Mahabharata · Chapter 3.115

tataḥ prayātaḥ kauśikyāḥ pāṇḍavo janamejaya /
ānupūrvyeṇa sarvāṇi jagāmāyatanānyatha //

sa sāgaraṃ samāsādya gaṅgāyāḥ sangame nṛpa /
nadīśatānāṃ pañcānāṃ madhye cakre samāplavam //

tataḥ samudratīreṇa jagāma vasudhādhipaḥ /
bhrātṛbhiḥ sahito vīraḥ kaliṅgānprati bhārata //
lomaśa uvāca /

ete kaliṅgāḥ kaunteya yatra vaitaraṇī nadī /
yatrāyajata dharmopi devāñśaraṇametya vai //

ṛṣibhiḥ samupāyuktaṃ yajñiyaṃ giriśobhitam /
uttaraṃ tīrametaddhi satataṃ dvijasevitam //

samena devayānena pathā svargamupeyuṣaḥ /
atravai ṛṣayo'nye'pi purā kratubhirījire //

atraiva rudro rājendra paśumādattavānmakhe /
paśumādāya rājendra bhāgoyamiti cābravīt //

hṛte paśau tadā devāstamūcurbharatarṣabha /
mā parasvamabhidrogdhā mādharmyānnīnaśaḥ pathaḥ //

svayaṃ yajñeśvaro bhūtvā karmaṇāṃ phaladāyakaḥ /
yajñaṃ vihantuṃ bhagavānnārhase jagadīśvara //

itikalyāṇarūpābhirvāgbhiste rudramastuvan /
iṣṭyā cainaṃ tarpayitvā mānayāñcakrire tadā //

tataḥ sa paśumutsṛjya devayānena jagmivān /
tatrānuvaṃśo rudrasyataṃ nibodha yudhiṣṭhira //

ayātayāmaṃ sarvebhyo bhāgebhyo bhāgamuttamam /
devāḥ sankalpayāmāsurbhayādrudrasya śāśvatam //

imāṃ gāthāmatra gāyannapaḥ spṛśati yo naraḥ /
devayāno'sya panthāśca cakṣuṣā'bhiprakāśate //
vaiśampāyana uvāca /

tato vaitaraṇīṃ sarve pāṇḍavā draupadī tathā /
avatīrya mahābhāgāstarpayāñcakrire pitṛn //
yudhiṣṭhira uvāca /

upaspṛśyeha vidhivadasyāṃ nadyāṃ tapobalāt /
mānuṣādasmi viṣayādapetaḥ paśya lomaśa //

sarvāllom̐kānprapaśyāmi prasādāttava suvrata /
vaikhānasānāṃ japatāmeṣa śabdo mahātmanām //
lomaśa uvāca /

triśataṃ vai sahasrāṇi yojanānāṃ yudhiṣṭhira /
yatradhvaniṃ śṛṇoṣyenaṃ tūṣṇīmāssva viśāmpate //

etatsvayambhuvo rājanvanaṃ divyaṃ prakāśate /
yatrāyajata rājendra viśvakarmā pratāpavān //

yasminyajñe hi bhūrdattā kaśyapāya mahātmane /
saparvatavanoddeśā dakṣiṇārthe svayambhuvā //

avāsīdacca kaunteya dattamātrā mahī tadā /
uvāca cāpi kupitā lokaśvaramidaṃ prabhum //

na māṃ martyāya bhagavankasmaiciddātumarhasi /
pradānaṃ moghametatte yāsyāmyeṣā rasātalam //

viṣīdantīṃ tu tāṃ dṛṣṭvā kaśyapo bhagavānṛṣiḥ /
prasādayāmbabhūvātha tato bhūmiṃ viśāmpate //

tataḥ prasannā pṛthivī tapasā tasya pāṇḍava /
punarunnahya salilāddedīrūpāsthitā babhau //

saiṣā prakāśate rājanvedīsaṃsthānalakṣaṇā /
āruhyātra mahārāja vīryavānvai bhaviṣyasi //

saiṣā sāgaramāsrādya rājanvedī samāśritā /
etāmāruhya bhadraṃ te tvamekastara sāgaram //

ahaṃ ca te svastyayanaṃ prayokṣye yathā tvamenāmadhirohase'dya /
spṛṣṭā hi martyena tataḥ samudra- meṣā vedī praviśatyājamīḍha //

onnamo viśvaguptāya namo viśvaparāya te /
sānnidhyaṃ kuru deveśa sāgare lavaṇāmbhasi //

agnirmitro yonirāpo'tha devyo viṣṇo retastvamamṛtasya nābhiḥ /
evaṃ bruvanpāṇḍava satyavākyaṃ vedīmimāṃ tvaṃ tarasā'dhiroha //

agniśca te yoniriḍā ca deho retodhā viṣṇoramṛtasya nābhiḥ /
evaṃ bruvanpāṇḍava satyavākyaṃ tato'vagāheta patiṃ nadīnām //

anyathā hi kuruśreṣṭha devayonirapāmpatiḥ /
kuśāgreṇāpi kaunteya na spraṣṭavyo mahodadhiḥ //
vaiśampāyana uvāca /

tataḥ kṛtasvastyayano mahātmā yudhiṣṭhiraḥ sāgaramabhyagacchat /
kṛtvā ca tacchāsanamasya sarvaṃ mahendramāsādya niśāmuvāsa //