મહાભારત · અધ્યાય 3.126

તં દૃષ્ટ્વા ઘોરવદનં મદં દેવઃ શતક્રતુઃ ।
આયાન્તં ભક્ષયિષ્યન્તં વ્યાત્તાનનમિવાન્તકમ્ ॥

ભયાત્સંસ્તમ્ભિતભુજઃ સૃક્વિણી લેલિહન્મુહુઃ ।
તતોઽવ્રવીદ્દેવરાજશ્ચ્યવનં ભયપીડિતઃ ॥

સોમાર્હાવશ્વિનાવેતાવદ્ય પ્રભૃતિ ભાર્ગવ ।
ભવિષ્યતઃ સત્યમેતદ્વચો વિપ્ર પ્રસીદ મે ॥

ન તે મિથ્યા સમારમ્ભો ભવત્વેષ પરો વિધિઃ ।
જાનામિ ચાહં વિપ્રર્ષે ન મિથ્યા ત્વં કરિષ્યસિ ॥

સોમપાવશ્વિનાવેતૌ યથા વાદ્ય કૃતૌ ત્વયા ।
તથૈવ મામપિ બ્રહ્મઞ્શ્રેયસા યોક્તુમર્હસિ ॥

ભૂય એવ તુ તે વીર્યં પ્રકાશેદિતિ ભાર્ગવ ।
સુકન્યાયાઃ પિતુશ્ચાસ્ય લોકે કીર્તિઃ પ્રથેદિતિ ॥

અતો મયૈતદ્વિહિતં તવ વીર્યપ્રકાશનમ્ ।
તસ્માન્પ્રસાદં કુરુ મે ભવત્વેવં યથેચ્છસિ ॥

એવમુક્તસ્ય શક્રેણ ચ્યવનસ્ય મહાત્મનઃ ।
સ મન્યુર્વ્યગમચ્છીઘ્રં સુમોચ ચ પુરન્દરમ્ ॥

મદં ચ વ્યભજદ્રાજન્પાને સ્ત્રીષુ ચ વીર્યવાન્ ।
અક્ષેષુ મૃગયાયાં ચ પૂર્વસૃષ્ટં પુનઃ પુનઃ ॥

તદા મદં વિનિક્ષિપ્ય શક્રં સન્તર્પ્ય ચેન્દુના ।
અશ્વિભ્યાં સહિતાન્દેવાન્યાજયિત્વા ચ તં નૃપમ્ ॥

વિખ્યાપ્ય વીર્યં લોકેષુ સર્વેષુ વદતાંવરઃ ।
સુકન્યયા સહારણ્યે વિજહારાનુકૂલયા ॥

તસ્યૈતદ્દ્વિજસન્ઘુષ્ટં સરો રાજન્પ્રકાશતે ।
અત્રત્વં સહ સોદર્યૈઃ પિતૃડન્દેવાંશ્ચ તર્પય ॥

એતદ્દૃષ્ટ્વા મહીપાલ સિકતાક્ષં ચ ભારત ।
સૈન્ધવારણ્યમાસાદ્ય કુલ્યાનાં કુરુ દર્શનમ્ ॥

પુષ્કરેષુ મહારાજ સર્વેષુ ચ જલં સ્પૃશ ।
સ્થાણોર્મન્ત્રાણિ ચ જપન્સિદ્ધિં પ્રાપ્સ્યસિ ભારત ॥

સન્ધિર્દ્વયોર્નરશ્રેષ્ઠ ત્રેતાયા દ્વાપરસ્ય ચ । અયં હિ દૃશ્યતે પાર્થ સર્વપાપપ્રણાશનઃ ।
અત્રોપસ્પૃશ ચૈવ ત્વં સર્વપાપપ્રણાશને ॥

આર્ચીકપર્વતશ્ચૈવ નિવાસૌ વૈ મનીષિણામ્ ।
સદાફલઃ સદાસ્રોતો મરુતાં સ્તાનમુત્તમમ્ ॥

ચૈત્યાશ્ચૈતે બહુવિધાસ્ત્રિદશાનાં યુધિષ્ઠિર । એતચ્ચન્દ્રમસસ્તીર્થમૃષયઃ પર્યુપાસતે ।
વૈખાનસપ્રભૃતયો વાલખિલ્યાસ્તથૈવ ચ ॥

શૃઙ્ગાણિ ત્રીણિ પુણ્યાનિ ત્રીણિ પ્રસર્વણાનિ ચ ।
સર્વાણ્યનુપરિક્રમ્ય યથાકામમુપસ્પૃશ ॥

શાન્તનુશ્ચાત્ર રાજેન્દ્ર શુનકશ્ચ નરાધિપઃ । નરનારાયણૌ ચોભૌ તપસ્તપ્ત્વા ચિરં નૃપ ।
સ્થાનં સનાતનં પ્રાપ્તાવીશ્વરધ્યાનતત્પરૌ ॥

ઇહ નિત્યાશ્રયા દેવાઃ પિતરશ્ચ મહર્ષિભિઃ ।
આર્ચીકપર્વતે તેપુસ્તાન્યજસ્વ યુધિષ્ઠિર ॥

ઇહ તે વૈ ચરૂન્પ્રાશ્નન્નૃષયશ્ચ વિશામ્પતે ।
યમુના ચાક્ષયસ્રોતાઃ કૃષ્ણશ્ચેહ તપોરતઃ ॥

યમૌ ચ ભીમસેનશ્ચ કૃષ્ણા ચામિત્રકર્શન ।
સર્વે ચાત્ર ગમિષ્યામસ્ત્વયૈવ સહ પાણ્ડવ ॥

એતત્પ્રસ્રવણં પુણ્યમિન્દ્રસ્ય મનુજેશ્વર ।
યત્રધાતા વિધાતા ચ વપરુણશ્ચોર્ધ્વમાગતાઃ ॥

ઇહ તેઽપ્યવસન્રાજઞ્શાન્તાઃ પરમધર્મિણઃ ।
મૈત્રાણામૃજુબુદ્ધીનામયં ગિરિવરઃ શુભઃ ॥

એષા સા યમુના રાજન્મહર્ષિગણસેવિતા ।
નાનાયજ્ઞચિતા રાજન્પુણ્યા પાપભયાપહા ॥

અત્રરાજા મહેષ્વાસો માન્ધાતાઽયજત સ્વયમ્ । સાહદેવિશ્ચ કૌન્તેય સોમકો દદતાંવરઃ ॥