Mahabharata · Chapter 2.80

tvaṃ vai jyeṣṭho jyaiṣṭhineyaḥ putra mā pāṇḍavāndviṣaḥ /
dveṣā hyasukhamādatte yathaiva nighanaṃ tathā //

avyutpannaṃ samānārthaṃ tulyamitraṃ yudhiṣṭhiram /
adviṣantaṃ kathaṃ dviṣyāttvādṛśo bharatarṣabha //

tulyābhijanavīryaśca kathaṃ bhrātuḥ śriyaṃ nṛpa /
putra kāmayase mohānmaivaṃ bhūḥ śāmya mā śucaḥ //

atha yajñavibhūtiṃ tāṃ kāṅkṣase bharatarṣabha /
ṛtvijastava tanvantu saptatantuṃ mahādhvaram //

āhariṣyanti rājānastavāpi vipulaṃ dhanam /
prītyā ca bahumānācca ratnānyābharaṇāni ca //

anāryācaritaṃ tāta parasvaspṛhaṇaṃ bhṛśam /
svasantuṣṭaḥ svadharmastho yaḥ sa vai sukhamedhate //

mahī kāmadughā sā hi vīrapatnīti cocyate /
tathā vīrasya bhāryā śrīste ime hi kalatravat //

tavāpyasti he cedvīryaṃ bhokṣyase hi mahīmimām //

ayuktamidametattu parasvaharaṇaṃ bhṛśam /
ubhayorlokayorduḥkhaṃ suhṛdāṃ kāṅkṣato'nayam //

avyāpāraḥ parārteṣu nityodyogaḥ svakarmasu /
rakṣaṇaṃ samupāttānāmetadvaibhavalakṣaṇam //

vipattiṣvavyatho dakṣo nityamutthānavānnaraḥ /
apramatto vinītātmā nityaṃ bhadrāṇi paśyati //

bāhūnivaitānmā cchetsīḥ pāṇḍuputrāstathaiva te /
bhrātṛṇāṃ taddhanārthaṃ vai mitradrohaṃ ca mā kuru //

pāṇḍoḥ putrānmā dviṣasveha rājaṃ- stathaiva te bhrātṛdhanaṃ samagram /
mitradrohe tāta mahānagharmaḥ pitāmahā ye tava te'pi teṣām //

antarvedyāṃ dadadvittaṃ kāmānanubhavanpriyān /
krīḍanstrībhirnirātaṅkaḥ praśāmya bharatarṣabha //