Mahabharata · Chapter 2.82

yāṃ tvametāṃ śriyaṃ pāṇḍuputre yudhiṣṭhire /
tapyase tāṃ hariṣyāmi dyūtena jayatāṃ vara //

āhūyatāṃ paraṃ rājankuntīputro yudhiṣṭhiraḥ /
agatvā saṃśayamahamayuddhvā ca camūmukhe //

akṣānkṣipannakṣataḥ sanvidvānaviduṣo jaye /
glahāndhanūṃṣi me viddhi śarānakṣāṃśca bhārata //

akṣāṇāṃ hṛdayaṃ me jyāṃ rathaṃ viddhi mamāsphuram //
duryodhana uvāca /

ayamutsahate rājacchriyamāhartumakṣavit /
dyūtena pāṇḍuputrebhyastadanujñātumarhasi //
dhṛtarāṣṭra uvāca /

sthito'smi śāsane bhrāturvidurasya mahātmanaḥ /
tena saṅgamya vetsyāmi kāryasyāsya viniścayam //
duryodhana uvāca //

kṛṣṇādabhyādhikaḥ so'pi kṣattā boddhā viśāmpate /
kevalaṃ dharmamevāha na tadvijayasādhakam //

jayaśca dharmatopetastathaiva bharatarṣabha /
tasmādvinayato jetā tāvubhau ca virodhinau //

vyapaneṣyati te buddhiṃ viduro muktasaṃśayaḥ /
pāṇḍavānāṃ hite yukto na tathā mama kaurava //

nārabhetānyasāmarthyātpuruṣaḥ kāryamātmanaḥ /
matisāmyaṃ dvayornāsti kāryeṣu kurunandana //

bhayaṃ pariharanmatta ātmānaṃ paripālayan /
varṣāsu klinnavaṭavattiṣṭhannaivāvasīdati //

na vyādhayo nāpi yamaḥ prāptuṃ śreyaḥ pratīkṣate /
yāvadeva bhavetkalpastāvacchreyaḥ samācaret //
dhṛtarāṣṭra uvāca //

sarvathā putra balibhirvigraho me rocate /
vairaṃ vikāraṃ sṛjati tadvai śastramanāyasam //

anarthamarthaṃ manyase rājaputra saṅgranthanaṃ kalahasyātiyāti /
tadvai pravṛttaṃ tu yathākathañcit sṛjedasīnniśitānsāyakāṃśca //
duryodhana uvāca //

dyūte purāṇairvyavahāraḥ praṇīta- statrātyayo nāsti na samprahāraḥ /
tadrocatāṃ śakunervākyamadya sabhāṃ kṣipraṃ tvamihājñāpayasva //

svargadvāraṃ dīvyatāṃ no viśiṣṭaṃ tadvartināṃ cāpi tathaiva yuktam /
bhavedevaṃ hyātmanā tulyameva durodaraṃ pāṇḍavaistvaṃ kuruṣva //
dhṛtarāṣṭra uvāca /

vākyaṃ na me rocate yattvayoktaṃ yatte priyaṃ tatkriyatāṃ narendra /
paścāttapsyase tadupākramya vākyaṃ na hīdṛśaṃ bhāvi vaco hi dharmyam //

dṛṣṭaṃ hyetadvidureṇai sarvaṃ vipaścitā buddhividyānugena /
tadevaitadavaśasyābhyupaiti mahadbhayaṃ kṣatriyajīvaghāti //
vaiśampāyana uvāca //

evamuktvā dhṛtarāṣṭro manīṣī daivaṃ matvā paramaṃ dustaraṃ ca /
śaśāsoccaiḥ puruṣānputravākye sthito rājā daivasammūḍhacetāḥ //

sahasrastambhāṃ hemavaidūryacitrāṃ śatadvārāṃ toraṇasphāṭikāḍhyām /
sabhāmagryāṃ krośamātrāyatāṃ me tadvistārāmāśu kurvantu yuktāḥ //

śrutvā tasya tvaritā nirviśaṅkāḥ prājñā dakṣāstāṃ tadā cakrurāśu /
sarvadravyāṇyupajahruḥ sabhāyāṃ sahasraśaḥ śilpinaścaiva yuktāḥ //

kālenālpenātha niṣṭhāṃ gatāṃ tāṃ sabhāṃ ramyāṃ bahuratnāṃ vicitrām /
citrairhaimairāsanairabhyupetā- mācakhyuste tasya rājñaḥ pratītāḥ //

tato vidvānviduraṃ mantrimukhya- muvācedaṃ dhṛtarāṣṭro narendraḥ /
yudhiṣṭhiraṃ rājaputraṃ ca gatvā madvākyena kṣipramihānayasva //

sabheyaṃ me bahuratnā vicitrā śayyāsanairupapannā mahārhaiḥ /
sā dṛśyatāṃ bhrātṛbhiḥ sārdhametya muhṛddyūtaṃ vartatāmatra ceti //
vaiśampāyana uvāca //

matamājñāya putrasya dhṛtarāṣṭro narādhipaḥ /
matvā ca dustaraṃ daivametadrājaṃścakāra ha //

anyāyena tathoktastu viduro viduṣāṃ varaḥ /
nābhyanandadvaco bhrāturvacanaṃ cedamabravīt //
vidura uvāca //

nābhinande nṛpate praiṣametaṃ maivaṃ kṛthāḥ kulanāśādbibhemi /
putrairbhinnaḥ kalahaste dhruvaṃ syā- detacchaṅke dyūtakṛte narendra //
dhṛtarāṣṭra uvāca /

neha kṣattaḥ kalahastapsyate māṃ na ceddaivaṃ pratilomaṃ bhaviṣyat /
chātrā tu diṣṭasya vaśe kiledaṃ sarvaṃ jagacceṣṭati na svatantram //

tadadya vidura prāpya rājānaṃ mama śāsanāt /
kṣipramānaya durdharṣaṃ kuntīputraṃ yudhiṣṭhiram //