Mahabharata · Chapter 3.131

asminkila svayaṃ rājanniṣṭavānvai prajāpatiḥ /
satramiṣṭīkṛtaṃ nāma purā varṣasahasrikam //

ambarīṣaśca nābhāga iṣṭavānyamunāmanu /
yatreṣṭvā daśapadmāni sadasyebhyo'bhisṛṣṭavān //

yajñaiśca tapasā caiva parāṃ siddhimavāpa saḥ /
deśaśca nāhuṣasyāyaṃ ẏajvanaḥ puṇyakarmaṇaḥ //

sārvabhaumasya kaunteya yayāteramitaujasaḥ /
spardhamānasya śakreṇa tasyedaṃ yajñavāstviha //

paśya nānāvidhākārairagnibhirnicitāṃ mahīm /
majjantīmiva cākrāntāṃ yayāteryajñakarmabhiḥ //

eṣā śamyekapatrā sā śakaṭaṃ caitaduttamam /
paśya rāmahradānetānpaśya nārāyaṇāśramam //

etaccarcīkaputrasya yogairvicarato mahīm /
prasarpaṇaṃ mahīpāla raupyāyāmamitaujasaḥ //

atrānuvaṃśaṃ paṭhataḥ śṛṇu me kurunandana /
ulūkhalairābharaṇaiḥ piśacī yadabhāṣata //

yugandhare dadhi prāśya uṣitvā cācyutasthale /
tadvadbhūtalaye snātvā saputrā vastumarhasi //

ekarātramuvitveha dvitīyaṃ yadi vatsyasi /
etadvai te gadevāvṛttaṃ rātrau vṛttamito'nyathā //

adya cātra nivatsyāmaḥ kṣapāṃ bharatasattama /
dvārametattu kaunteya kurukṣetrasya bhārata //

atraiva nāhuṣo rājā rājankratubhiriṣṭavān /
yayātirbahuratnaurgharyatrendro mudamabhyagāt //

etatplakṣāvataraṇaṃ yamunātīrthamuttamam /
etadvai nākapṛṣṭhasya dvāramāhurmanīṣiṇaḥ //

atrasārasvatairyajñairījānāḥ paramarṣayaḥ /
yūpolūkhalikāstāta gacchantyavabhṛthaplavam //

atravai bharato rājā rājankratubhiriṣṭavān /
hayamedhena yajñena medhyamaśvamavāsṛjat //

asakṛtkṛṣṇasāraṅgaṃ dharmeṇāpya ca medinīm / atraiva puruṣavyāghra maruttaḥ satramuttamam /
prāpa caivarṣimukhyena saṃvartenābhipālitaḥ //

atropaspṛśya rājendra sarvāllom̐kānprapaśyati /
pūyate duṣkṛtāccaiva atrāpi samupaspṛśa //
vaiśampāyana uvāca /

tatra sabhrātṛkaḥ snātvā stūyamāno maharṣibhiḥ /
lomaśaṃ pāṇḍavaśreṣṭha idaṃ vacanamabravīt //

sarvām̐llokānprapaśyāmi tapasā satyavikrama /
ihastaḥ pāṇḍavaśreṣṭhaṃ paśyāmi śvetavāhanam //
lomaśa uvāca /

evametanmahābāho paśyanti paramarṣayaḥ /
iha snātvā tapoyuktāṃstrīllom̐kānsacarācarān //

sarasvatīmimāṃ puṇyāṃ puṇyaikaśaraṇāvṛtām /
yatra snātvā naraśreṣṭha dhūtapāpmā bhaviṣyasi //

iha sārasvatairyajñairiṣṭavantaḥ surarṣayaḥ /
ṛṣayaścaiva kaunteya tathā rājarṣayopi ca //

vedī prajāpatereṣā samantātpañcayojanā / kurorvai yajñaśīlasya kṣetrametanmahātmanaḥ //