હરયસ્તસ્મિન્યુક્તા મહારથે ।
તદા માતલિના યથ્તા વ્યચરન્નલ્પકા ઇવ ॥

તેષાં ચરણપાતેન રથનેમિસ્વનેન ચ ।
મમ બાણનિપાતૈશ્ચ હતાસ્તે શતશોઽસુરાઃ ॥

ગતાસવસ્તથૈવાન્યે દાનવાઃ પાણ્ડવર્ષભ ।
હતસારથયસ્તત્ર વ્યકૃષ્યન્ત તુરન્ગમૈઃ ॥

તે દિશો વિદિશઃ સર્વે પ્રતિરુધ્ય પ્રહારિણઃ ।
અભ્યઘ્નન્વિવિધૈઃ શસ્ત્રૈસ્તતો મે વ્યથિતં મનઃ ॥

તતોઽહં માતલેર્વીર્યમદ્ભુતં સમદર્શયમ્ ।
અશ્વાંસ્તથા વેગવતો યદયત્નાદધારયત્ ॥

તતોઽહં લઘુભિશ્ચિત્રૈરસ્ત્રૈસ્તાનસુરાન્રણે ।
ચિચ્છેદ સાયુધાન્રાજઞ્છતશોઽથ સહસ્રશઃ ॥

એવં મે ચરતસ્તત્ર સર્વયત્નેન શત્રુહન્ ।
પ્રીતિમાનભવદ્વીરો માતલિઃ શક્રસારથિઃ ॥

વધ્યમાનાસ્તતસ્તૈસ્તુ હયૈસ્તેન રથેન ચ ।
અગમન્પ્રક્ષયં કેચિન્ન્યવર્તન્ત તથાઽપરે ॥

સ્પર્ધમાના ઇવાસ્માભિર્નિવાતકવચા રણે ।
શરવર્ષૈઃ શરાર્તં માં મહદ્ભિઃ પ્રત્યવારયન્ ॥

શરવેગૈર્નિહત્યાહમસ્ત્રૈઃ શરવિઘાતિભિઃ ।
જ્વલદ્ભિઃ પરમૈઃ શીઘ્રૈસ્તાનવિધ્યં સહસ્રશઃ ॥

તતઃ સમ્પીડ્યમાનાસ્તે ક્રોધાવિષ્ટા મહાસુરાઃ ।
અપીડયન્માં સહિતાઃ શક્તિશૂલાસિવૃષ્ટિભિઃ ॥

તતોઽહમસ્ત્રં પ્રાયુઞ્જં ગાન્ધર્વં નામ ભારત ।
દયિતં દેવરાજસ્ માધવં નામ ભારત ॥

તતઃ ખઙ્ગાંસ્ત્રિશૂલાંશ્ચ તોમરાંશચ્ સહસ્રશઃ ।
અસ્ત્રવીર્યેણ શતધા તૈર્મુક્તાનહમચ્છિદમ્ ॥

છિત્ત્વા પ્રહરણાન્યેષાં તતસ્તાનપિ સર્વશઃ ।
પ્રત્યવિધ્યમહં રોષાદ્દશભિર્દશભિઃ શરૈઃ ॥

ગાણ્ડીવાદ્ધિ તદા સઙ્ખ્યે યથા ભ્રમરપઙ્ક્તયઃ ।
નિષ્પતન્તિ મહાબાણાસ્તન્માતલિરપૂજયત્ ॥

તેષામપિ તુ બાણાસ્તે બહુત્વાચ્છલભા ઇવ ।
અવાકિરન્માં બલવત્તાનહં વ્યધમં શરૈઃ ॥

વધ્યમાનાસ્તતસ્તે તુ નિવાતકવચાઃ પુનઃ ।
શરવર્ષૈર્મહદ્ભિર્માં સમન્તાત્પર્યવારયન્ ॥

શરવેગાન્નિહત્યાહમસ્ત્રૈરસ્ત્રવિઘાતિભિઃ ।
જ્વલદ્ભિઃ પરમૈઃ શીઘ્રૈસ્તાનવિધ્યં સહસ્રશઃ ॥

તેષાં છિન્નાનિ ગાત્રાણિ વિસૃજન્તિસ્મ શોણિતમ્ ।
પ્રાવૃષીવાભિવૃષ્ટાનિ શૃઙ્ગાણ્યથ ધરાભૃતામ્ ॥

ઇન્દ્રાશનિસમસ્પર્શૈર્વેગવદ્ભિરજિહ્મગૈઃ ।
મદ્વાણૈર્વધ્યમાનાસ્તે સમુદ્વિગ્રાઃ સ્મ દાનવાઃ ॥

શતધા ભિન્નદેહાસ્તે ક્ષીણપ્રહરણૌજસઃ । તતો નિવાતકવચા મામયુધ્યન્ત માયયા ॥