Mahabharata · Chapter 3.153

tataḥ saṃhṛtya vipulaṃ tadvapuḥ kāmavardhitam /
bhīmasenaṃ punardorbhyāṃ paryaṣvajata vānaraḥ //

pariṣvaktasya tasyāśu bhrātrā bhīmasya bhārata /
śramo nāśamupāgacchatsarvaṃ cāsītpradakṣiṇam //

[balaṃ cātibalo mene na me'sti sadṛśo mahān.] tataḥ punarathovāca paryaśrunayano hariḥ //

bhīmamābhāṣya sauhārdādbāṣpagadgadayā girā /
gaccha vīra svamāvāsaṃ smartavyo'smi kathāntare //

ihasthaśca kuruśreṣṭha na nivedyosmi kasyacit /
dhanadasyālayāccāpi visṛṣṭānāṃ mahābala //

eṣa kāla ihāyātuṃ devagandharvayoṣitām /
mamāpi saphalaṃ ca kṣuḥ smāritaścāsmi rāghavam //

[rāmābhidhānaṃ viṣṇuṃ hi jagaddhṛdayanandanam / sītāvakrāravindārkaṃ daśāsyadhvāntabhāskaram // ]

mānuṣaṃ gātrasaṃsparśaṃ gatvā bhīma tvayā saha /
tadasmaddarśanaṃ vīra kaunteyāmāghamastu te //

bhrātṛtvaṃ tvaṃ puraskṛtya varaṃ varaya bhārata /
yadi tāvanmayā kṣudrā gatvā vāraṇasāhvayam //

dhārtarāṣṭrā nihantavyā yāvadetatkaromyaham /
śilayā nagaraṃ vā tanmarditavyaṃ mayā yadi //

[baddhvā duryodhanaṃ cādya ānayāmi tavāntikam.] yāvadetatkaromyadyakāmaṃ tava mahābala //

bhīmasenastu tadvākyaṃ śrutvā tas mahātmanaḥ /
pratyuvāca hanūntaṃ prahṛṣṭenāntarātmanā //

kṛtameva tvayā sarvaṃ mama vānarapuṅgava /
svasti te'stu mahābāho kāmaye tvāṃ prasīdame //

sanāthāḥ pāṇḍavāḥ sarve tvayā nāthena vīryavan /
tavaiva tejasā sarvānvijeṣyāmo vayaṃ parān //

evamuktastu hanumānbhīmasenamabhāṣata /
bhrātṛtvātsauhṛdāccaiva kariṣyāmi priyaṃ tava //

camūṃ vigāhya śatrūṇāṃ paraśaktisamākulām /
yadā siṃharavaṃ vīra kariṣyasi mahābala //

tadāhaṃ bṛṃhayiṣyāmi svaraveṇa ravaṃ tava /
yaṃ śrutvaiva bhaviṣyanti vyasavaste'rayo raṇe //

vijayasya dhvajasthaśca nādānmokṣpāmi dāruṇān /
śatrūṇāṃ ye prāṇaharāḥ sukhaṃ yena haniṣyatha //

evamābhāṣya hanumāṃstadā pāṇḍavanandanam /
mārgamākhyāya bhīmāya tatraivāntaradhīyata //

gate tasminharivare bhīmopi balināṃvaraḥ /
tena mārgeṇa vipulaṃ vyacaradgandhamādanam //

anusmaranvapustasya śriyaṃ cāpratimāṃ bhuvi /
māhātmyamanubhāvaṃ ca smarandāśaratheryayau //

sa tāni ramaṇīyāni vanānyupavanāni ca /
vilolayāmāsa tadā saugandhikavanepsayā //

phullapadmavicitrāṇi sarāṃsi saritastathā /
nānākusumacitrāṇi puṣpitāni vanāni ca //

mattavāraṇayuthāni paṅkaklinnāni bhārata /
varṣatāmiva meghānāṃ vṛndāni dadṛśe tadā //

hariṇaiścapalāpāṅgairhariṇīsahitairvanam /
saśaṣpakavalaiḥ śrīmānpathi dṛṣṭvā drutaṃ yayau //

mahiṣaiśca varāhaiśca śārdūlaiśca niṣevitam /
vyapetabhīrgiriṃ śauryādbhīmaseno vyagāhata //

kusumānataśākhaiśca tāmrapallavakomalaiḥ /
yācyamāna ivāraṇye drumairmārutakampitaiḥ //

kṛtapadmāñjalipuṭā mattaṣaṭpadasevitāḥ /
priyatīrthavanā mārge padminīḥ samatikraman //

sajjamānamanodṛṣṭiḥ phulleṣu girisānuṣu /
draupadīvākyapātheyo bhīmo bhīmaparākramaḥ //

parivṛtte'hani tataḥ prakīrṇahariṇe vane /
kāñcanairvilaiḥ padmairdadarśa vipulāṃ nadīm //

haṃsakāraṇḍavayutāṃ cakravākopaśobhitām /
racitāmiva tasyādrerbhālāṃ vimalapaṅkajām //

tasyāṃ nadyāṃ mahāsatvaḥ saugandhikavanaṃ mahat /
apaśyatprītijananaṃ bālārkasadṛśadyuti //

taddṛṣṭvā labdhakāmaḥ sa manasā pāṇḍunandanaḥ / vanavāsaparikliṣṭāṃ jagāma manasā priyām //