Mahabharata · Chapter 3.143

bhīmasenayamau cobhau pāñcāli ca nibodhata /
nāsti bhūtasya nāśo vai paśyatāsmānvanecarān //

durbalāḥ kleśitāḥ smeti yadbruvāmetaretaram /
aśakye'pi vrajāmo yadnañjayadidṛkṣayā //

tanme dahati gātrāṇi tūlarāśimivānalaḥ /
yacca vīraṃ na paśyāmi dhanañjayamupāntike //

tasyādarśanataptaṃ māṃ sānujaṃ vanamāsthitam /
yājñasenyāḥ parāmarśaḥ sa ca vīra dahatyuta //

nakulātpūrvajaṃ pārthaṃ na paśyāmyamitaujasam /
ajeyamugradhanvānaṃ tena tapye vṛkodara //

tīrthāni caiva ramyāṇi vanāni ca sarāṃsi ca /
carāmi saha yuṣmābhistasya darśanakāṅkṣayā //

pañcavarṣāṇyahaṃ vīraṃ satyasandhaṃ dhanañjayam /
yanna paśyāmi bībhatsuṃ tena tapye vṛkodara //

taṃ vai śyāmaṃ guḍākeśaṃ siṃhavikrāntagāminam /
na paśyāmi mahābāhuṃ tena tapye vṛkodara //

kṛtāstraṃ nipuṇaṃ yudde'vratimānaṃ dhanuṣmatām /
na paśyāmi kuruśreṣṭha tena tapye vṛkodara //

carantamarisaṅgheṣu kruddhaṃ kālamivānagha /
prabhinnamiva mātaṅgaṃ siṃhaskandhaṃ dhanañjayam //

yaḥ sa śakrādanavaro vīryeṇa ca balena ca /
yamayoḥ pūrvajaḥ pārthaḥ śvetāśvo'mitavikramaḥ //

nārāyaṇasamo yuddhe satyasandho dṛḍhavrataḥ /
taṃ mamāpaśyato bhīma na śāntirhṛdayasya vai //

duḥkhena mahatā'viṣṭaścintayāmi divāniśam /
ajeyamugradhanvānaṃ tena tapye vṛkodara //

satataṃ yaḥ kṣamāśīlaḥ kṣipyamāṇo'pyaṇīyasā /
ṛjumārgaprapannasya śarmadātā bhayasya ca //

sa tu jihmapravṛttasya māyayā'bhijighāṃsataḥ /
api vajradharasyāpi bhavetkālaviṣopamaḥ //

śatrorapi prapannasya so'nṛśaṃsaḥ pratāpavān /
dātā'bhayas bībhatsuramitātmā mahāhalaḥ //

sarveṣāmāśrayo'smākaṃ raṇe'rīṇāṃ pramarditā /
āhartā sarvaratnānāṃ sarveṣāṃ naḥ sukhāvahaḥ //

ratnāni yasya vīryeṇa divyānyāsatpurā mama /
bahūni bahujātīni yāni prāptaḥ suyodhanaḥ //

yasya bāhubalādvīra sabhā cāsītpurā mama /
sarvaratnamayī khyātā triṣu lokeṣu pāṇḍava //

vāsudevasamaṃ vīrye kārtavīryasamaṃ yudhi /
ajeyamamitaṃ yuddhe taṃ na paśyāmi phalgunam //

sankarṣaṇaṃ mahāvīryaṃ tvāṃ ca bhīmāparājitam /
anuyātaḥ svavīryeṇa vāsudevaṃ ca śatruhā //

yas bāhubale tulyaḥ prabhāve ca purandaraḥ /
jave vāyurmukhe somaḥ krodhe mṛtyuḥ sanātanaḥ //

te vayaṃ taṃ naravyāghraṃ sarvevīra didṛkṣavaḥ /
pravekṣyāmo mahābāho parvataṃ gandhamādanam //

viśālā badarī yatranaranārāyaṇāśramaḥ /
taṃ sadā'dhyuṣitaṃ yakṣairdrakṣyāmo girisuttamam //

kuberanalinīṃ ramyāṃ rākṣasairabhisevitām /
padbhireva gamiṣyāmastapyabhānā mahattapaḥ //

nātaptatapasā śakyo gantuṃ deśo vṛkodara /
na nṛśaṃsena lubdhena nāpraśāntena bhārata //

tatra sarvegamiṣyāmo bhīmārjupadaiṣiṇaḥ /
sāyudhā baddhanistriṃśāḥ sārdhaṃ viprairmahāvrataiḥ //

makṣikādaṃśamaśakānsiṃhānvyāghrānsarīsṛpān /
prāpnotyaniyataḥ pārtha niyatastānna paśyati //

te vayaṃ niyatātmānaḥ parvataṃ gandhamādanam / pravekṣyāmo mitāhārā dhanañjayadidṛkṣavaḥ //