Mahabharata · Chapter 2.88

bahuvittaṃ parājaiṣīḥ pāṇḍavānāṃ yudhiṣṭhira /
ācakṣva vittaṃ kaunteya yadi te'styaparājitam //
yudhiṣṭhira uvāca //

mama vittamasaṅkhyeyaṃ yadahaṃ veda saubala /
atha tvaṃ śakune kasmādvittaṃ samanupṛcchasi //

ayutaṃ prayutaṃ caiva śaṅkuṃ padmaṃ tathārbudam /
kharvaṃ śaṅkhaṃ nikharvaṃ ca mahāpadmaṃ ca koṭayaḥ //

madhyaṃ caiva parārdhaṃ ca saparaṃ cātra paṇyatām /
etanmama dhanaṃ rājaṃstena dīvyāmyahaṃ tvayā //
vaiśampāyana uvāca //

etacchutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
yudhiṣṭhira uvāca //

gavāśvaṃ bahudhenūkamasaṅkhyeyamajāvikam / yatkiñcidanu parṇāśāṃ prāk sindhorapi saubala /
etanmama dhanaṃ sarvaṃ tena dīvyāmyahaṃ tvayā //
vaiśampāyana uvāca //

etacchutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
yudhiṣṭhira uvāca //

puraṃ janapado bhūmirabrāhmaṇadhanaiḥ saha / abrāhmaṇāśca puruṣā rājañśiṣṭaṃ dhanaṃ mama /
etadrājanmama dhanaṃ tena dīvyāmyahaṃ tvayā //
vaiśampāyana uvāca //

etacchrutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
yudhiṣṭhira uvāca //

rājaputrā ime rājañchomante yairvibhūṣitāḥ / kumḍalāni ca niṣkāśca sarvaṃ rājavibhūṣaṇam /
etanmama dhanaṃ rājaṃstena dīvyāmyahaṃ tvayā //
vaiśampāyana uvāca //

etacchrutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
yudhiṣṭhira uvāca //

śyāmo yuvā lohitākṣaḥ siṃhaskandho mahābhujaḥ /
nakulo glaha evaikī viddhyetanmama taddhanam //
śakuniruvāca /

priyaste nakulo rājanrājaputro yudhiṣṭhira /
asmākaṃ vaśatāṃ prāpto bhūyaḥ keneha dīvyase //
vaiśampāyana uvāca //

evamuktvā tu tānakṣāñśakuniḥ pratyadīvyata /
jitamityeva śakuniryudhiṣṭhiramabhāṣata //
yudhiṣṭhira uvāca //

ayaṃ dharmānsahadevo'nuśāsti loke hyasminpaṇḍitākhyāṃ gataśca /
anarhatā rājaputreṇa tena dīvyāmyahaṃ cāpriyavatpriyeṇa //
vaiśampāyana uvāca //

etacchrutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
śakuniruvāca //

mādrīputrau priyau rājaṃstavemau vijitau mayā /
garīyāṃsau tu manye bhīmasenadhanañjayau //
yudhiṣṭhira uvāca /

adharmaṃ carase nūnaṃ yo nāvekṣasi vai nayam /
yo naḥ sumanasāṃ mūḍha vibhedaṃ kartumicchasi //
śakuniruvāca //

garte mattaḥ prapatate pramattaḥ sthāṇumṛcchati /
jyeṣṭho rājanvrariṣṭho'si namaste bharatarṣabha //

svapne tāni na dṛśyante jāgrato vā yudhiṣṭhira /
kitavā yāni dīvyantaḥ pralapantyutkaṭā iva //
yudhiṣṭhira uvāca //

yo naḥ saṅkhye nauriva pāranetā jetā ripūṇāṃ rājaputrastarasvī /
anarhatā lokavīreṇa tena dīvyāmyahaṃ śakune phālgunena //
vaiśampāyana uvāca //

etacchrutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
śakuniruvāca /

ayaṃ mayā pāṇḍavānāṃ dhanirdharaḥ parājitaḥ pāṇḍavaḥ savyasācī /
bhīmena rājandayitena dīvya yatkaitavaṃ pāṇḍava te'vaśiṣṭam //
yudhiṣṭhira uvāca //

