Mahabharata · Chapter 2.75

duryodhana na te'marṣaḥ kāryaḥ prati yudhiṣṭhiram /
bhāgadheyāni hi svāni pāṇḍavā bhuñjate sadā //

vidhānaṃ vividhākāraṃ paraṃ teṣāṃ vidhānataḥ /
anekairabhyupāyaiśca tvayā na śakitāḥ purā //

ārabdhā hi mahārāja punaḥ punararindama / vimuktāśca naravyāghrā bhagadheyapuraskṛtāḥ /
utsāhavantaḥ puruṣā nāvasīdanti karmasu //

tairlabdhā draupadī bhāryā drupadaśca sutaiḥ saha /
sahāyāḥ pṛthivīpālā vāsudevaśca vīryavān //

labdhaścānabhibhūtārthaiḥ pitryoṃśaḥ pṛthivīpate /
vivṛddhastejasā teṣāṃ tatra kā paridevanā //

dhanañjayena gāṇḍīvamakṣayyau ca maheṣudhī /
labdhānyastrāṇi divyāni toṣayitvā hutāśanam //

tena kārmukamukhyena bāhuvīryeṇa cātmanaḥ /
kṛtā vaśe mahīpālāstatra kā paridevanā //

agnidāhānmayaṃ cāpi mokṣayitvā sa dānavam /
sabhāṃ tāṃ kārayāmāsa savyasācī parantapaḥ //

tena caiva mayenoktāḥ kiṅkarā nāma rākṣasāḥ /
vahanti tāṃ sabhāṃ bhīmāstatra kā paridevanā //

yaccāsahāyatāṃ rājannuktavānasi bhārata /
tanmithyā bhrātaro hīme tava sarve vaśānugāḥ //

droṇastava maheṣvāsaḥ saha putreṇa vīryavān /
mūtaputraśca rādheyo dṛḍhadhanvā mahārathaḥ //

sa ekaḥ samare sarvānpāṇḍavānsahasomakān /
vijeṣyati mahābāho kiṃ sahāyaiḥ kariṣyasi //

bhīṣmaśca puruṣavyāghro gautamaśca mahārathaḥ /
jayadrathaśca balāvānsomadattastathaiva ca //

ahaṃ ca saha sodaryaiḥ saumadattiśca pārthivaḥ /
etaistvaṃ sahitaḥ sarvairjaya kṛtsnaṃ vasundarām //
duryodhana uvāca /

tvayā ca sahito rājannetaiścānyairmahārathaiḥ /
etānahaṃ vijeṣyāmi yadi tvamanumanyase //

eteṣu vijiteṣvadya bhaviṣyati mahī mama /
sarve ca pṛthivīpālāḥ sabhā sā ca mahādhanā //
śakuniruvāca //

dhanañjayo vāsudevo bhīmaseno yudhiṣṭhiraḥ /
nakulaḥ sahadevaśca drupadaśca sahātmajaiḥ //

naite yudhi parājetuṃ śakyā devagaṇairapi /
mahārathā maheṣvāsāḥ kṛtāstrā yuddhadurmadāḥ //

ahaṃ tu tadvijānāmi vijetuṃ yena śakyate /
yudhiṣṭhiraṃ svayaṃ rājaṃstannibodha juṣasva ca //
duryodhana uvāca //

apramādena suhṛdāmanyeṣāṃ ca mahātmanām /
yadi śakyā vijetuṃ te tanmamācakṣva mātula //
śakuniruvāca /

dyūtapriyaśca kaunteyo na sa jānāti devitum /
samāhūtaśca rājendro na śakṣyati tivartitum //

devane kuśalaścāhaṃ na me'sti sadṛśo bhuvi /
triṣu lokeṣu kauravya taṃ tvaṃ dyūte samāhvaya //

tasyākṣakuśalo rājannādāsye'hamasaṃśayam /
rājyaṃ śriyaṃ ca tāṃ dīptāṃ tvadarthaṃ puruṣarṣabha //

idaṃ tu sarvaṃ tvaṃ rājñe duryodhana nivedaya /
anujñātastu te pitrā vijeṣye tānna saṃśayaḥ //
duryodhana uvāca /

tvameva karumukhyāya dhṛtarāṣṭrāya saubala /
nivedaya yathānyāyaṃ nāhaṃ śakṣye niveditum //