Mahabharata · Chapter 3.114

rakṣāṃsi caitāni caranti putra rūpeṇa tenādbhutadarśanena /
atulyavīryāṇyabhirūpavanti vighraṃ sadā tapasaścintayanti //

surūparūpāṇi ca tāni tāta pralobhayante vividhairupāyaiḥ /
sukhācca lokācca nipātayanti tānyugrarūpāṇi munīnvaneṣu //

na tāni seveta muniryatātmā satāṃ lokānprārthayānaḥ kathañcit /
kṛtvā vighranaṃ tāpasānāṃ ramante pāpācārāstāpasastānna paśyet //

asajjanenācaritāni putra pānānyapeyāni madhūni tāni /
mālyāni caitāni na vai munīnāṃ smṛtāni citrojjvalagandhavanti //

rakṣāṃsi tānīti nivārya putraṃ vibhāṇḍakastāṃ mṛgayāmbabhūva /
nāsādayāmāsa yadā tryaheṇa tadā sa paryāvavṛte śramāya //

yadā puna kāśyapo vai jagāma phalānyāhartuṃ vidhināśrame'sau /
tadā punarlobhayituṃ jagāma sā veśāyoṣā munimṛśyaśṛhgam //

dṛṣṭvaiva tāmṛśyaśṛṅgaḥ prahṛṣṭaḥ sambhrāntarūpo'bhyapatattadānīm /
provāca caināṃ bhavataḥ śramāya gacchāva yāvanna pitā mamaiti //
lomaśa uvāca /

tato rājankāśyapasyaikaputraṃ praveśya vegena vimucya nāvam /
pralobhayantyo vividhairupāyai- rājagmuraṅgādhipateḥ samīpam //

saṃsthāpyatāmāśramadarśane tu santāritāṃ nāvamathātiśubhrām /
tīrādupādāya tathaiva cakre rājāśramaṃ nāma vanaṃ vicitram //

antaḥpure taṃ tu niveśya rājā vibhāṇḍakasyātmajamekaputram /
dadarśa meghaiḥ sahasā pravṛṣṭa- māpūryaṇāṇaṃ ca jagajjalena //

sa romapāda paripūrṇakāmaḥ sutāṃ dadāvṛśyaśṛṅgāya śāntām /
krodhapratīkārakaraṃ ca cakre gobhiśca mārgeṣvabhikarṣaṇaṃ ca //

vibhāṇḍakasyāvrajataḥ sa rājā paśūnprabhūtānpaśupāṃśca vīrān /
samādiśatputragṛddhī maharṣi- rvibhāṇḍakaḥ paripṛcchedyadā vaḥ //

sa ktavyaḥ prāñjalibhirbhavadbhiḥ putrasya te paśavaḥ karṣaṇaṃ ca /
kiṃ te priyaṃ vai kriyatāṃ maharṣe dāsāḥ sma sarve tava vāci baddhāḥ //

athopāyātsa muniścaṇḍakopaḥ svamāśramaṃ mūlaphalaṃ gṛhītvā /
anveṣamāṇaśca na tatra putraṃ dadarśa cukrodha tato bhṛśaṃ saḥ //

tataḥ sa kopena vidīryamāṇa āśaṅkamāno nṛpatervidhānam /
jagāma campāṃ pratidhakṣyamāṇa- stamaṅgarājaṃ sapuraṃ sarāṣṭram //

sa vai śrāntaḥ kṣudhitaḥ kāśyapastā- nghoṣānsamāsāditavānsamṛddhān /
gopaiśca tairvidhivatpūjyamāno rājeva tāṃ rātrimuvāsa tatra //

avāpya satkāramatīva hṛṣṭaḥ provāca kasya prathitāḥ stha gopāḥ /
ūcustataste'bhyupagamya sarve dhanaṃ tavedaṃ vihitaṃ sutasya //

deśeṣu deśeṣu sa pūjyamāna- stāṃścaiva śṛṇvanmadhurānpralāpān /
praśāntabhūyiṣṭharajāḥ prahṛṣṭaḥ samāsasādāṅgapatiṃ purastham //

sa pūjitastena nararṣabheṇa dadarśa putraṃ divi devaṃ yathendram /
śāntāṃ snuṣāṃ caiva dadarśa tatra saudāmanīmuccarantīṃ yathaiva //

grāmāṃ śca ghoṣāṃśca sutasya dṛṣṭvā śāntāṃ ca śānto'sya paraḥ sa kopaḥ /
cakāra tasyaiva paraṃ prasādaṃ vibhāṇḍako bhūmipaternaredra //

sa tatranikṣipya sutaṃ maharṣi- ruvāca sūryāgnisamaprabhāvaḥ /
jāte ca putre vanamevāvrajethā rājñaḥ priyāṇyasya sarvāṇi kṛtvā //

sa tadvacaḥ kṛtavānṛśyaśṛṅgo yayau ca yatrāsya pitā babhūva /
śāntā cainaṃ paryacarannarendra sve rohiṇī somamivānukūlā //

arundhatī vā subhagā vasiṣṭhaṃ lopāmudrā vā yathā hyagastyam /
nalasya vai damayantī yathā bhū dyathā śacī vajradharasya caiva //

nālāyanī cendrasenā babhūva vasyā nityaṃ mudgalasyājamīḍha /
yathā sītā dāśarathermahātmano yathā tava draupadī pāṇḍuputra / tathā śāntā ṛśyaśṛṅgaṃ vanasthaṃ prītyā yuktā paryacarannarendra //

tasyāśramaḥ puṇya eṣo'vabhāti mahāhradaṃ śobhayanpuṇyakīrtiḥ /
atrasnātaḥ kṛtakṛtyo viśuddha- stīrthānyanyānyanusaṃyāhi rājan //