Mahabharata · Chapter 3.104
samudraṃ sa samāsādya vāruṇirbhagavānṛṣiḥ /
uvāca sahitāndevānṛṣīṃścaiva samāgatān //
eṣa lokahitārthaṃ vai pibāmi varuṇālayam /
bhavadbhiryadanuṣṭheyaṃ tacchīghraṃ saṃvidhīyatām //
etāvaduktvā vacanaṃ maitrāvaruṇiracyutaḥ /
samudramapibatkruddhaḥ sarvalokasya paśyataḥ //
pīyamānaṃ samudraṃ taṃ dṛṣṭvā sendrāstadā'marāḥ /
vismayaṃ paramaṃ jagmuḥ stutibhiścāpyapūjayan //
tvaṃ nastrātā vidhātā ca lokānāṃ lokabhāvana /
tvatprasādātsamucchedaṃ na gacchetsāmaraṃ jagat //
sa pūjyamānastridaśairmahātmā gandharvatūryeṣu nadatsu sarvaśaḥ /
divyaiśca puṣpairavakīryamāṇo mahārṇavaṃ niḥsalilaṃ cakāra //
dṛṣṭvā kṛtanniḥsalilaṃ mahārṇavaṃ surāḥ samastāḥ paramaprahṛṣṭāḥ / 3-104-7cpragṛhya divyānivarāyudhāni tāndānavāñjaghruradīnasatvāḥ //
te vadhyamānāstridaśairmahātmabhi- rmahābalairvegibhirunnadadbhiḥ /
na sehirevegavatāṃ mahātmanāṃ vegaṃ tadā dhārayituṃ divaukasām //
te vadhyamānāstridaśairdānavā bhīmaniḥsvanāḥ /
racakru sutumulaṃ yuddhaṃ muhūrtamiva bhārata //
te pūrvaṃ tapasā dagdhā munibhirbhāvitātmabhiḥ /
yatamānāḥ paraṃ śaktyā tridaśairviniṣūditāḥ //
tehemaniṣkābharaṇāḥ kuṇḍalāṅgadadhāriṇaḥ /
nihatā bahvaśobhanta puṣpitā iva kiṃśukāḥ //
hataśeṣāstataḥ kecitkāleyā manujottama /
vidārya vasudhāṃ devīṃ pātālatalamāsthitāḥ //
nihatāndānavāndṛṣṭvā tridaśā munipuhgavam /
tuṣṭuvurvividhairvākyairidaṃ vacanamabruvan //
tvatprasādānmahābāho lokaiḥ prāptaṃ mahatsukham /
tvattejasā ca nihatāḥ kāleyāḥ krūravikramāḥ //
pūrasva mahābāho samudraṃ lokabhāvana /
yattvayā salilaṃ pītaṃ tadasminpunarutsṛja //
evamuktaḥ pratyuvāca bhagavānmunipuṅgavaḥ /
tāṃstadā sahitāndevānagastyaḥsapurandarān //
jīrṇaṃ taddhi mayā toyamupāyo'nyaḥ pracintyatām /
pūraṇārthaṃ samudrasya bhavadbhiryatnamāsthitaiḥ //
ketacchrutvā tu vacanaṃ maharṣerbhāvitātmanaḥ /
vismitāśca viṣaṇṇāśca babhūvuḥ sahitāḥ surāḥ //
parasparamanujñāpyapraṇamya munipuṅgavam /
prajāḥ sarvā mahārāja viprajagmuryathāgatam //
tridaśā viṣṇunā sārdhamupajagmuḥ pitāmaham /
pūraṇārthaṃ samudrasya mantrayitvā punaḥ punaḥ //
te dhātāramupāgamya tridaśāḥ saha viṣṇunā / ūcuḥ prāñjalayaḥ sarve sāgarasyābhipūraṇam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0