Mahabharata · Chapter 2.94

yā naḥ śrutā manuṣyeṣu striyo rūpeṇa sammatāḥ /
tāsāmetādṛśaṃ karma na kasyāścana śuśruma //

krodhāviṣṭeṣu pārtheṣu dhārtarāṣṭreṣu cāpyati /
draupadī pāṇḍuputrāṇāṃ kṛṣṇā śāntirihābhavat //

aplave'mbhasi magnānāmapratiṣṭhe nimajjatām /
pāñcālī pāṇḍuputrāṇāṃ naureṣāṃ pāragā'bhavat //
vaiśampāyana uvāca //

tadvai śrutvā bhīmasenaḥ kurumadhye'tyamarṣaṇaḥ /
strī gatiḥ pāṇḍuputrāṇāmityuvāca sudurmanāḥ //
bhīma uvāca //

trīṇi jyotīṃṣi puruṣa iti vai devalo'bravīt /
apatyaṃ karma vidyā ca yataḥ sṛṣṭāḥ prajāstataḥ //

amedhye vai gataprāme śūnye jñātibhirujjhite /
dehe tritayamevaitatpuruṣasyopayujyate //

tanno jyotirabhihataṃ dārāṇāmabhimarśanāt /
dhanañjaya kathaṃ svitsyādapatyamabhimṛṣṭajam //
arjuna uvāca //

na caivoktā na cānuktā hīnataḥ paruṣā giraḥ /
bhārata pratijalpanti sadā tūttamapūruṣāḥ //

smaranti sukṛtānyeva na vairāṇi kṛtānyapi /
santaḥ prativijānanto labdhasambhāvanāḥ svayam //
bhīma uvāca //

ihaivaitānahaṃ sarvānhanmi śatrūnsamāgatān /
atha niṣkramya rājendra samūlānhanmi bhārata //

kiṃ no vivaditeneha kimuktena ca bhārata /
adyaivaitānnihanmīha praśādhi pṛthivīmimām //

ityuktvā bhīmasenastu kaniṣṭhairbhrātṛbhiḥ saha /
mṛgamadhye yathā siṃho muhurmuhurudaikṣata //

sāntvyamāno vīkṣamāṇaḥ pārthenākliṣṭakarmaṇā /
khidyatyeva mahābāhurantardāhena vīryavān //

kruddhasya tasya srotobhyaḥ karṇādibhyo narādhipa /
sadhūmaḥ sasphuliṅgārciḥ pāvakaḥ samajāyata //

bhrukuṭīkṛtaduṣprekṣyamabhavattasya tanmukham /
yugāntakāle samprāpte kṛtāntasyeva rūpiṇaḥ //

yudhiṣṭhirastamāvārya bāhunā bāhuśālinam /
maivamityabravīccainaṃ joṣamāsveti bhārata //

nivārya ca mahābāhuṃ kopasaṃraktalocanam /
pitaraṃ samupātiṣṭhaddhṛtarāṣṭraṃ kṛtāñjaliḥ //