મહાભારત · અધ્યાય 2.75

દુર્યોધન ન તેઽમર્ષઃ કાર્યઃ પ્રતિ યુધિષ્ઠિરમ્ ।
ભાગધેયાનિ હિ સ્વાનિ પાણ્ડવા ભુઞ્જતે સદા ॥

વિધાનં વિવિધાકારં પરં તેષાં વિધાનતઃ ।
અનેકૈરભ્યુપાયૈશ્ચ ત્વયા ન શકિતાઃ પુરા ॥

આરબ્ધા હિ મહારાજ પુનઃ પુનરરિન્દમ । વિમુક્તાશ્ચ નરવ્યાઘ્રા ભગધેયપુરસ્કૃતાઃ ।
ઉત્સાહવન્તઃ પુરુષા નાવસીદન્તિ કર્મસુ ॥

તૈર્લબ્ધા દ્રૌપદી ભાર્યા દ્રુપદશ્ચ સુતૈઃ સહ ।
સહાયાઃ પૃથિવીપાલા વાસુદેવશ્ચ વીર્યવાન્ ॥

લબ્ધશ્ચાનભિભૂતાર્થૈઃ પિત્ર્યોંશઃ પૃથિવીપતે ।
વિવૃદ્ધસ્તેજસા તેષાં તત્ર કા પરિદેવના ॥

ધનઞ્જયેન ગાણ્ડીવમક્ષય્યૌ ચ મહેષુધી ।
લબ્ધાન્યસ્ત્રાણિ દિવ્યાનિ તોષયિત્વા હુતાશનમ્ ॥

તેન કાર્મુકમુખ્યેન બાહુવીર્યેણ ચાત્મનઃ ।
કૃતા વશે મહીપાલાસ્તત્ર કા પરિદેવના ॥

અગ્નિદાહાન્મયં ચાપિ મોક્ષયિત્વા સ દાનવમ્ ।
સભાં તાં કારયામાસ સવ્યસાચી પરન્તપઃ ॥

તેન ચૈવ મયેનોક્તાઃ કિઙ્કરા નામ રાક્ષસાઃ ।
વહન્તિ તાં સભાં ભીમાસ્તત્ર કા પરિદેવના ॥

યચ્ચાસહાયતાં રાજન્નુક્તવાનસિ ભારત ।
તન્મિથ્યા ભ્રાતરો હીમે તવ સર્વે વશાનુગાઃ ॥

દ્રોણસ્તવ મહેષ્વાસઃ સહ પુત્રેણ વીર્યવાન્ ।
મૂતપુત્રશ્ચ રાધેયો દૃઢધન્વા મહારથઃ ॥

સ એકઃ સમરે સર્વાન્પાણ્ડવાન્સહસોમકાન્ ।
વિજેષ્યતિ મહાબાહો કિં સહાયૈઃ કરિષ્યસિ ॥

ભીષ્મશ્ચ પુરુષવ્યાઘ્રો ગૌતમશ્ચ મહારથઃ ।
જયદ્રથશ્ચ બલાવાન્સોમદત્તસ્તથૈવ ચ ॥

અહં ચ સહ સોદર્યૈઃ સૌમદત્તિશ્ચ પાર્થિવઃ ।
એતૈસ્ત્વં સહિતઃ સર્વૈર્જય કૃત્સ્નં વસુન્દરામ્ ॥
દુર્યોધન ઉવાચ ।

ત્વયા ચ સહિતો રાજન્નેતૈશ્ચાન્યૈર્મહારથૈઃ ।
એતાનહં વિજેષ્યામિ યદિ ત્વમનુમન્યસે ॥

એતેષુ વિજિતેષ્વદ્ય ભવિષ્યતિ મહી મમ ।
સર્વે ચ પૃથિવીપાલાઃ સભા સા ચ મહાધના ॥
શકુનિરુવાચ ॥

ધનઞ્જયો વાસુદેવો ભીમસેનો યુધિષ્ઠિરઃ ।
નકુલઃ સહદેવશ્ચ દ્રુપદશ્ચ સહાત્મજૈઃ ॥

નૈતે યુધિ પરાજેતું શક્યા દેવગણૈરપિ ।
મહારથા મહેષ્વાસાઃ કૃતાસ્ત્રા યુદ્ધદુર્મદાઃ ॥

અહં તુ તદ્વિજાનામિ વિજેતું યેન શક્યતે ।
યુધિષ્ઠિરં સ્વયં રાજંસ્તન્નિબોધ જુષસ્વ ચ ॥
દુર્યોધન ઉવાચ ॥

અપ્રમાદેન સુહૃદામન્યેષાં ચ મહાત્મનામ્ ।
યદિ શક્યા વિજેતું તે તન્મમાચક્ષ્વ માતુલ ॥
શકુનિરુવાચ ।

દ્યૂતપ્રિયશ્ચ કૌન્તેયો ન સ જાનાતિ દેવિતુમ્ ।
સમાહૂતશ્ચ રાજેન્દ્રો ન શક્ષ્યતિ તિવર્તિતુમ્ ॥

દેવને કુશલશ્ચાહં ન મેઽસ્તિ સદૃશો ભુવિ ।
ત્રિષુ લોકેષુ કૌરવ્ય તં ત્વં દ્યૂતે સમાહ્વય ॥

તસ્યાક્ષકુશલો રાજન્નાદાસ્યેઽહમસંશયમ્ ।
રાજ્યં શ્રિયં ચ તાં દીપ્તાં ત્વદર્થં પુરુષર્ષભ ॥

ઇદં તુ સર્વં ત્વં રાજ્ઞે દુર્યોધન નિવેદય ।
અનુજ્ઞાતસ્તુ તે પિત્રા વિજેષ્યે તાન્ન સંશયઃ ॥
દુર્યોધન ઉવાચ ।

ત્વમેવ કરુમુખ્યાય ધૃતરાષ્ટ્રાય સૌબલ ।
નિવેદય યથાન્યાયં નાહં શક્ષ્યે નિવેદિતુમ્ ॥