મહાભારત · અધ્યાય 2.94

યા નઃ શ્રુતા મનુષ્યેષુ સ્ત્રિયો રૂપેણ સમ્મતાઃ ।
તાસામેતાદૃશં કર્મ ન કસ્યાશ્ચન શુશ્રુમ ॥

ક્રોધાવિષ્ટેષુ પાર્થેષુ ધાર્તરાષ્ટ્રેષુ ચાપ્યતિ ।
દ્રૌપદી પાણ્ડુપુત્રાણાં કૃષ્ણા શાન્તિરિહાભવત્ ॥

અપ્લવેઽમ્ભસિ મગ્નાનામપ્રતિષ્ઠે નિમજ્જતામ્ ।
પાઞ્ચાલી પાણ્ડુપુત્રાણાં નૌરેષાં પારગાઽભવત્ ॥
વૈશમ્પાયન ઉવાચ ॥

તદ્વૈ શ્રુત્વા ભીમસેનઃ કુરુમધ્યેઽત્યમર્ષણઃ ।
સ્ત્રી ગતિઃ પાણ્ડુપુત્રાણામિત્યુવાચ સુદુર્મનાઃ ॥
ભીમ ઉવાચ ॥

ત્રીણિ જ્યોતીંષિ પુરુષ ઇતિ વૈ દેવલોઽબ્રવીત્ ।
અપત્યં કર્મ વિદ્યા ચ યતઃ સૃષ્ટાઃ પ્રજાસ્તતઃ ॥

અમેધ્યે વૈ ગતપ્રામે શૂન્યે જ્ઞાતિભિરુજ્ઝિતે ।
દેહે ત્રિતયમેવૈતત્પુરુષસ્યોપયુજ્યતે ॥

તન્નો જ્યોતિરભિહતં દારાણામભિમર્શનાત્ ।
ધનઞ્જય કથં સ્વિત્સ્યાદપત્યમભિમૃષ્ટજમ્ ॥
અર્જુન ઉવાચ ॥

ન ચૈવોક્તા ન ચાનુક્તા હીનતઃ પરુષા ગિરઃ ।
ભારત પ્રતિજલ્પન્તિ સદા તૂત્તમપૂરુષાઃ ॥

સ્મરન્તિ સુકૃતાન્યેવ ન વૈરાણિ કૃતાન્યપિ ।
સન્તઃ પ્રતિવિજાનન્તો લબ્ધસમ્ભાવનાઃ સ્વયમ્ ॥
ભીમ ઉવાચ ॥

ઇહૈવૈતાનહં સર્વાન્હન્મિ શત્રૂન્સમાગતાન્ ।
અથ નિષ્ક્રમ્ય રાજેન્દ્ર સમૂલાન્હન્મિ ભારત ॥

કિં નો વિવદિતેનેહ કિમુક્તેન ચ ભારત ।
અદ્યૈવૈતાન્નિહન્મીહ પ્રશાધિ પૃથિવીમિમામ્ ॥

ઇત્યુક્ત્વા ભીમસેનસ્તુ કનિષ્ઠૈર્ભ્રાતૃભિઃ સહ ।
મૃગમધ્યે યથા સિંહો મુહુર્મુહુરુદૈક્ષત ॥

સાન્ત્વ્યમાનો વીક્ષમાણઃ પાર્થેનાક્લિષ્ટકર્મણા ।
ખિદ્યત્યેવ મહાબાહુરન્તર્દાહેન વીર્યવાન્ ॥

ક્રુદ્ધસ્ય તસ્ય સ્રોતોભ્યઃ કર્ણાદિભ્યો નરાધિપ ।
સધૂમઃ સસ્ફુલિઙ્ગાર્ચિઃ પાવકઃ સમજાયત ॥

ભ્રુકુટીકૃતદુષ્પ્રેક્ષ્યમભવત્તસ્ય તન્મુખમ્ ।
યુગાન્તકાલે સમ્પ્રાપ્તે કૃતાન્તસ્યેવ રૂપિણઃ ॥

યુધિષ્ઠિરસ્તમાવાર્ય બાહુના બાહુશાલિનમ્ ।
મૈવમિત્યબ્રવીચ્ચૈનં જોષમાસ્વેતિ ભારત ॥

નિવાર્ય ચ મહાબાહું કોપસંરક્તલોચનમ્ ।
પિતરં સમુપાતિષ્ઠદ્ધૃતરાષ્ટ્રં કૃતાઞ્જલિઃ ॥