Mahabharata · Chapter 3.138

caṅkramyamāṇaḥ sa tadā yavakrīrakutobhayaḥ /
jagāma mādhave māsi raibhyāśramapadaṃ prati //

sa dadarśāśrame ramye puṣpatadrumabhūṣite /
vicarantīṃ snuṣāṃ tasya kinnarīmiva bhārata //

yavakrīstāmuvācedamupatiṣṭhasva māmini /
nirlajjo lajjayā yuktāṃ kāmena hṛtacetanaḥ //

sā tasya śīlamājñāya tasmācchāpācca bibhyatī /
tejasvitāṃ ca raibhyas tathetyuktvā jagāma ha //

tata ekāntamānīya lajjayāmāsa bhārata /
ājagāma tadā raibhyaḥ svamāśramamarindama //

rudatīṃ ca snuṣāṃ dṛṣṭvā bhāryāmārtā parāvasoḥ /
sāntvayañślakṣṇayā vācā paryapṛcchadyudhiṣṭhira //

sā tasmai sarvamācaṣṭa yavakrībhāṣitaṃ śubhā /
pratyuktaṃ ca yavakrītaṃ prekṣāpūrvaṃ tathā'tmanā //

śṛṇvānasyaiva raibhyasya yavakrestadviceṣṭanam /
dahanniva tadā cetaḥ krodhaḥ samabhavanmahān //

sa tadā manyunā'viṣṭastapasvī kopano bhṛśam /
avalupya jaṭāmekāṃ juhāvāgnau susaṃskṛte //

tataḥ samabhavannārī tasyā rūpeṇa sammitā /
avalupyāparāṃ cāpi juhāvāgnau jaṭāṃ punaḥ //

tataḥ samabhavadrakṣo dīptāsyaṃ ghoradarśanam /
abrūtāṃ tau tadā raibhyaṃ kiṃ kāryaṃ karavāmahe //

tāvabravīdṛṣiḥ kruddho yavakrīrvadhyatāmiti /
jagmatṛstau tathetyuktvā yavakrītajighāṃsayā //

tatastaṃ samupāsthāya kṛtyā sṛṣṭā mahātmanā /
kamaṇḍaluṃ jahārāsya mohayitvā tu bhārata //

ucchiṣṭaṃ tu yavakrītamapakṛṣṭakamaṇḍalum /
tata udyataśūlaḥ sa rākṣasaḥ samupādravat //

tamādravantaṃ samprekṣya śūlahastaṃ jighāṃsayā /
yavakrīḥ sahasotthāya prādravadyatravai saraḥ //

jalahīnaṃ saro dṛṣṭvā yavakrīstvaritaḥ punaḥ /
jagāma saritaḥ sarvāstāścāpyāsanviśoṣitāḥ //

sa kālyamāno ghoreṇa śūlahastena rakṣasā /
agnihotre piturbhītaḥ sahasā praviveśa ha //

sa vai praviśamānastu śudreṇāndhena rakṣiṇā /
nigṛhīto balāddvāri so'vātiṣṭhata pārthiva //

nigṛhītaṃ tu śūdreṇa yavakrītaṃ sa rākṣasaḥ /
tāḍayāmāsa śūlena sa bhinnahṛdayo'patat //

yavakrītaṃ sa hatvā tu rākṣaso raibhyamāgamat / anujñātastu raibhyeṇa tayā nāryā sahāvasat //