Mahabharata · Chapter 3.132
iha martyāstanūstyaktvā svargaṃ gacchanti bhārata /
martukāmā narā rājannihāyānti sahasraśaḥ //
evamāśīḥ prayuktā hi dakṣeṇa yajatā purā /
iha ye vai mariṣyanti te vai svargajito narāḥ //
eṣā sarasvatī ramyā divyā caughavatī nadī /
etadvinaśanaṃ nāma sarasvatyā viśāmpate //
dvāraṃ niṣādarāṣṭrasya yeṣāṃ doṣātsarasvatī /
praviṣṭā pṛthivīṃ vīra mā niṣādā hi māṃ viduḥ //
eṣa vai camasodbhedo yatra dṛśyā sarasvatī /
yatraināmabhyavartanta divyāḥ puṇyāḥ samudragāḥ //
etatsindhormahattīrthaṃ yatrāgastyamarindama /
lopāmudrā samāgamya bhartāramavṛṇīta vai //
etatprakāśate tīrthaṃ prabhāsaṃ bhāskaradyute /
indrasya dayitaṃ puṇyaṃ pavitraṃ pāpanāśanam //
etadviṣṇupadaṃ nāma dṛśyate tīrthamuttamam /
eṣāṃ ramyā vipāśā ca nadī paramapāvanī //
atra vai putraśokena vasiṣṭho bhagavānṛṣiḥ /
baddhvā'tmānaṃ nipatito vipāśaḥ punarutthitaḥ //
kāśmīramaṇḍalaṃ caitatsarvapuṇyamarindama /
maharṣibhiścādhyuṣitaṃ paśyedaṃ bhrātṛbhiḥ saha //
yatrauttarāṇāṃ sarveṣāmṛṣīṇāṃ nāhuṣasya ca /
agneścaivātra saṃvādaḥ kāśyapaśya ca bhārata //
etaddvāraṃ mahārāja mānasasya prakāśate /
varṣamasya girermadhye rāmeṇa śrīmatā kṛtam //
eṣa vātikaṣaṇḍo vai prakhyātaḥ satyavikramaḥ /
nātyavartata yaddvāraṃ videhāduttaraṃ ca yaḥ //
idamāścaryamaparaṃ deśe'sminpuruṣarṣabha / kṣīṇe yuge tu kaunteya śarvasya saha pārṣadaiḥ /
sahomayā ca bhavati darśanaṃ kāmarūpiṇaḥ //
asminsarasi satrairvai caitre māsi pinākinam /
yajante yājakāḥ samyak parivāraṃ śubhārthinaḥ //
atropaspṛśya sarasi śraddadhāno jitendriyaḥ /
kṣīṇapāpaḥ śubhām̐llokānprāpnute nātra saṃśayaḥ //
eṣa ujjānako nāma pāvakiryatra śāntavān /
arundhatīsahāyaśca vasiṣṭho bhagavānṛṣiḥ //
hradaśca kuśavāneṣa yatra padmaṃ kuśeśayam /
āśramaścaiva rukmiṇyā yatrāśāmyadakopanā //
samādhīnāṃ samāsastu pāṇḍaveya śrutastvayā /
taṃ drakṣyasi mahārāja bhṛgutundaṃ mahāgirim //
vitastāṃ paśya rājendra sarvapāpapramocanīm /
maharṣibhiścādhyuṣitāṃ śītatoyāṃ sunirmalām //
jalāṃ copajalāṃ caiva yamunāmabhito nadīm /
uśīnaro vai yatreṣṭvā vāsavādatyaricyata //
tāṃ devasamitiṃ tasya vāsavaśca viśāmpate /
abhyāgacchannṛpavaraṃ jñātumagniśca bhārata //
jijñāsamānau varadau mahātmānamuśīnaram /
indraḥ śyenaḥ kapoto'gnirbhūtvā yajñe'bhijagmatuḥ //
uruṃ rājñaḥ samāsādya kapotaḥ śyenajādbhayāt / śaraṇārthī tadā rājannililye bhayapīḍitaḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0