Mahabharata · Chapter 2.79

āryāstu ye vai rājānaḥ satyasandhā mahāvratāḥ /
paryāptavidyā vaktāro vedāntāvabhṛthaplutāḥ //

dhṛtimanto hrīniṣevā dharmātmāno nāśasvinaḥ /
mūrdhābhiṣiktāste cainaṃ rājānaḥ paryupāṃsate //

dakṣiṇārthaṃ samānīta rājabhiḥ kāṃsyadohanāḥ /
āraṇyā bahusāhasrā apaśyaṃstatratatra gāḥ //

ājahrastatra satkṛtya svayamudyamya bhārata /
abhiṣekārthamavyagrā bhāṇḍamuccāvacaṃ nṛpāḥ //

bāhlīko rathamāhārṣījjāmbūnadavibhūṣitam /
sudakṣiṇastu yuyuje śvetaiḥ kāmbhojajairhayaiḥ //

sunīthaḥ prītimāṃścaiva hyanukarṣaṃ mahābalaḥ /
dhvajaṃ cedipatiścaivamahārṣītsvayamudyatam //

dākṣiṇātyaḥ sannahanaṃ sraguṣṇīṣe ca māgadhaḥ /
vasudāno maheṣvāso gajendraṃ ṣaṣṭihāyanam //

matsyastvakṣānhemanaddhānekalavya upānahau /
āvantyastvabhiṣekārthamapo bahuvidhāstathā //

cekitāna upāsaṅgaṃ dhanuḥ kāśya upāharat /
asiṃ ca sutsaruṃ śalyaḥ śaikyaṃ kāñcanabhūṣaṇam //

abhyapiñcattato dhaumyo vyāsaśca samuhātapāḥ /
nāradaṃ ca puraskṛtya devalaṃ cāsitaṃ munim //

prītimanta upātiṣṭhannabhiṣekaṃ maharṣayaḥ /
jāmadagnyena sahitāstathānye vedapāragāḥ //

abhijagmarmahātmāno mantravadbhūridakṣiṇam /
mahendramiva devendraṃ divi saptarṣayo yathā //

adhārayacchatramasya sātyakiḥ satyavikramaḥ /
dhanañjayaśca vyajane bhīmasenaśca pāṇḍavaḥ //

cāmare cāpi śuddhe dve yamau jagṛhatustathā /
upāgṛhṇādyamindrāya purākalpe prajāpatiḥ //

tamasmai śaṅkhamāhārṣīdvāruṇaṃ kalaśodadhiḥ /
śaikyaṃ niṣkasahasreṇa sukṛtaṃ viśvakarmaṇā //

tenābhiṣiktaḥ kṛṣṇena tatra me kaśmalo'bhavat /
gacchanti pūrvādaparaṃ samudraṃ cāpi dakṣiṇam //

uttaraṃ tu gacchanti vinā tāta patatrribhiḥ /
tatra sma dadhmuḥ śataśaḥ śaṅkhānmaṅgalakārakān //

prāṇadanta samādhmātāstato romāṇi me'hṛṣan /
prāpatanbhūmipālāśca ye tu hīnāḥ svatejasā //

dhṛṣṭadyumnaḥ pāṇḍavāśca sātyakiḥ keśavo'ṣṭamaḥ /
satvasthā vīryasampannā hyanyonyapriyadarśanāḥ //

visañjñānbhūmipāndṛṣṭvā māṃ ca te prāhasaṃstadā /
tataḥ prahṛṣṭo bībhatsuḥ prādāddhemaviṣāṇinām //

śatānyanaḍuhāṃ pañca dvijamukhyeṣu bhārata /
na rantidevo nābhāgo yauvanāśvo manurna ca //

na ca rājā pṛthurvainyo na cāpyāsīdbhagīrathaḥ /
yayātirnahuṣo vāpi yathā rājā yudhiṣṭhiraḥ //

yathā'timātraṃ kaunteyaḥ śriyā paramayā yutaḥ /
rājasūyamavāpyaivaṃ hariścandra iva prabhuḥ //

etāṃ dṛṣṭā śriyaṃ pārthe hariścandre yathā vibho /
kathaṃ tu jīvitaṃ śreyo mama paśyasi bhārata //

andheneva yugaṃ naddhaṃ viparyastaṃ narādhipa /
kanīyāṃso vivardhante jyeṣṭhā hīyanta eva ca //

evaṃ dṛṣṭvā nābhivindāmi śarma samīkṣamāṇo'pi kurupravīra /
tenāhamevaṃ kṛśatāṃ gataśca vivarṇatāṃ caiva saśokatāṃ ca //