yo no netā yo yudhi naḥ praṇetā yathā vajrī dānavaśatrurekaḥ /
tiryakprekṣī sannatabhrūrmahātmā siṃhaskandho yaśca sadā'tyamarṣī //

balena tulyo yasyapa pumānna vidyate gadābhṛtāmagrya ihārimardanaḥ /
anarhatā rājaputreṇa tena
dīvyāmyahaṃ bhīmasenena rājan //
vaiśampāyana uvāca //

etacchrutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
śakuniruvāca /

bahuvittaṃ parājaiṣīrbhrātṝṃśca sahayadvipān /
ācakṣva vittaṃ kaunteya yadi te'styaparājitam //
yudhiṣṭhira uvāca //

ahaṃ viśiṣṭaḥ sarveṣāṃ bhrātṝṇāṃ dayitastathā /
kuryāmahaṃ jitaḥ karma svayamātmanyupalpute //
vaiśampāyana uvāca //

etacchrutvā vyavasito nikṛtiṃ samupāśritaḥ /
jitamityeva śakuniryudhiṣṭhiramabhāṣata //
śakuniruvāca /

etatpāpiṣṭhamakaroryadātmānaṃ parājayeḥ /
śiṣṭe sati dhane rājanpāpa ātmaparājayaḥ //
vaiśampāyana uvāca //

evamuktvā matākṣastān glahe sarvānavasthitān /
parājayallokavīrānuktvā rājñāṃ pṛthak pṛthak //
śakuniruvāca //

asti te vai priyā rājan glaha eko'parājitaḥ /
paṇasva kṛṣṇāṃ pāñcālīṃ tayātmānaṃ punarjaya //
yudhiṣṭhira uvāca //

naiva hrasvā na mahatī na kṛśā nātirohiṇī /
nīlakuñcitakaśī ca tayā dīvyāmyahaṃ tvayā //

śāradotpalapatrākṣyā śāradotpalagandhayā /
śāradotpalasevinyā rūpeṇa śrīsamānayā //

tathaiva syādānuśaṃsyāttatha syādrūpasampadā /
tathā syācchīlasampattyā yāmicchetpuruṣaḥ striyam //

sarvairguṇairhi sampannāmanukūlāṃ priyaṃvadām /
yādṛśīṃ dharmakāmārthasiddhimicchennaraḥ striyam //

caramaṃ saṃviśati yā prathamaṃ pratibudhyate /
āgopālāvipālebhyaḥ sarvaṃ veda kṛtākṛtam //

ābhāti padmavadvaktraṃ sasvedaṃ mallikeva ca /
vedīmadhyā dīrghakeśī tāmrāsyā nātilomaśā //

tayaivaṃvidhayā rājanpāñcālyāhaṃ sumadhyamā /
glahaṃ dīvyāmi cārvaṅgyā draupadyā hanta saubala //
vaiśampāyana uvāca //

evamukte tu vacane dharmarājena dhīmatā /
dhigdhigityeva vṛddhānāṃ sabhyānāṃ niḥ sṛtā giraḥ //

cukṣubhe sā sabhā rājanrājñāṃ sañjatrire śucaḥ /
bhīṣmadroṇakṛpādīnāṃ svedaśca samajāyata //

śiro gṛhītvā viduro gatasatva ivābhavat /
āste dhyāyannadhovaktro niḥ śvasanniva pannagaḥ //

bāhlīkaḥ somadattaśca prātipeyaśca sañjayaḥ / drauṇirbhūriśravāścaiva yuyutsurdhṛtarāṣṭrajaḥ /
āsurvīkṣya tvadhovaktrā niśvasanta ivoragāḥ //

dhṛtarāṣṭrastu saṃhṛṣṭaḥ paryapṛcchatpunaḥ punaḥ /
kiṃ jitaṃ kiṃ jitamiti hyākāraṃ nābhyarakṣata //

jaharṣa karṇo'tibhṛśaṃ saha duḥśāsanādibhiḥ /
itareṣāṃ tu sabhyānāṃ netrebhyaḥ prāpatañjalam //

saubalastvabhighāyaiva jitakāśī madotkaṭaḥ /
jitamityeva tānakṣānpurarevānvapadyata //