Mahabharata · Chapter 3.126

taṃ dṛṣṭvā ghoravadanaṃ madaṃ devaḥ śatakratuḥ /
āyāntaṃ bhakṣayiṣyantaṃ vyāttānanamivāntakam //

bhayātsaṃstambhitabhujaḥ sṛkviṇī lelihanmuhuḥ /
tato'vravīddevarājaścyavanaṃ bhayapīḍitaḥ //

somārhāvaśvināvetāvadya prabhṛti bhārgava /
bhaviṣyataḥ satyametadvaco vipra prasīda me //

na te mithyā samārambho bhavatveṣa paro vidhiḥ /
jānāmi cāhaṃ viprarṣe na mithyā tvaṃ kariṣyasi //

somapāvaśvināvetau yathā vādya kṛtau tvayā /
tathaiva māmapi brahmañśreyasā yoktumarhasi //

bhūya eva tu te vīryaṃ prakāśediti bhārgava /
sukanyāyāḥ pituścāsya loke kīrtiḥ prathediti //

ato mayaitadvihitaṃ tava vīryaprakāśanam /
tasmānprasādaṃ kuru me bhavatvevaṃ yathecchasi //

evamuktasya śakreṇa cyavanasya mahātmanaḥ /
sa manyurvyagamacchīghraṃ sumoca ca purandaram //

madaṃ ca vyabhajadrājanpāne strīṣu ca vīryavān /
akṣeṣu mṛgayāyāṃ ca pūrvasṛṣṭaṃ punaḥ punaḥ //

tadā madaṃ vinikṣipya śakraṃ santarpya cendunā /
aśvibhyāṃ sahitāndevānyājayitvā ca taṃ nṛpam //

vikhyāpya vīryaṃ lokeṣu sarveṣu vadatāṃvaraḥ /
sukanyayā sahāraṇye vijahārānukūlayā //

tasyaitaddvijasanghuṣṭaṃ saro rājanprakāśate /
atratvaṃ saha sodaryaiḥ pitṛḍandevāṃśca tarpaya //

etaddṛṣṭvā mahīpāla sikatākṣaṃ ca bhārata /
saindhavāraṇyamāsādya kulyānāṃ kuru darśanam //

puṣkareṣu mahārāja sarveṣu ca jalaṃ spṛśa /
sthāṇormantrāṇi ca japansiddhiṃ prāpsyasi bhārata //

sandhirdvayornaraśreṣṭha tretāyā dvāparasya ca / ayaṃ hi dṛśyate pārtha sarvapāpapraṇāśanaḥ /
atropaspṛśa caiva tvaṃ sarvapāpapraṇāśane //

ārcīkaparvataścaiva nivāsau vai manīṣiṇām /
sadāphalaḥ sadāsroto marutāṃ stānamuttamam //

caityāścaite bahuvidhāstridaśānāṃ yudhiṣṭhira / etaccandramasastīrthamṛṣayaḥ paryupāsate /
vaikhānasaprabhṛtayo vālakhilyāstathaiva ca //

śṛṅgāṇi trīṇi puṇyāni trīṇi prasarvaṇāni ca /
sarvāṇyanuparikramya yathākāmamupaspṛśa //

śāntanuścātra rājendra śunakaśca narādhipaḥ / naranārāyaṇau cobhau tapastaptvā ciraṃ nṛpa /
sthānaṃ sanātanaṃ prāptāvīśvaradhyānatatparau //

iha nityāśrayā devāḥ pitaraśca maharṣibhiḥ /
ārcīkaparvate tepustānyajasva yudhiṣṭhira //

iha te vai carūnprāśnannṛṣayaśca viśāmpate /
yamunā cākṣayasrotāḥ kṛṣṇaśceha taporataḥ //

yamau ca bhīmasenaśca kṛṣṇā cāmitrakarśana /
sarve cātra gamiṣyāmastvayaiva saha pāṇḍava //

etatprasravaṇaṃ puṇyamindrasya manujeśvara /
yatradhātā vidhātā ca vaparuṇaścordhvamāgatāḥ //

iha te'pyavasanrājañśāntāḥ paramadharmiṇaḥ /
maitrāṇāmṛjubuddhīnāmayaṃ girivaraḥ śubhaḥ //

eṣā sā yamunā rājanmaharṣigaṇasevitā /
nānāyajñacitā rājanpuṇyā pāpabhayāpahā //

atrarājā maheṣvāso māndhātā'yajata svayam / sāhadeviśca kaunteya somako dadatāṃvaraḥ //