મહાભારત · અધ્યાય 2.95

રાજન્કિં કરવામસ્તે પ્રશાધ્યસ્માંસ્ત્વમીશ્વરઃ ।
નિત્યં હિ સ્થાતુમિચ્છામસ્તવ ભારત શાસને ॥
ધૃતરાષ્ટ્ર ઉવાચ ॥

અજાતશત્રો ભદ્રં તે અરિષ્ટં સ્વસ્તિ ગચ્છત ।
અનુજ્ઞાતાઃ સહધનાઃ સ્વરાજ્યમનુશાસત ॥

ઇદં ચૈવાવબોદ્ધવ્યં વૃદ્ધસ્ય મમ શાસનમ્ ।
મયા નિગદિતં સર્વં પથ્યં નિઃશ્રેયસં પરમ્ ॥

વેત્થ ત્વં તાત ધર્માણાં ગતિં સૂક્ષ્માં યુધિષ્ઠિર ।
વિનીતોઽસિ મહાપ્રાજ્ઞ વૃદ્ધાનાં પર્યુપાસિતા ॥

યતો બુદ્ધિસ્તતઃ શાન્તિઃ પ્રશમં ગચ્છ ભારત ।
નાદારુણિ પતેચ્છસ્ત્રં દારુણ્યેતન્નિપાત્યતે ॥

ન વૈરાણ્યભિજાનન્તિ ગુણાન્પશ્યન્તિ નાગુણાન્ ।
વિરોધં નાધિગચ્છન્તિ યે ત ઉત્તમપૂરુષાઃ ॥

સ્મરન્તિ સુકૃતાન્યેવ ન વૈરાણિ કૃતાન્યપિ ।
સન્તઃ પરાર્થં કુર્વાણા નાવેક્ષન્તિ પ્રતિક્રિયામ્ ॥

સંવાદે પરુષાણ્યાહુર્યુધિષ્ઠિર નરાધમાઃ । પ્રત્યાહુર્મધ્યમાસ્ત્વેતેઽનુક્તાઃ નરાધમાઃ ।

ન ચોક્તા નૈવ ચાનુક્તાસ્ત્વહિતાઃ પરુષા ગિરઃ ।
પ્રતિજલ્પન્તિ વૈ ધીરાઃ સદા તૂત્તમપુરુષાઃ ॥

સ્મરન્તિ સુકૃતાન્યેવ ન વૈરાણિ કૃતાન્યપિ ।
સન્તઃ પ્રતિવિજાનન્તો લબ્ધ્વા પ્રત્યયમાત્મનઃ ॥

અસમ્ભિન્નાર્યમર્યાદાઃ સાધવઃ પ્રિયદર્શનાઃ ।
તથા ચરિત્તમ્માર્યેણ ત્વયાઽસ્મિન્સત્સમાગમે ॥

દુર્યોધનસ્ય પારુષ્યં તત્તાત હૃદિ મા કૃથાઃ ।
માતરં ચૈવ ગાન્ધારીં માં ચ ત્વં ગુણકાઙ્ક્ષયા ॥

ઉપસ્થિતં વૃદ્ધમન્ધં પિતરં પશ્ય ભારત ।
પ્રેક્ષાપૂર્વં મયા દ્યૂતમિદમાસીદુપેક્ષિતમ્ ॥

મિત્રાણિ દ્રષ્ટુકામેન પુત્રાણાં ચ બલાબલમ્ ।
અશોચ્યાઃ કુરવો રાજન્યેષાં ત્વમનુશાસિતા ॥

મન્ત્રી ચ વિદુરો ધીમાન્સર્વશાસ્ત્રવિશારદઃ ।
ત્વયિ ધર્મોઽર્જુને ધૈર્યં ભીમસેને પરાક્રમઃ ॥

શુદ્ધા ચ ગુરુશુશ્રૂષા યમયોઃ પુરુષાગ્ર્યયોઃ । અજાતશત્રો ભદ્રં તે ખાણ્ડવપ્રસ્થમાવિશ ।
ભ્રાતૃભિસ્તેઽસ્તુ સૌભ્રાત્રં ધર્મે તે ધીયતામ મનઃ ॥
વૈશમ્પાયન ઉવાચ ॥

ઇત્યુક્તો ભરતશ્રેષ્ઠ ધર્મરાજો યુધિષ્ઠિરઃ ।
કૃત્વાઽર્યસમયં સર્વં પ્રતસ્થે ભ્રાતૃભિઃ સહ ॥

તે રથાન્મેઘસઙ્કાશાનાસ્થાય સહ કૃષ્ણયા ।
પ્રયયુર્હૃષ્ટમનસ ઇન્દ્રપ્રસ્થં પુરોત્તમમ્ ॥