Mahabharata · Chapter 3.142

antarhitāni bhūtāni rakṣāṃsi balavanti ca /
agninā tapasā caiva śakyaṃ gantuṃ vṛkodara //

sannivartaya kaunteya kṣutpipāse balāśrayāt /
tato balaṃ ca dākṣyaṃ ca saṃśrayasva vṛkodara //

ṛṣestvayā śrutaṃ vākyaṃ kailāsaṃ parvataṃ prati /
buddhyā prapaśya kaunteya kathaṃ kṛṣṇā gamiṣyati //

athavā sahadevena dhaumyena ca samaṃ vibho /
sūtaiḥ paurogavaiścaiva sarvaiśca paricārakaiḥ //

rathairaśvaiśca ye cānye viprāḥ kleśāsahāḥ pathi /
sarvaistvaṃ sahito bhīma nivartasvāyatekṣaṇa //

trayo vayaṃ gamiṣyāmo ladhvāhārā yatavratāḥ /
ahaṃ ca nakulaścaiva lomaśaśca mahātapāḥ //

mamāgamanamākāṅkṣanggādvāre samāhitaḥ /
vaseha draupadīṃ rakṣanyāvadāgamanaṃ mama //
bhīma uvāca /

rājaputrī śrameṇārtā duḥkhārtā caiva bhārata /
vrajatyeva hi kalyāṇī śvetavāhadidṛkṣayā //

tavacāpyaratistīvrā vartate tamapaśyataḥ / guḍākeśaṃ mahātmānaṃ sangrāmeṣvapalāyinam /
kiṃ punaḥ sahadevaṃ ca māṃ ca kṛṣṇāṃ ca bhārata //

dvijāḥ kāmaṃ nivartantāṃ sarve ca paricārakāḥ /
sūtāḥ paurogavāścaiva yaṃ ca manyeta no bhavān //

na hyahaṃ hātumicchāmi bhavantamiha karhicit /
śaile'sminrākṣasākīrṇe durgeṣu vipameṣu ca //

iyaṃ cāpi mahābhāgā rājaputrī pativratā /
tvāmṛte puruṣavyāghra notsahedvinivartitum //

tathaivasahadevo'yaṃ satataṃ tvāmanuvrataḥ /
na jātu vinivarteta matajño hyahamasya vai //

apicātra mahārāja savyasācididṛkṣayā /
sarve lālasabhūtāḥ sma tasmādyāsyāmahe saha //

yadyaśakyo rathairgantuṃ śailo'yaṃ bahukandaraḥ /
padbhireva gamiṣyāmo mā rājanvimanā bhava //

ahaṃ vahiṣye pāñcālīṃ yatrayatra na śakṣyati /
iti me vartate buddhirmā rājanvimanā bhava //

sukumārau tathā vīrau mādrīnandikarāvubhau /
durge santārayiṣyāmi yatrāśaktau bhaviṣyataḥ //
yudhiṣṭhira uvāca /

evaṃ te bhāṣamāṇasya balaṃ bhīmābhivardhatām /
yattvamutsahase voḍhuṃ pāñcālīṃ vipule'dhvani //

yamajau cāpi bhadraṃ te naitadanyatra vidyate /
balaṃ tava yaśaścaivadharmaḥ kīrtiśca vardhatām //

yattvamutsahase netuṃ bhrātarau saha kṛṣṇayā /
mā te glānirmahābāho mā ca te'stu parābhavaḥ //
vaiśampāyana uvāca /

tataḥ kṛṣṇā'bravīdvākyaṃ prahasantī manoramā /
gamiṣyāmi na santāpa kāryo māṃ prati bhārata //
lomaśa uvāca /

tapasā śakyate gantuṃ parvato gandhamādanaḥ /
tapasā caiva kaunteya sarve yokṣyāmahe vayam //

nakulaḥ sahadevaśca bhīmasenaś pārthiva /
ahaṃ ca tvaṃ ca kaunteya drakṣyāmaḥ śvetavāhanam //
vaiśampāyana uvāca /

evaṃ sambhāṣamāṇāste subāhuviṣayaṃ mahat /
dadṛśurmuditā rājanprabhūtagajavājimat //

kirātataṅgaṇākīrṇaṃ pulindaśatasankulam / himavatyamarairjuṣṭaṃ bahvāścaryasamākulam /
subāhuścāpi tāndṛṣṭvā pūjayāpratyagṛhṇata //

viṣayānte kulindānāmīśvaraḥ prītipūrvakam /
tatra te pūjitāstena sarva eva sukhopitāḥ //

pratasthurvimale sūrye himavantaṃ giriṃ prati /
indrasenamukhāṃścāpi bhṛtyānpaurogavāṃstathā //

sūdāṃśca pāribarhāṃśca draupadyāḥ sarvaśo nṛpa /
rājñaḥ kulindādhipateḥ paridāya mahārathāḥ //

padbhireva mahāvīryā yayuḥ kauravanandanāḥ / te śanaiḥ prādravansarve kṛṣṇayā saha pāṇḍavāḥ /
tasmāddeśātsusaṃhṛṣṭā draṣṭukāmā dhanañjayam //