Mahabharata · Chapter 2.91

purastātkaraṇīyaṃ me na kṛtaṃ kāryamuttaram /
vihvalā'smi kṛtā'nena karṣatā balinā balāt //

abhivādaṃ karomyeṣāṃ kurūṇāṃ kurusaṃsadi /
na me syādaparādho'yaṃ tadidaṃ na kṛtaṃ mayā //
vaiśampāyana uvāca //

sā tena ca samādhūtā duḥkhena ca tapasvinī /
patitā vilalāpedaṃ sabhāyāmatathocitā //
draupadyuvāca /

svayaṃvare yāsmi nṛpaidṛṣṭā raṅge samāgataiḥ /
na dṛṣṭapūrvā cānyatra sā'hamadya sabhāṃ gatā //

yāṃ na vāyurna cādityo dṛṣṭavantau purā gṛhe /
sā'hamadya sabhāmadhye dṛṣṭāsmi janasaṃsadi //

yāṃ na mṛṣyanti vātena spṛśyamānāṃ gṛhe purā /
spṛśyamānāṃ sahante'dya pāṇḍavāstāṃ dūrātmanā //

mṛṣyanti kuravaśceme manye kālasya paryayam /
snuṣāṃ duhitaraṃ caiva kliśyamānāmanarhatīm //

kinnvataḥ kṛpaṇaṃ bhūyo yadahaṃ strī satī śubhā /
sabhāmadhyaṃ vigāhe'dya kva nu dharmo mahīkṣitām //

dharmyaṃ striyaṃ sabhāṃ pūrve na nayantīti naḥ śrutam /
sa naṣṭaḥ kauraveyeṣu pūrvo dharmaḥ sanātanaḥ //

kathaṃ hi bhāryā pāṇḍunāṃ pārṣatasya svasā satī /
vāsudevasya ca sakhī pārthivānāṃ sabhāmiyām //

tāmimāṃ dharmarājasya bhāryāṃ sadṛśavarṇajām / brūta dāsīmadāsīṃ vā tatkariṣyāmi kauravāḥ /

ayaṃ māṃ sudṛḍhaṃ kṣudraḥ kauravāṇāṃ yaśoharaḥ / kliśnāti nāhaṃ tatsoḍhuṃ kṣudraḥ kauravāṇāṃ yaśoharaḥ /

jitāṃ vā'pyajitāṃ vāpi manyadhvaṃ māṃ yathā nṛpāḥ /
tathā pratyuktamicchāmi tatkariṣyāmi kauravāḥ //
bhīṣma uvāca //

uktavānasmi kalyāṇi dharmasya paramā gatiḥ /
loke na śakyate jñātumapi vijñairmahātmabhiḥ //

balavāṃśca yathā dharmaṃ loke paśyati puruṣaḥ //
sa dharmo dharmavelāyāṃ bhavatyabhihataḥ paraḥ //

na vivektuṃ ca te praśnamimaṃ śaknomi niścayāt /
sūkṣmatvādgahanatvācca kāryasyāsya ca gauravāt //

nūnamantaḥ kulasyāsya bhavitā na cirādiva /
tathā hi kuravaḥ sarve lobhamohaparāyaṇāḥ //

kuleṣu jātāḥ kalyāṇi vyasanairāhatā bhṛśam /
dharmyānmārgānna cyavante yeṣāṃ nastvaṃ badhūḥ sthitā //

upapannaṃ ca pāñcāli tavedaṃ vṛttamīdṛśam /
yatkṛcchramapi samprāptā dharmamevānvavekṣase //

ete droṇādayaścaiva vṛddhā dharmavido janāḥ /
śūnyaiḥ śarīraistiṣṭhanti gatāsava ivānatāḥ //

yudhiṣṭhirastu praśno'sminpramāṇamiti me matiḥ /
ajitāṃ vā jitāṃ veti svayaṃ vyākhyātumarhati //