Mahabharata · Chapter 3.100

tataḥ sa vajrī balabhiddaivatairabhirakṣitaḥ /
āsasāda tato vṛtraṃ sthitamāvṛtya rodasī //

kālakeyairmahākāyai samantādabhirakṣitam /
samudyatapraharaṇaiḥ saśṛṅgairiva parvataiḥ //

tato yuddhaṃ samabhavaddevānāṃ dānavaiḥ saha /
muhūrtaṃ bharataśreṣṭha lokatrāsakaraṃ mahat //

udyatapratividdhānāṃ svaṅgānāṃ vīrabāhubhiḥ /
āsītsutumuḥ śabdaḥ śarīreṣvabhipātyatām //

śirobhiḥ prapatadbhiścāpyantarikṣānmahītalam /
tālairiva mahārāja vṛntādbhraṣṭairadṛśyata //

te hemakavacā bhūtvā kāleyāḥ parighāyudhāḥ /
tridaśānabhyavartanta dāvadagdhā ivādrayaḥ //

teṣāṃ vegavatāṃ vegaṃ sahitānāṃ pradhāvatām /
na śekustridaśāḥ soḍhuṃ te bhagnāḥ prādravanbhayāt //

tāndṛṣṭvā dravato bhītānsahasrākṣaḥ purandaraḥ /
vṛtre vivardhamāne ca kaśmalaṃ mahadāviśat //

taṃ śaktaṃ kaśmalāviṣṭaṃ dṛṣṭvā viṣṇuḥ sanātanaḥ /
jagāma śaraṇaṃ śīghraṃ taṃ tu nārāyaṇaṃ prabhum //

taṃ śakraṃ kaśmalāviṣṭaṃ dṛṣṭvā viṣṇuḥ sanātanaḥ /
svatejo vyadadhacchakre balamasya vivardhayan //

viṣṇunā gopitaṃ śakraṃ dṛṣṭvādevagaṇāstataḥ /
svaṃ svantejaḥ samādadhyustathā brahmarṣayo'malāḥ //

sa samāpyāyitaḥ śakro viṣṇunā daivataiḥ saha /
ṛṣibhiśca mahābhāgairbalavānsamapadyata //

jñātvā balasthaṃ tridaśādhipaṃ tu nanāda vṛtro mahato ninādān /
tas praṇādena dharā diśaśca khaṃ dyaurnagāścāpi cacāla sarvam //

tato mahendraḥ paramābhitaptaḥ śrutvā ravaṃ ghorarūpaṃ mahāntam /
bhaye nimagnastvarito mumoca vajraṃ mahattasya vadhāya rājan //

sa cakravajrābhihataḥ papāta mahāsuraḥ kāñcanamālyadhārī /
yathā mahāśailavaraḥ purastā- tsa mandaro viṣṇukarādvimuktaḥ //

tasminhate daityavare bhayārtaḥ śakraḥ pradudrāva saraḥ praveṣṭum /
vajraṃ na mene svakarādvimuktaṃ vṛtraṃ bhayāccāpi hataṃ na mene //

sarve ca devā muditāḥ prahṛṣṭā maharṣayaścandramabhiṣṭuvantaḥ /
vṛtraṃ hataṃ sandadṛśuḥ pṛthivyāṃ vajrāhataṃ śailamivāvadīrṇam //

sarvāṃśca daityāṃstvaritāḥ sametya jaghnuḥ surā vṛtravadhābhitaptān /
te vadhyamānāstridaśaiḥ sametaiḥ samudramevāviviśurbhayārtāḥ //

praviśya caivodadhimaprameyaṃ jhaṣākulaṃ nakrasamākulaṃ ca /
tadā sma mantraṃ sahitāḥ pracakru- strailokyanāśārthamabhiprayatnāt //

tatrasma kecinmatiniścayajñā- stāṃstānupayānupavarṇayanti /
teṣāṃ tu tatrakramakālayogā- ddhorā matiścintayatāṃ babhūva //

ye santi vidyātapasopapannā- steṣāṃ vināśaḥ prathamaṃ tu kāryaḥ /
lokā hi sarve tapasā dhriyante tasmāttvaradhvaṃ tapasaḥ kṣayāya //

yesanti kecicca vasundharāyāṃ tapasvino dharmavidaś tajjñāḥ /
teṣāṃ vadhaḥ kriyatāṃ kṣiprameva teṣu pranaṣṭeṣu jagatpranaṣṭam //

evaṃ hi sarve gatabuddhibhāvā jagadvināśe paramaprahṛṣṭāḥ /
durgaṃ samāśritya mahormimantaṃ ratnākaraṃ varuṇasyālayaṃ sma //