મહાભારત · અધ્યાય 3.138

ચઙ્ક્રમ્યમાણઃ સ તદા યવક્રીરકુતોભયઃ ।
જગામ માધવે માસિ રૈભ્યાશ્રમપદં પ્રતિ ॥

સ દદર્શાશ્રમે રમ્યે પુષ્પતદ્રુમભૂષિતે ।
વિચરન્તીં સ્નુષાં તસ્ય કિન્નરીમિવ ભારત ॥

યવક્રીસ્તામુવાચેદમુપતિષ્ઠસ્વ મામિનિ ।
નિર્લજ્જો લજ્જયા યુક્તાં કામેન હૃતચેતનઃ ॥

સા તસ્ય શીલમાજ્ઞાય તસ્માચ્છાપાચ્ચ બિભ્યતી ।
તેજસ્વિતાં ચ રૈભ્યસ્ તથેત્યુક્ત્વા જગામ હ ॥

તત એકાન્તમાનીય લજ્જયામાસ ભારત ।
આજગામ તદા રૈભ્યઃ સ્વમાશ્રમમરિન્દમ ॥

રુદતીં ચ સ્નુષાં દૃષ્ટ્વા ભાર્યામાર્તા પરાવસોઃ ।
સાન્ત્વયઞ્શ્લક્ષ્ણયા વાચા પર્યપૃચ્છદ્યુધિષ્ઠિર ॥

સા તસ્મૈ સર્વમાચષ્ટ યવક્રીભાષિતં શુભા ।
પ્રત્યુક્તં ચ યવક્રીતં પ્રેક્ષાપૂર્વં તથાઽત્મના ॥

શૃણ્વાનસ્યૈવ રૈભ્યસ્ય યવક્રેસ્તદ્વિચેષ્ટનમ્ ।
દહન્નિવ તદા ચેતઃ ક્રોધઃ સમભવન્મહાન્ ॥

સ તદા મન્યુનાઽવિષ્ટસ્તપસ્વી કોપનો ભૃશમ્ ।
અવલુપ્ય જટામેકાં જુહાવાગ્નૌ સુસંસ્કૃતે ॥

તતઃ સમભવન્નારી તસ્યા રૂપેણ સમ્મિતા ।
અવલુપ્યાપરાં ચાપિ જુહાવાગ્નૌ જટાં પુનઃ ॥

તતઃ સમભવદ્રક્ષો દીપ્તાસ્યં ઘોરદર્શનમ્ ।
અબ્રૂતાં તૌ તદા રૈભ્યં કિં કાર્યં કરવામહે ॥

તાવબ્રવીદૃષિઃ ક્રુદ્ધો યવક્રીર્વધ્યતામિતિ ।
જગ્મતૃસ્તૌ તથેત્યુક્ત્વા યવક્રીતજિઘાંસયા ॥

તતસ્તં સમુપાસ્થાય કૃત્યા સૃષ્ટા મહાત્મના ।
કમણ્ડલું જહારાસ્ય મોહયિત્વા તુ ભારત ॥

ઉચ્છિષ્ટં તુ યવક્રીતમપકૃષ્ટકમણ્ડલુમ્ ।
તત ઉદ્યતશૂલઃ સ રાક્ષસઃ સમુપાદ્રવત્ ॥

તમાદ્રવન્તં સમ્પ્રેક્ષ્ય શૂલહસ્તં જિઘાંસયા ।
યવક્રીઃ સહસોત્થાય પ્રાદ્રવદ્યત્રવૈ સરઃ ॥

જલહીનં સરો દૃષ્ટ્વા યવક્રીસ્ત્વરિતઃ પુનઃ ।
જગામ સરિતઃ સર્વાસ્તાશ્ચાપ્યાસન્વિશોષિતાઃ ॥

સ કાલ્યમાનો ઘોરેણ શૂલહસ્તેન રક્ષસા ।
અગ્નિહોત્રે પિતુર્ભીતઃ સહસા પ્રવિવેશ હ ॥

સ વૈ પ્રવિશમાનસ્તુ શુદ્રેણાન્ધેન રક્ષિણા ।
નિગૃહીતો બલાદ્દ્વારિ સોઽવાતિષ્ઠત પાર્થિવ ॥

નિગૃહીતં તુ શૂદ્રેણ યવક્રીતં સ રાક્ષસઃ ।
તાડયામાસ શૂલેન સ ભિન્નહૃદયોઽપતત્ ॥

યવક્રીતં સ હત્વા તુ રાક્ષસો રૈભ્યમાગમત્ । અનુજ્ઞાતસ્તુ રૈભ્યેણ તયા નાર્યા સહાવસત્ ॥