Mahabharata · Chapter 3.101

samudraṃ te samāśritya varuṇaṃ nidhamambhasaḥ /
kāleyāḥ sampravartanta trailokyasya vināśane //

te rātrau samabhikruddhā bhakṣayanti sadā munīn /
āśrameṣu ca ye santi puṇyeṣvāyataneṣu ca //

vasiṣṭhasyāśrame viprā bhakṣitāstairdurātmabhiḥ /
aśītiḥ śatamaṣṭau ca nava cānye tapasvinaḥ //

cyavanasyāśramaṃ gatvā puṇyaṃ dvijaniṣevitam /
phalamūlāśanānāṃ hi munīnāṃ bhakṣitaṃ śatam //

evaṃ rātrau sma kurvanti viviśuścārṇavaṃ divā /
kāleyāste durātmāno bhakṣayantastapodhanān //

bharadvājāśrame caiva niyatā brhamacāriṇaḥ /
vāyvāhārāmbubhakṣāśca viṃśatiḥ sanniṣūditāḥ //

evaṃ krameṇa sarvāṃstānāśramāndānavāstadā / niśāyāṃ paribādhante samudrāmbubalāśrayāt /
kālopasṛṣṭāḥ kāleyā ghnanto dvijagaṇānbahūn //

na cainānanvabudhyanta manujā manujottama /
evaṃ pravṛttāndaityāṃstāṃstāpaseṣu tapasviṣu //

kṣayāya jagataḥ krūrāḥ paryaṭanti sma medinīm //

prabhāte samadṛśyanta niyatāhārakarśitāḥ /
mahītalasthā munayaḥ śarīrairgatajīvitaiḥ //

kṣīṇamāṃsairvirudhirairvimajjāntrairvisandhibhiḥ /
ākīrṇairācitā bhūmiḥ śaṅkhānāmiva rāśibhiḥ //

laśairvipraviddhaiśca sruvairbhagnaistathaiva ca /
vikīrṇairagnihotraiśca bhūrbabhūva samāvṛtā //

niḥsvādhyāyavapaṭkāraṃ naṣṭayajñotsavakriyam /
jagadāsīnnirutsāhaṃ kāleyabhayapīḍitam //

evaṃ sankṣīyamāṇāśca mānavā manujeśvara /
ātmatrāṇapapā bhītāḥ prādravanta diśo bhayāt //

kecidguhāḥ praviviśurnirbharāṃścāpare śritāḥ /
apare maraṇodvignā bhayātprāṇānsamutsṛjan //

kecidatramaheṣvāsāḥ śūrāḥ paramaharṣitāḥ /
mārgamāṇaāḥ paraṃ yatnaṃ dānavānāṃ pracakrire //

na caitānadhijagmuste samudraṃ samupāśritān /
śramaṃ jagmuśca paramamājagmuḥ kṣayameva ca //

jagatyupaśamaṃ yāte naṣṭayajñotsavakriye /
ājagmuḥ paramāmārtiṃ tridaśā manujeśvara //

sametya samahendrāśca bhayānmantraṃ pracakrire //

śaraṇyaṃ śaraṇaṃ devaṃ nārāyaṇamajaṃ vibhum / te'bhigamya namaskṛtya vaikuṇṭhamaparājitam /
tato devāḥ samastāste tadocurmadhusūdanam //

tvannaḥ sraṣṭā ca bhartā ca hartā ca jagataḥ prabho / tvayā sṛṣṭamidaṃ viśvaṃ yacceṅgaṃ yacca neṅgati /
tvayyeva puṇḍarīkākṣa punastatpravilīyate //

tvayā bhūmiḥ purā naṣṭā samudrātpuṣkarekṣaṇa /
vārāhaṃ vapurāśrityajagadarthe samuddhṛtā //

ādidaityo mahāvīryo hiraṇyakaśipuḥ purā /
nārasiṃhaṃ vapuḥ kṛtvā sūditaḥ puruṣottama //

avadhyaḥ sarvabhūtānāṃ baliścāpi mahāsuraḥ /
vāmanaṃ vapurāśritya trailokyāddhaṃśitastvayā //

asuraśca maheṣvāso jambha ityabhiviśrutaḥ /
yajñakṣobhakaraḥ krūrastvayaiva vinipātitaḥ //

evamādīni karmāṇi yeṣāṃ saṃkhyā na vidyate /
asmākaṃ bhayabhītānāṃ tvaṃ gatirmadhusūdana //

tasmāttvāṃ devadeveśa lokārthaṃ jñāpayāmahe / rakṣa lokāṃśca devāṃśca śakraṃ ca mahato bhayāt /
śaraṇāgatasantrāṇe tvameko'si dṛḍhavrataḥ //