Mahabharata · Chapter 3.120

prabhāsatīrthamāsādyapāṇḍavā vṛṣṇayastathā /
kimakurvankathāścaiṣāṃ kāstatrāsaṃstapodhana //

te hi sarve mahātmānaḥ sarvaśāstraviśāradāḥ /
vṛṣṇayaḥ pāṇḍavāścaiva suhṛdaścaparasparam //
vaiśampāyana uvāca /

prabhāsatīrthaṃ samprāpya puṇyaṃ tīrthaṃ mahodadheḥ /
vṛṣṇayaḥ pāṇḍavānvīrāḥ parivāryopatasthire //

tato gokṣīrakundendumṛṇaālarajataprabhaḥ /
vanamālī halī rāmo babhāṣe puṣkarekṣaṇam //

na kṛṣṇa dharmaścarito bhavāya jantoradharmaśca parābhavāya /
yudhiṣṭhiro yatrajaṭī mahātmā vanāśrayaḥ kliśyati cīravāsāḥ //

duryodhanaścāpi mahīṃ praśāsti na cāsya bhūmirvivaraṃ dadāti /
dharmādadharmaścarito varīyā- nitīva manyeta naro'lpabuddhiḥ //

duryodhane cāpi vivardhamāne yudhiṣṭhire cāsukhamāttarājye /
hṛtasvarājyāyatanārthabhārye duryodhanenālpadhiyā ca pārthe / kinnvatra kartavyamiti prajābhiḥ śaṅkā mithaḥ sañjanitā narāṇām //

ayaṃ sa dharmaprabhavo narendro dharme dhṛtaḥ satyadhṛtiḥ pradātā /
caleddhi rājyācca sukhācca pārtho dharmādapetastu kathaṃ vivardhet //

kathaṃ nu bhīṣmaśca kṛpaśca vipro droṇaśca rājā ca kulasya vṛddhaḥ /
pravrājya pārthānsumāpnuvanti dhikpāpabuddhīnbharatapradhānān //

kinnāma vakṣyatyavanipradhānaḥ pitṛḍansamāgamya paratra pāpaḥ /
putreṣu samyakvaritaṃ mayeti putrānapāpānvyaparopya rājyāt //

nāsau dhiyā samprati paśyati sma kinnāma kṛtvā'hamacakṣurevam /
jātaḥ pṛthivyāmiti pārthiveṣu pravrājyakaunteyamiti sma rājyāt //

nūnaṃ samṛddhānpitṛlokabhūmau cāmīkarābhānkṣitijānpraphullān /
vicitravīryasya sutaḥ saputraḥ kṛtvā nṛśaṃsaṃ vata paśyati sma //

vyūḍhottarāṃsānpṛthulohitākṣā- nimāmsma pṛcchansa śṛṇoti nūnam /
prāsthāpayadyatsa vanaṃ saśaṅko yudhiṣṭhiraṃ sānujamāttaśastram //

yo'yaṃ paraṣāṃ pṛtanāṃ samṛddhāṃ nirāyudho dīrghabhujo nihanyāt /
śrutvaiva śabdaṃ hi vṛkodarasya muñcanti sainyāni śakṛtsamūtram //

sa kṣutpipāsādhvakṛśastarasvī sametya nānāyudhabāṇapāṇiḥ /
vane smaranvāsamimaṃ sughoraṃ śeṣaṃ na kuryāditi niścitaṃ me //

na hyas vīryeṇa balena kaści- tsamaḥ pṛthivyāmapi vidyate'nyaḥ /
sa śītavātātapakarśitāṅgo na śeṣamājāvasuhṛtsu kuryāt //

prācyāṃ nṛpānekarathena jitvā vṛkodaraḥ sānucarānraṇeṣu /
svastyāgamadyo'tirathastarasvī soyaṃ vane kliśyati cīravāsāḥ //

yaḥ sindhukūle vyajayannṛdevā- nsamāgatāndākṣiṇātyānmahīpān /
taṃ paśyatemaṃ sahadevamadya tarasvinaṃ tāpasaveṣarūpam //

yaḥ pārthivānekarathena vīro diśaṃ pratīcīṃ pratniyuddhaśauṇḍaḥ /
jigye raṇe taṃ nakulaṃ vane'smi- nsampaśyatainaṃ maladigdhagātram //

satre samṛddhe'tirathasya rājño vedītalādutpatitā sutā yā /
seyaṃ vane vāsamimaṃ suduḥkhaṃ kathaṃ sahatyadya satī sukhārhā //

trivargamukhyas samīraṇasya deveśvarasyāpyathavā'śvinośca /
eṣāṃ surāṇāṃ tanayāḥ kathannu vane carantyastasukhāḥ sukhārhāḥ //

jite hi dharmasya sute sabhārye sabhrātṛke sānucare niraste /
duryodhane cāpi vivardhamāne kathaṃ na sīdatyavaniḥ saśailā //