Mahabharata · Chapter 2.98

tato vyadhvagataṃ pārthaṃ prātikāmī yudhiṣṭhiram /
uvāca vacanādrājño dhṛtarāṣṭrasya dhīmataḥ //

upāstīrṇā sabhā rājannakṣānuptvā yudhiṣṭhira /
ehi pāṇḍava dīvyeti pitā tvāha narādhipaḥ //
yudhiṣṭhira uvāca //

dhāturniyogādbhūtāni prāpnuvanti śubhāśubham /
na nivṛttistayorasti devatavyaṃ punaryadi //

akṣadyūte samāhvānaṃ niyogātsthavirasya ca /
jānannapi kṣayakaraṃ nātikramitumutsahe //
vaiśampāyana uvāca //

asambhavo hemamayasya janto- stathāpi rāmo lulubhe mṛgāya /
prāyaḥ samāsannaparābhavāṇāṃ dhiyo viparyastatarā bhavanti //

iti bruvannivavṛte bhrātṛbhiḥ saha pāṇḍavaḥ /
jānāṃśca śakunermāyāṃ pārtho dyūtamiyātpunaḥ //

viviśuste sabhāṃ tāṃ tu punareva mahārathāḥ /
vyathayanti sma cetāṃsi muhṛdāṃ bharatarṣabhāḥ //

yathopajoṣamāsīnāḥ punardyūtapravṛttaye /
sarvalokavināśāya daivenopanipīḍitāḥ //
śakuniruvāca //

amuñcatsthaviro yadvo dhanaṃ pūjitameva tat /
mahādhanaṃ glahaṃ tvekaṃ śṛṇu bho bharatarṣabha //

vayaṃ vā dvādaśābdāni yuṣmābhirdyūtanirjitāḥ /
praviśema mahāraṇyaṃ rauravājinavāsasaḥ //

trayodaśaṃ ca svajanairajñātāḥ parivatsaram /
jñātāśca punaranyāni vane varṣāṇi dvādaśa //

asmābhirnirjitā yūyaṃ vane dvādaśa vatsarān /
vasadhvaṃ kṛṣṇayā sārdhamajinaiḥ prativāsitāḥ //

trayodaśaṃ ca svajanairajñātāḥ piravatsaram /
jñātāśca punaranyāni vane varṣāṇi dvādaśa //

trayodaśe ca nirvṛtte punareva yathocitam /
svarājyaṃ pratipattavyamitarairathavetaraiḥ //

anena vyavasāyena sahāsmābhiryudhiṣṭhira /
akṣānuptvā punardyūtamehi dīvyasva bhārata //

atha sabhyāḥ sabhāmadhye samucchritakarāstadā /
ūcurudvignamanasaḥ saṃvegātsarva eva hi //
sabhyā ūcuḥ /

aho dhigbāndhavā nainaṃ bodhayanti mahadbhayam /
buddhyā buddhyenna vā buddhyedayaṃ vai bharatarṣabha //
vaiśampāyana uvāca //

janapravādānsubahūñśṛṇvannapi narādhipaḥ /
hriyā ca dharmasaṃyogātpārtho dyūtamiyātpunaḥ //

jānannāpi mahābuddhiḥ punardyūtamavartayat /
apyāsanno vināśaḥ syātkurūṇāmiticintayan //
yudhiṣṭhira uvāca //

kathaṃ vai madvidho rājā svadharmamanupālayan /
āhūto vinivarteta dīvyāmi śakune tvayā //
śakuniruvāca //

gavāśvaṃ bahudhenukamaparyantamajāvikam /
gajāḥ kośo hiraṇyaṃ ca dāsīdāsāśca sarvaśaḥ //

hitvā no glaha evaiko vanavāsāya pāṇḍavāḥ /
yūyaṃ vayaṃ vā vijitā vasema vanamāśritāḥ //

trayodaśaṃ ca vai varṇamajñātāḥ svajanaistathā / anena vyavasāyena dīvyāma puruṣarṣabhāḥ /

samutkṣepeṇa caikena vanavāsāya bhārata //
vaiśampāyana uvāca //

evaṃ daivabalāviṣṭo dharmarājo yudhiṣṭhiraḥ /
bhīṣmadroṇā'vāryamāṇo vidureṇa ca dhīmatā //

yuyutsunā kṛpeṇātha sañjayena ca bhārata /
gāndhāryā pṛthayā caiva bhīmārjunayamaistathā //

vikarṇena ca vīreṇa draupadyā drauṇinā tathā /
somadattena ca tathā bāhlīkena ca dhīmatā //

vāryamāṇopi satataṃ na ca rājanniyacchati /
evaṃ saṃvāryamāṇopi kaunteyo hitakāmyayā //

devakāryārthasiddhyarthaṃ muhūrtaṃ kalimāviśat /
aviṣṭaḥ kalinā rājañchakuniṃ pratyabhāṣata //

evaṃ bhavatviti tadā vanavāsāya dīvyati /
pratijagrāha taṃ pārtho glahaṃ jagrāha saubalaḥ //
jitamityeva śakuniryudhiṣṭhiramabhāṣata //