મહાભારત · અધ્યાય 3.142

અન્તર્હિતાનિ ભૂતાનિ રક્ષાંસિ બલવન્તિ ચ ।
અગ્નિના તપસા ચૈવ શક્યં ગન્તું વૃકોદર ॥

સન્નિવર્તય કૌન્તેય ક્ષુત્પિપાસે બલાશ્રયાત્ ।
તતો બલં ચ દાક્ષ્યં ચ સંશ્રયસ્વ વૃકોદર ॥

ઋષેસ્ત્વયા શ્રુતં વાક્યં કૈલાસં પર્વતં પ્રતિ ।
બુદ્ધ્યા પ્રપશ્ય કૌન્તેય કથં કૃષ્ણા ગમિષ્યતિ ॥

અથવા સહદેવેન ધૌમ્યેન ચ સમં વિભો ।
સૂતૈઃ પૌરોગવૈશ્ચૈવ સર્વૈશ્ચ પરિચારકૈઃ ॥

રથૈરશ્વૈશ્ચ યે ચાન્યે વિપ્રાઃ ક્લેશાસહાઃ પથિ ।
સર્વૈસ્ત્વં સહિતો ભીમ નિવર્તસ્વાયતેક્ષણ ॥

ત્રયો વયં ગમિષ્યામો લધ્વાહારા યતવ્રતાઃ ।
અહં ચ નકુલશ્ચૈવ લોમશશ્ચ મહાતપાઃ ॥

મમાગમનમાકાઙ્ક્ષન્ગ્ગાદ્વારે સમાહિતઃ ।
વસેહ દ્રૌપદીં રક્ષન્યાવદાગમનં મમ ॥
ભીમ ઉવાચ ।

રાજપુત્રી શ્રમેણાર્તા દુઃખાર્તા ચૈવ ભારત ।
વ્રજત્યેવ હિ કલ્યાણી શ્વેતવાહદિદૃક્ષયા ॥

તવચાપ્યરતિસ્તીવ્રા વર્તતે તમપશ્યતઃ । ગુડાકેશં મહાત્માનં સન્ગ્રામેષ્વપલાયિનમ્ ।
કિં પુનઃ સહદેવં ચ માં ચ કૃષ્ણાં ચ ભારત ॥

દ્વિજાઃ કામં નિવર્તન્તાં સર્વે ચ પરિચારકાઃ ।
સૂતાઃ પૌરોગવાશ્ચૈવ યં ચ મન્યેત નો ભવાન્ ॥

ન હ્યહં હાતુમિચ્છામિ ભવન્તમિહ કર્હિચિત્ ।
શૈલેઽસ્મિન્રાક્ષસાકીર્ણે દુર્ગેષુ વિપમેષુ ચ ॥

ઇયં ચાપિ મહાભાગા રાજપુત્રી પતિવ્રતા ।
ત્વામૃતે પુરુષવ્યાઘ્ર નોત્સહેદ્વિનિવર્તિતુમ્ ॥

તથૈવસહદેવોઽયં સતતં ત્વામનુવ્રતઃ ।
ન જાતુ વિનિવર્તેત મતજ્ઞો હ્યહમસ્ય વૈ ॥

અપિચાત્ર મહારાજ સવ્યસાચિદિદૃક્ષયા ।
સર્વે લાલસભૂતાઃ સ્મ તસ્માદ્યાસ્યામહે સહ ॥

યદ્યશક્યો રથૈર્ગન્તું શૈલોઽયં બહુકન્દરઃ ।
પદ્ભિરેવ ગમિષ્યામો મા રાજન્વિમના ભવ ॥

અહં વહિષ્યે પાઞ્ચાલીં યત્રયત્ર ન શક્ષ્યતિ ।
ઇતિ મે વર્તતે બુદ્ધિર્મા રાજન્વિમના ભવ ॥

સુકુમારૌ તથા વીરૌ માદ્રીનન્દિકરાવુભૌ ।
દુર્ગે સન્તારયિષ્યામિ યત્રાશક્તૌ ભવિષ્યતઃ ॥
યુધિષ્ઠિર ઉવાચ ।

એવં તે ભાષમાણસ્ય બલં ભીમાભિવર્ધતામ્ ।
યત્ત્વમુત્સહસે વોઢું પાઞ્ચાલીં વિપુલેઽધ્વનિ ॥

યમજૌ ચાપિ ભદ્રં તે નૈતદન્યત્ર વિદ્યતે ।
બલં તવ યશશ્ચૈવધર્મઃ કીર્તિશ્ચ વર્ધતામ્ ॥

યત્ત્વમુત્સહસે નેતું ભ્રાતરૌ સહ કૃષ્ણયા ।
મા તે ગ્લાનિર્મહાબાહો મા ચ તેઽસ્તુ પરાભવઃ ॥
વૈશમ્પાયન ઉવાચ ।

તતઃ કૃષ્ણાઽબ્રવીદ્વાક્યં પ્રહસન્તી મનોરમા ।
ગમિષ્યામિ ન સન્તાપ કાર્યો માં પ્રતિ ભારત ॥
લોમશ ઉવાચ ।

તપસા શક્યતે ગન્તું પર્વતો ગન્ધમાદનઃ ।
તપસા ચૈવ કૌન્તેય સર્વે યોક્ષ્યામહે વયમ્ ॥

નકુલઃ સહદેવશ્ચ ભીમસેનશ્ પાર્થિવ ।
અહં ચ ત્વં ચ કૌન્તેય દ્રક્ષ્યામઃ શ્વેતવાહનમ્ ॥
વૈશમ્પાયન ઉવાચ ।

એવં સમ્ભાષમાણાસ્તે સુબાહુવિષયં મહત્ ।
દદૃશુર્મુદિતા રાજન્પ્રભૂતગજવાજિમત્ ॥

કિરાતતઙ્ગણાકીર્ણં પુલિન્દશતસન્કુલમ્ । હિમવત્યમરૈર્જુષ્ટં બહ્વાશ્ચર્યસમાકુલમ્ ।
સુબાહુશ્ચાપિ તાન્દૃષ્ટ્વા પૂજયાપ્રત્યગૃહ્ણત ॥

વિષયાન્તે કુલિન્દાનામીશ્વરઃ પ્રીતિપૂર્વકમ્ ।
તત્ર તે પૂજિતાસ્તેન સર્વ એવ સુખોપિતાઃ ॥

પ્રતસ્થુર્વિમલે સૂર્યે હિમવન્તં ગિરિં પ્રતિ ।
ઇન્દ્રસેનમુખાંશ્ચાપિ ભૃત્યાન્પૌરોગવાંસ્તથા ॥

સૂદાંશ્ચ પારિબર્હાંશ્ચ દ્રૌપદ્યાઃ સર્વશો નૃપ ।
રાજ્ઞઃ કુલિન્દાધિપતેઃ પરિદાય મહારથાઃ ॥

પદ્ભિરેવ મહાવીર્યા યયુઃ કૌરવનન્દનાઃ । તે શનૈઃ પ્રાદ્રવન્સર્વે કૃષ્ણયા સહ પાણ્ડવાઃ ।
તસ્માદ્દેશાત્સુસંહૃષ્ટા દ્રષ્ટુકામા ધનઞ્જયમ્ ॥