Mahabharata · Chapter 3.130

somakasyāśrame puṇye dharmarājo yudhiṣṭhiraḥ / ṣaḍrātramuṣya niyato bhrātrādibhirarindamaḥ /
tasmānnirgamya sahasā diśaṃ prāyāttathottarām //

bahudūraṃ tato gatvā vanaṃ tatra manoharam /
bahupaṣpaphalākīrṇaṃ mahānadyupaśobhitam //

dṛṣṭvā papraccha rājā'sau lomaśaṃ munisattamam /
kimidaṃ dṛśyate ramyaṃ vanaṃ bahumṛgadvijam //

bahupuṣpaphalopetaṃ munisaṅghairniṣevitam /
sravantyā ca samāyuktaṃ mahatyā puṇyatoyayā //

ṛṣīṇāmāśramāḥ puṇyā dṛśyante vividhā mune / kasyāyamāśramaḥ puṇyaḥ kasyeme munayo'malāḥ /
etadicchāmyahaṃ śrotuṃ vada tvaṃ vadatāṃvara //
lomaśa uvāca /

śṛṇu rājenad्ra bhadraṃ te vanasyāsya purātanam /
vṛttāntaṃ nikhilenādya procyamānaṃ mayā'nagha //

mṛkaṇḍuputro medhāvī mārkaṇḍeyo mahāmuniḥ /
bāla eva mahābuddhiḥ sarvavidyāviśāradaḥ //

mātāpitroḥ priyaṃ kurvaṃstaporthaṃ vanamāviśat /
atrāśramapadaṃ kṛtvā tapastepe sudāruṇam //

grīṣme pañcatapā bhūtvā varṣāsvākāśasaṃśrayaḥ /
jalasthaḥ śiśire yogī bahukālamavartata //

ūrdhvabāhurnirālambaḥ pādāṅguṣṭhāgraviṣṭhitaḥ / jitendriyo jitaprāṇaścintayandṛḍhamavyayam /
anāhāro jitakrodhaściramevamavartata //

etasminnantare rājannanāvṛṣṭiḥ sudāruṇā /
sambhūtā sarvasaṃhartrī tayā dagdhaṃ carācaram //

anāvṛṣṭyāṃ pravṛttāyāṃ sarve ca nidhanaṃ gatāḥ /
kecidanye mahātmāno munayo dvijapuṅgavāḥ //

brāhmaṇāḥ kṣatriyā vaiśyāḥ śūdrā sarvāśca yoṣitaḥ / paśupakṣimṛgāḥ sarve kṣutpipāsāsamākulāḥ /
kṛśāḥ śuṣkoṣṭhakaṇṭhāśca śrāntā bhrāntā vicetasaḥ //

kenacitpuṇyaśeṣeṇa mārkaṇḍeyasya dhīmataḥ /
āśramaṃ śanakaiḥ prāptā mūrcchitāḥ sahasā'patan //

samādhivirato yogī mārkaṇḍeyo mahātapāḥ /
tadvanaṃ nibiḍaṃ dṛṣṭvā janaiḥ kṣuttṛṭsamākalaiḥ //

dayārdrahṛdayo yogī śivaṃ dhyātvā hṛdambuje / teṣāṃ saṃrakṣaṇārthāya vedagandhisvareṇa saḥ /
ājuhāva tadā gaṅgāṃ tapoyogena bhārata //

gaṅgā samāgatā śīghraṃ tenāhūtā'tipāvanā /
nāmnā vedanadītyeva prakhyātā lokapāvanā //

parjanyaśca samāhūtaḥ sukhaṃ varṣati bhārata / sasyāni ca samṛddhāni phalamūlānyanekaśaḥ /
sambhūtānyatrarājenadra sarve te rakṣitā janāḥ //

mārkaṇḍeyaṃ praśaṃsanto janāḥ sarve dvijāttayaḥ /
ciraṃ sukhamavartanta tena saṃrakṣitā nṛpa //

evaṃ vidhāya rakṣāṃ sa sarveṣāṃ puṇyakarmaṇām /
punaścacāra ca tapaḥ parameśvaratuṣṭaye //

evaṃ bahutithe kāle prādurāsīnmaheśvaraḥ //

dṛṣṭvā ca sarvadeveśaṃ candramaulimumāpatim /
brahmaviṣṇvādibhirdevaiḥ siddhavidyādharoragaiḥ //

gandharvayakṣapravaraiḥ sakinnarapatatribhiḥ / stūyamānaṃ mahādevamavyayaṃ niṣkalaṃ śivam /
praṇanāma munirbhaktyā sāṣṭāṅgaṃ ca punaḥ punaḥ //

praṇamyotthāya sahasā baddhāñjalipuṭo muniḥ /
tuṣṭāva vividhaiḥ stotrairmahādevaṃ jagatpatim //

tamuvāca mahādevo mārkaṇḍeyaṃ mahāmunim /
varaṃ varaya bhadraṃ te varadosmi mune tava //

evaṃ sambodhitastena śivena paramātmanā /
sagadgadamidaṃ vākyamuvāca parameśvaram //

nānyaṃ varaṃ vṛṇe śambho ---tvatpādapaṅkaje /
bhaktiṃhyananyasulabhāṃ sva vyabhicāriṇīm //

evamukto'tha muninā bharatagīśvareśvaraḥ /
punarevābravīdvākyaṃ mārkaṇḍeya mahāmunim //

samyagārādhitaḥ pitrā tava putrārthamādarāt //

śatāyurnirguṇaḥ putraḥ śubhaḥ ṣoḍaśavārṣikaḥ /
ubhayoranyamiccha tvamityuktaḥ so'bravīcca mām //

nirguṇo māstu deveśa śatāyuḥ ṣoḍaśābdakaḥ /
suguṇo'stu suto me'dya iti pitrāvṛta purā //

tvayā taptena tapasā toṣito'haṃ bhṛśaṃ mune /
dīrghamāyurmayā dattaṃ mṛtyuśca pratiṣedhitaḥ //

ityuktvā bhagavānīśastatraivāntaradhīyata /
tasyāyamāśramaḥ puṇyastasyeme munayo'malāḥ //

atraikarātramuṣitāḥ sarve mṛtyuṃ taranti vai / atraiva bharataśreṣṭha prayato vasa bhūmipa //