Mahabharata · Chapter 3.102

tava prasādādvardhante prajāḥ sarvāścaturvidhāḥ /
tā bhāvitā bhāvayanati havyakavyairdivaukasaḥ //

lokā hyevaṃ vivardhante hyanyonyaṃ samupāśritāḥ /
tvatprasādānnirudvignāstvayaiva parirakṣitāḥ //

idaṃ ca samanuprāptaṃ lokānāṃ bhayamuttamam /
na ca jānīma keneti rātrau vadhyanti brāhmaṇāḥ //

kṣīṇeṣu ca brāhmaṇeṣu pṛthivī kṣayameṣyati /
tata pṛthivyāṃ kṣīṇāyāṃ tridivaṃ kṣayameṣyati //

tvatprasādānmahābāho lokāḥ sarve jagatpate /
vināśaṃ nādhigaccheyustvayā vai parirakṣitāḥ //
viṣṇuruvāca /

viditaṃ me surāḥ sarvaṃ prajānāṃ kṣayakāraṇam /
bhavatāṃ cāpi vakṣyāmi śṛṇudhvaṃ vigatajvarāḥ //

kāleyā iti vikhyātā gaṇāḥ paramadāruṇāḥ /
taiśca vṛtraṃ samāśritya jagatsarvaṃ pramāthitam //

te vṛtraṃ nihataṃ dṛṣṭvā sahasrākṣeṇa dhīmatā /
jīvitaṃ parirakṣantaḥ praviṣṭā varuṇālayam //

te praviśyodadhiṃ ghoraṃ nakragrāhasamākulam /
utsādārthaṃ lokānāṃ rātrau ghnanti ṛṣīniha //

na tu śakyāḥ kṣayaṃ netuṃ samudrāśrayiṇo hi te /
samudrasya kṣaye buddhirbhavadbhiḥ sampradhāryatām //

etacchrutvā vaco devā viṣṇunā samudīritam /
viṣṇumeva puraskṛtyabrahmāṇaṃ samupasthitāḥ //

tataste praṇatā bhūtvā tamevārdhaṃ nyavedayan /
sarvalokavināśārthaṃ kāleyā kṛtaniścayāḥ //

eṣāṃ tadvacanaṃ śrutvā padmayoniḥ sanātanaḥ /
uvāca paramaprītastridaśānarthavadvacaḥ //

viditaṃ me surāḥ sarve dānavānāṃ viveṣṭitam /
manuṣyādeśca nidhanaṃ kāleyaiḥ kālacoditaiḥ //

kṣayastepāmanuprāptaḥ kālenopahatāśca ye /
upāyaṃ sampravakṣyāmi samudrasya viśoṣaṇe //

agastya itivigvyāto vāruṇiḥ susamāhitaḥ /
tamupāgamya sahitā imamarthaṃ prayācata //

sa hi śakto mahātejāḥ kṣaṇātpātuṃ mahodadhim /
agastyena vinā ko hi śakto'nyo'rṇavaśopaṇe //

anyathā hi na śakyāste vinā sāgaraśopaṇam /
samudre ca kṣayaṃ nīte kāleyānnihaniṣyatha //

evaṃ śrutvā vaco devā brahmaṇaḥ parameṣṭhinaḥ /
parameṣṭhinamājñāpyaagastyasyāśramaṃ yayuḥ //

tatrāpaśyanmahātmānaṃ vāruṇiṃ dīptatejasam /
upāsyamānamṛpibhirdevairiva pitāmaham //

te'bhigamya mahātmānaṃ maitrāvaruṇimacyutam /
āśramaśthaṃ taporāśiṃ karmabhiḥ svaistu tuṣṭuvuḥ //
devā ūcuḥ /

nahupeṇābhitaptānāṃ tvaṃ lokānāṃ gatiḥ purā /
bhraṃśitaśca suraiśvaryāllokārthaṃ lokakaṇṭakaḥ //

krodhātpravṛddhastaraṇaṃ bhāskarasya nabhogataḥ /
vacastavānatikrāmanvindhyaḥ śailo na vardhate //

tamasā cāvṛteloke mṛtyunā'bhyarditāḥ prajāḥ /
tvāmeva nāthamāsādya nirvṛtiṃ paramāṃ gatāḥ //

asmākaṃ bhayabhītānāṃ nityaśo bhagavāngatiḥ / tatastvārtāḥ prayācāmo varaṃ tvāṃ varado hyasi //