Mahabharata · Chapter 3.150

hṛtadāraḥ saha bhrātrā patnīṃ mārgansa rāghavaḥ /
dṛṣṭavāñśailaśikhare sugrīvaṃ vānararṣabham //

tena tasyābhavatsakhyaṃ rāghavasya mahātmanaḥ /
sa hatvā vālinaṃ rājye sugrīvaṃ pratyapādayat //

sa rājyaṃ prāpya sugrīvaḥ sītāyāḥ parimārgaṇe /
vānarānpreṣayāmāsa śataśo'tha sahasraśaḥ //

tato vānarakoṭībhiḥ sahito'haṃ nararṣabha /
sītāṃ mārganmahābāho prasthito dakṣiṇāṃ diśam //

tataḥ pravṛttiḥ sītāyā gṛdhreṇa sumahātmanā /
sampātinā samākhyātā rāvaṇasya niveśane //

tato'haṃ kāryasiddhyarthaṃ rāmasyākliṣṭakarmaṇaḥ /
śatayojanavistāramarṇavaṃ sahasā plutaḥ //

ahaṃ svavīryāduttīrya sāgaraṃ makarālayam /
sutāṃ janakarājasya sītāṃ surarasutopamām //

dṛṣṭavānbharataśreṣṭha rāvaṇasya niveśane /
sametya tāmahaṃ devīṃ vaidehīṃ rāghavapriyām //

dagdhvā laṅkāmaśeṣeṇa sādṛprākāratoraṇām /
pratyāgataścāsya punarnāma tatraprakāśya vai //

madvākyaṃ cāvadhāryāśu rāmo rājīvalocanaḥ / abaddhapūrvamanyaiśca baddhvā setuṃ mahodadhau /
vṛto vānarakoṭībhiḥ samuttīrṇo mahārṇavam //

tato rarāmeṇa vīryeṇa hatvā tānsarvarākṣasān /
raṇe tu rākṣasagaṇaṃ rāvaṇaṃ lokarāvaṇam //

niśācarenadraṃ hatvā tu sabhrātṛsutabāndhavam /
rājye'bhiṣicya laṅkāyāṃ rākṣasendraṃ vibhīṣaṇam //

dhārmikaṃ bhaktimantaṃ ca bhaktānugatavatsalaḥ /
pratyāhṛtya tataḥ sītāṃ naṣṭāṃ vedaśrutiṃ yathā //

tayaiva sahitaḥ sādhvyā patnyā rāmo mahāyaśāḥ / gatvā tato'titvaritaḥ svāṃ purīṃ raghunandanaḥ /
adhyāvasattato'yodhyāmayodhyāṃ dviṣatāṃ prabhuḥ //

tataḥ pratiṣṭhito rājye rāmo nṛpatisattamaḥ /
varaṃ mayā yācito'sau rāmo rājīvalocanaḥ //

yāvadrāmakatheyaṃ te bhavellokeṣu śatruhan /
tāvajjīveyamityevaṃ tathā'stviti ca sobravīt //

sītāprasādācca sadā māmihasthamarindama /
upatiṣṭhanti divyā hi bhogā bhīma yathepsitāḥ //

daśavarṣasahasrāṇi daśavarṣaśatāni ca /
rājyaṃ kāritavānrāmastataḥ svabhavanaṃ gataḥ //

tadihāpsarasastāta gandharvāśca sadā'nagha /
tasya vīrasya caritaṃ gāyantyo ramayanti mām //

ayaṃ ca mārgo martyānāmagamyaḥ kurunandana /
tato'haṃ ruddhavānmārgaṃ tavemaṃ devasevitam //

tvāmanena pathā yāntaṃ yakṣo vā rākṣasopi vā /
dharṣayedvā śapedvā'pi mā kaściditi bhārata //

divyo devapatho hyeṣa nātra gacchanti mānuṣāḥ / yadarthamāgataścāsi ata eva saraśca tat //