મહાભારત · અધ્યાય 3.124

કસ્ય ચિત્ત્વથ કાલસ્ય ત્રિદશાવશ્વિનૌ નૃપ ।
કૃતાભિષેકાં વિવૃતાં સુકન્યાં તામપશ્યતામ્ ॥

તાં દૃષ્ટ્વા દર્શનીયાઙ્ગીં દેવરાજસુતામિવ ।
ઊચતુઃ સમભિદ્રુત્ય નાસત્યાવશ્વિનાવિદમ્ ॥

કસ્ય ત્વમસિ વામોરુ વનેઽસ્મિન્કિં કરોષિ ચ ।
ઇચ્છાવ ભદ્રે જ્ઞાતું ત્વાં તત્વમાખ્યાહિ શોભને ॥

તતઃ સુકન્યા સંવીતા તાવુવાચ સુરોત્તમૌ ।
શર્યાતિતનયાં વિત્તં ભાર્યાં માં ચ્યવનસ્ય ચ ॥

નામ્ના ચાહં સુકન્યેતિ નૃલોકેઽસ્મિન્પ્રતિષ્ઠિતા ।
સાઽહંસર્વાત્મના નિત્યં ભર્તારમનુવર્તિની ॥

અથાશ્વિનૌ પ્રહસ્યૈતામબ્રૂતાં પુનરેવ તુ ।
કથં ત્વમસિ કલ્યાણિ પિત્રા દત્તાઽગતા વને ॥

ભ્રાજસેઽસ્મિન્વને ભીરુ વિદ્યુત્સૌદામની યથા ।
ન દેવેષ્વપિ તુલ્યાં હિ ત્વયા પશ્યાવ ભામિનિ ॥

અનાભરણસમ્પન્ના પરમામ્બરવર્જિતા ।
શોભયસ્યધિકં ભદ્રે વનમપ્યનલન્કૃતા ॥

સર્વાભરણસમ્પનના પરમામ્વરધારિણી ।
શોભેથાસ્ત્વનવદ્યાઙ્ગિ ન ત્વેવં મલપઙ્કિની ॥

કસ્માદેવંવિધા ભૂત્વા જરાજર્જરિતં પતિમ્ ।
ત્વમુપાસ્સે હ કલ્યાણિ કામભોગબહિષ્કૃતમ્ ॥

અસમર્થં પરિત્રાણે પોષણે તુ શુચિસ્મિતે ।
સા ત્વં ચ્યવનમુત્સૃજ્યવરયસ્વૈકમાવયોઃ ॥

પત્યર્થં દેવગર્ભાભે મા વૃથા યૌવનં કૃથાઃ ।
એવમુક્તા સુકન્યાઽપિ સુરૌ તાવિદમબ્રવીત્ ॥

રતાઽહં ચ્યવને પત્યૌ મૈવં માં પર્યશઙ્કતમ્ ।
તાવબ્રૂતાં પુનસ્ત્વેનામાવાં દેવભિષગ્વરૌ ॥

યુવાનં રૂપસમ્પન્નં કરિષ્યાવઃ પતિં તવ । તતસ્તસ્યાવયોશ્ચૈવ વૃણીષ્વાન્યતમં પતિમ્ ।
એતેન સમયેનૈનમામન્ત્રય પતિં શુભે ॥

સા તયોર્વચનાદ્રાજન્નુપસન્ગમ્ય ભાર્ગવમ્ ।
ઉવાચ વાક્યં યત્તાભ્યામુક્તં ભૃગુસુતં પ્રતિ ॥

તચ્છ્રુત્વા ચ્યવનો ભાર્યામુવાચ ક્રિયતામિતિ ।
સા ભર્ત્રા સમનુજ્ઞાતા ક્રિયતામિત્યથાબ્રવીત્ ॥

શ્રુત્વા તદશ્વિનૌ વાક્યં તસ્યાસ્તત્ક્રિયતામિતિ ।
ઊચતૂ રાજપુત્રીં તાં પતિસ્તવ વિશત્વપઃ ॥

તતોઽમ્ભશ્ચ્યવનઃ શીઘ્રં રૂપાર્થી પ્રવિવેશ હ ।
અશ્વિનાવપિ તદ્રાજન્સરઃ પ્રાવિશતાં તદા ॥

તતો મુહૂર્તાદુત્તીર્ણાઃ સર્વે તે સરસસ્ત્રયઃ । દિવ્યરૂપધરાઃ સર્વે યુવાનો મૃષ્ટકુણ્ડલાઃ ।
તુલ્યવેષધરાશ્ચૈવ મનસઃ પ્રીતિવર્ધનાઃ ॥

તેઽબ્રુવન્સહિતાઃ સર્વે વૃણીષ્વાન્યતમં શુભે ।
અસ્માકમીપ્સિતં ભદ્રે પતિત્વે વરવર્ણિનિ ॥

ત્વમશ્વિનોરન્યતરં ચ્યવનં વા યશસ્વિનિ ।
યત્ર વાઽપ્યભિકામાઽસિ તં વૃણીષ્વ સુશોભને ॥

સા સમીક્ષ્ય તુ તાન્સર્વાંસ્તુલ્યરૂપધરાન્સ્થિતાન્ ।
નિશ્ચિત્ય મનસા બુદ્ધ્યા દેવી વવ્રે સ્વકં પતિમ્ ॥

લબ્ધ્વા તુ ચ્યવનો ભાર્યાંવયોરૂપં ચ વાઞ્છિતમ્ ।
હૃષ્ટોઽબ્રવીન્મહાતેજાસ્તૌ નાસત્યાવિદં વચઃ ॥

યથાઽહં રૂપસમ્પન્નો વયસા ચ સમન્વિતઃ ।
કૃતો ભવદ્ભ્યાં વૃદ્ધઃ સન્ભાર્યાં ચ પ્રાપ્તવાનિમામ્ ॥

તસ્માદ્યુવાં કરિષ્યામિ પ્રીત્યાઽહં સોમપીથિનૌ ।
મિષતો દેવરાજસ્ય સત્યમેતદ્બ્રવીમિ વામ્ ॥

તચ્છ્રુત્વા હૃષ્ટમનસૌ દિવં તૌ પ્રતિજગ્મતુઃ । ચ્યવનશ્ચ સુકન્યા ચ સુરાવિવ વિજહ્રતુઃ ॥