Mahabharata · Chapter 2.81

yasya nāsti nijā prajñā kevalaṃ tu bahuśrutaḥ /
na sa jānāti śāstrārthaṃ darvī sūparasāniva //

jānanvai mohayati māṃ nāvi nauriva saṃyatā /
svārthe kiṃ nāvadhānaṃ te utāho dveṣṭi māṃ bhavān //

na santīme dhārtarāṣṭrā yeṣāṃ tvamanuśāsitā /
bhaviṣyamarthamākhyāsi sarvadā kṛtyamātmanaḥ //

paraneyo'graṇīryasya sa mārgānpratimuhyati /
panthānamanugaccheyuḥ kathaṃ tasya padānugāḥ //

rājanpariṇataprajño vṛddhasevī jitendriyaḥ /
pratipannānsvakāryeṣu sammohayasi no bhṛśam //

lokavṛttādrājavṛttamanyadāha bṛhaspatiḥ /
tasmādrājñā'pramattena svārthaścintyaḥ sadaiva hi //

kṣatriyasya mahārāja jaye vṛttiḥ samāhitā /
sa vai dharmastvadharmo vā svavṛttau kā parīkṣaṇā //

prakālayeddiśaḥ sarvāḥ pratodeneva sārathiḥ /
pratyamitraśriyaṃ dīptāṃ jighṛkṣurbharatarṣabha //

pracchanno vā prakāśo vā yogo yo'riṃ prabādhate /
tadvai śastraṃ śastravidāṃ na śastraṃ chedanaṃ smṛtam //

śatruścaiva hi mitraṃ ca na lekhyaṃ na ca mātṛkā /
yo vai santāpayati yaṃ sa śatruḥ procyate nṛpa //

asantoṣaḥ śriyo mūlaṃ tasmāttaṃ kāmayāmyaham /
samucchraye yo yatate sa rājanparamo nayaḥ //

mamatvaṃ hi na kartavyamaiśvarye vā dhane'pi vā /
pūrvāvāptaṃ harantyanye rājadhramaṃ hi taṃ viduḥ //

adrohasamaṃya kṛtvā ciccheda namuceḥ śiraḥ /
śakraḥ sā'bhimatā tasya ripau vṛttiḥ sanātanī //

dvāvetau grasate bhūmiḥ sarpo bilaśayāniva /
rājānaṃ cāviroddhāraṃ brāhmaṇaṃ cāpravāsinam //

nāsti vai jātitaḥ śatruḥ puruṣasya viśāmpate /
yena sādhāraṇī vṛttiḥ sa śatrurnetaro janaḥ //

śatrupakṣaṃ samṛdhyantaṃ yo mohātsamupekṣate /
vyādhirāpyāyita iva tasya mūlaṃ chinatti saḥ //

alpo'pi hyariratyarthaṃ vardhamānaḥ parākramaiḥ /
valmīko mūlaja iva grasate vṛkṣamantikāt //

ājamīḍha riporlakṣmīrmā te rociṣṭa bhārata /
eṣa bhāraḥ satvavatāṃ na yaḥ śirasi dhiṣṭhitaḥ //

janmavṛddhimivārthānāṃ yo vṛddhimābhikāṅkṣate /
edhate jñātiṣu sa vai sadyo vṛddhirhi vikramaḥ //

nāprāpya pāṇḍavaiśvaryaṃ saṃśayo me bhaviṣyati /
avāpsye vā śriyaṃ tāṃ hi śayiṣye vā hato yudhi //

etādṛśasya kiṃ me'dya jīvitena viśāmpate /
vardhante pāṇḍavā nityaṃ vayaṃ svasthiravṛddhayaḥ //