Mahabharata · Chapter 3.103

kimarthaṃ sahasā vindhyaḥ pravṛddhaḥ krodhamūrcchitaḥ /
etadicchāmyahaṃ śrotuṃ vistareṇa mahāmune //
lomaśa uvāca /

adrirājaṃ mahāghoraṃ rameruṃ kanakaparvatam /
udayāstamane bhānuḥ pradakṣiṇamavartata //

taṃ tu dṛṣṭvā tathā vindhya śailaḥ sūryamathābravīt /
yathā hi merurbhavatā nityaśaḥ parigamyate //

pradakṣiṇaśca kriyate māmevaṃ karu bhāskara /
evamuktastataḥ sūryaḥ śailendraṃ pratyabhāpata //

nāhamātmecchayā śaila karomyenaṃ pradakṣiṇam /
eṣa mārgaḥ pradiṣṭo me yenedaṃ nirmitaṃ jagat //

evamuktastataḥ krodhātpravṛddhaḥ sahasā'calaḥ /
sūryācandramasormārgaṃ roddhumicchanparantapa //

tato devāḥ sahitāḥ sarva eva / sendrāḥ samāgamya mahādrirājam /
nivārayāmāsurupāyatastaṃ na ca sma teṣāṃ vacanaṃ cakāra //

athābhijagmurmunimāśramasthaṃ tapasvinaṃ dharmabhṛtāṃ variṣṭham /
agastyamatyadbhutavīryadīptaṃ taṃ cārthamūcuḥ sahitāḥ surāste //

sūryācandarmasormārgaṃ nakṣatrāṇāṃ gatiṃ tathā /
śailarājo vṛṇotyepa vindhyaḥ krodhavaśānugaḥ //

taṃ nivārayituṃ śakto nānyaḥ kaściddvijottama /
ṛte tvāṃ hi mahābhāga tasmādenaṃ nivāraya //

tacchrutvā vacanaṃ vipraḥ surāṇāṃ śailamabhyagāt /
sobhigamyābravīdvindhyaṃ sadāraḥ samupasthitaḥ //

mārgamicchāmyahaṃ dattaṃ bhavatā parvatottama /
dakṣiṇāmabhigantāsmi diśe kāryeṇa kenacit //

yāvadāgamanaṃ mahyaṃ tāvattvaṃ pratipālaya /
nivṛtte mayi śailendra tato vardhasva kāmataḥ //

evaṃ sa samayaṃ kṛtvāvindhyenāmitrakarśana /
adyāpi dakṣiṇāddeśādvāruṇirna nivartate //

vindhyo'pitadbhayādrājankuñcitāṅgo na vardhate /
agastyasya prabhāveṇa yanmāṃ tvaṃ paripṛcchasi //

kāleyāstu yathā rājansuraiḥ sarvairniṣūditāḥ /
agastyādvaramāsādya tanme nigadataḥ śṛṇu //

tridaśānāṃ vacaḥ śrutvā maitrāvaruṇirabravīt /
kimarthamabhiyātā stha varaṃ mattaḥ kamicchatha //

evamuktāstatastena devatā munimabruvan /
sarve prāñjalayo bhūtvā purandarapurogamāḥ //

evaṃ tvayocchāma kṛtaṃ hi kāryaṃ mahārṇavaṃ pīyamānaṃ mahātman /
tato vadhiṣyāma sahānubandhā- nkālopasṛṣṭānsuravidviṣastān //

tridaśānāṃ vacaḥ śrutvā tatheti munirabravīt /
kariṣye bhavatāṃ kāmaṃ lokānāṃ ca mahatsukham //

evamuktvā tato'gacchatsamudraṃ saritāmpatim /
ṛṣibhiśca tapaḥsiddhai sārdhaṃ devaiśca suvrata //

manuṣyoragagandharvayakṣakimpuruṣāstathā /
anujagmurmahātmānaṃ draṣṭukānāstadadbhutam //

tato'bhyagacchansahitāḥ samudraṃ bhīmaniḥkhanam /
nṛtyantamiva cormībhirvalgantamiva vāyunā //

hasantamiva phenaughaiḥ skhalantaṃ kandareṣu ca /
tānāgrāhasamākīrṇaṃ nānādvijagaṇānvitam //

agastyasahitā devāḥ sagandharvamahāragāḥ / ṛṣayaśca mahābhāgāḥ samāsedurmahodadhim //