Mahabharata · Chapter 2.95

rājankiṃ karavāmaste praśādhyasmāṃstvamīśvaraḥ /
nityaṃ hi sthātumicchāmastava bhārata śāsane //
dhṛtarāṣṭra uvāca //

ajātaśatro bhadraṃ te ariṣṭaṃ svasti gacchata /
anujñātāḥ sahadhanāḥ svarājyamanuśāsata //

idaṃ caivāvaboddhavyaṃ vṛddhasya mama śāsanam /
mayā nigaditaṃ sarvaṃ pathyaṃ niḥśreyasaṃ param //

vettha tvaṃ tāta dharmāṇāṃ gatiṃ sūkṣmāṃ yudhiṣṭhira /
vinīto'si mahāprājña vṛddhānāṃ paryupāsitā //

yato buddhistataḥ śāntiḥ praśamaṃ gaccha bhārata /
nādāruṇi patecchastraṃ dāruṇyetannipātyate //

na vairāṇyabhijānanti guṇānpaśyanti nāguṇān /
virodhaṃ nādhigacchanti ye ta uttamapūruṣāḥ //

smaranti sukṛtānyeva na vairāṇi kṛtānyapi /
santaḥ parārthaṃ kurvāṇā nāvekṣanti pratikriyām //

saṃvāde paruṣāṇyāhuryudhiṣṭhira narādhamāḥ / pratyāhurmadhyamāstvete'nuktāḥ narādhamāḥ /

na coktā naiva cānuktāstvahitāḥ paruṣā giraḥ /
pratijalpanti vai dhīrāḥ sadā tūttamapuruṣāḥ //

smaranti sukṛtānyeva na vairāṇi kṛtānyapi /
santaḥ prativijānanto labdhvā pratyayamātmanaḥ //

asambhinnāryamaryādāḥ sādhavaḥ priyadarśanāḥ /
tathā carittammāryeṇa tvayā'sminsatsamāgame //

duryodhanasya pāruṣyaṃ tattāta hṛdi mā kṛthāḥ /
mātaraṃ caiva gāndhārīṃ māṃ ca tvaṃ guṇakāṅkṣayā //

upasthitaṃ vṛddhamandhaṃ pitaraṃ paśya bhārata /
prekṣāpūrvaṃ mayā dyūtamidamāsīdupekṣitam //

mitrāṇi draṣṭukāmena putrāṇāṃ ca balābalam /
aśocyāḥ kuravo rājanyeṣāṃ tvamanuśāsitā //

mantrī ca viduro dhīmānsarvaśāstraviśāradaḥ /
tvayi dharmo'rjune dhairyaṃ bhīmasene parākramaḥ //

śuddhā ca guruśuśrūṣā yamayoḥ puruṣāgryayoḥ / ajātaśatro bhadraṃ te khāṇḍavaprasthamāviśa /
bhrātṛbhiste'stu saubhrātraṃ dharme te dhīyatāma manaḥ //
vaiśampāyana uvāca //

ityukto bharataśreṣṭha dharmarājo yudhiṣṭhiraḥ /
kṛtvā'ryasamayaṃ sarvaṃ pratasthe bhrātṛbhiḥ saha //

te rathānmeghasaṅkāśānāsthāya saha kṛṣṇayā /
prayayurhṛṣṭamanasa indraprasthaṃ purottamam //