Mahabharata · Chapter 2.68

vacaḥ śrutvaiva bhīṣmasya cedirāḍuruvikramaḥ /
yuyutsurvāsudevena vāsudevamuvāca ha //

āhvaye tvāṃ raṇaṃ gaccha mayā sārdhaṃ janārdana /
yāvadadya nihanmi tvāṃ sahitaṃ sarvapāṇḍavaiḥ //

saha tvayā hi me vadhyāḥ sarvathā kṛṣṇa pāṇḍavāḥ /
nṛpatīnsamatikramya yairarājā tvamarcitaḥ //

ye tvāṃ dāsamarājānaṃ bālyādarcanti durmatim /
anarhamarhavatkṛṣṇa vadhyāsta iti me matiḥ //

ityuktvā rājaśārdūla śārdūla iva nādayan /
paśyatāṃ sarvabhūtānāṃ śiśupālaḥ pratāpavān //

sa raṇāyaiva saṅkruddhaḥ sannaddhaḥ sarvarājabhiḥ /
sunīthaḥ prayayau kṣipraṃ pārthayajñajighāṃsayā //

tataścakragadāpāṇiḥ keśavaḥ keśihā hariḥ / sadhvajaṃ rathamāsthāya dārukeṇa susatkṛtam /
bhīṣmeṇa dattahasto'sāvāruhoha rathottamam //

tena pāpasvabhāvena kopitānsarvapārthivān /
āsasāda raṇe kṛṣṇaḥ sajjitaikarathaḥ sthitaḥ //

tataḥ puṣkarapatrākṣaṃ tārkṣyadhvajarathe sthitam /
divākaramivodyantaṃ dadṛśuḥ sarvapārthivāḥ //

āropayantaṃ jyāṃ kṛṣṇaṃ pratapantamivaujasā /
sthitaṃ puṣparathe divye puṣpaketumivāparam //

dṛṣṭvā kṛṣṇaṃ tathā yāntaṃ pratapantamivaujasā /
yathārhaṃ keśave vṛttimavaśāḥ pratipedire //

tānuvāca mahābāhurmahā'suranibarhaṇaḥ /
vṛṣṇivīrastadā rājansāntvayanparavīrahā //
śrībhagavānuvāca //

apeta sabalāḥ sarva āsvastā mama śāsanāt /
mā dṛṣṭo dūṣayetpāpa eṣa vaḥ sarvapārthipāḥ //

eṣa naḥ śatruratyantameṣa vṛṣṇivimardanaḥ /
sātvatāṃ sātvatīputro vairaṃ carati śāśvatam //

prāgjyotiṣapuraṃ yātānasmāñjñātvā nṛśaṃsakṛt /
adahaddvārakāmeṣa svastrīyaḥ sannarādhipāḥ //

krīḍato bhojarājasya eva raivatake girau /
hatvā badhvā ca tānsārvānupāyātsvapuraṃ purā //

aśvamedhe hayaṃ medhyamutsṛṣṭaṃ rakṣibhirvṛtam /
piturme yajñavighnārthamaharatpāpaniścayaḥ //

sauvīrānpratiyātāṃ ca babhroreṣa tapasvinaḥ /
bhāryāmabhyaharanmohādakāmāṃ tāmito gatām //

eṣa māyāpraticchannaḥ kārūśārthe tapasvinīm /
jahāra bhadrāṃ vaiśālīṃ mātulasya nṛśaṃsakṛt //

vṛṣṇidārānvilāpyaiva hatvā ca kukurāndhakān /
pāpābuddhirupātiṣṭhatsa praviśya sasambhramam //

viśālarājño duhitāṃ mama pitrā vṛtāṃ satīm /
anena kṛtvā sandhānaṃ karūśena jigīṣayā //

jarāsandhaṃ samāśritya kṛtavānvipriyāṇi me /
tāni sarvāṇi saṅkhyātuṃ na śaknomi narādhipāḥ //

evametadaparyantameṣa vṛṣṇiṣu kilbiṣī /
asmākamayamārambhāṃścakāra parabhānṛjuḥ //

śataṃ kṣantavyamasmābhirvadhārhāṇāṃ kilāgasām /
baddho'smi samayairghorairmāturasyaiva saṅgare //

tattathā śatamasmākaṃ kṣāntaṃ kṣayakaraṃ mayā /
dvau tu me vadhakāle'sminna kṣantavyau kathañcana //

yajñavighnakaraṃ hanyāṃ pāṇḍavānāṃ ca durhṛdam /
iti me vartate bhāvastamatīyāṃ kathaṃ nvaham //

pitṛṣvasuḥ kṛte duḥkhaṃ sumahanmarṣayāmyaham /
diṣṭyā hīdaṃ sarvarājñāṃ sannidhāvadya vartate //

paśyanti hi bhavanto'dya mayyatīva vyatikramam /
kṛtāni tu parokṣaṃ me yāni tāni nibodhata //

imaṃ tvasya na śakṣyāmi kṣantumadya vyatikramam /
avalepādvadhārhasya samagre rājamaṇḍale //

rukmiṇyāmasya mūḍhasya prārthanā'sīnmumūrṣataḥ /
na ca tāṃ prāptavānmūḍhaḥ śūdro vedaśrutīmiva //
vaiśampāyana uvāca //

evamādi tataḥ sarve sahitāste narādhipāḥ /
garhaṇaṃ śiśupālasya vāsudevena viśrutaḥ //

vāsudevavacaḥ śrutvā cedirājaṃ vyagarhayan /
rathopasthe dhanuṣmantaṃ śarānsandadhataṃ ruṣā //

śrutvā'pi ca vilokyāśu dudruvuḥ sarvapārthivāḥ /
vihāya paramodvignāścedirājaṃ camūmukhe //

tasya tadvacanaṃ śrutvā śiśupālaḥ pratāpavān /
jahāsa svanavaddhāsaṃ vākyaṃ cedamuvāca ha //

matpūrvāṃ rukmiṇīṃ kṛṣṇa saṃsatsu parikīrtayan /
viśeṣataḥ pārthiveṣu vrīḍāṃ na kuruṣe katham //

manyamāno hi kaḥ satsu puruṣaḥ parikīrtayet /
anyapūrvā striyaṃ jātu tvadanyo madhūsūdana //

kṣamā vā yadi te śraddhā mā vā kṛṣṇa mama kṣama /
kruddhādvāpi prasannādvā kiṃ me tvatto bhaviṣyate //
vaiśampāyana uvāca //

sa tāṃstu vidrutānsarvānsāśvapattirathadvipān /
kṛṣṇatejohatānsarvānsamīkṣya vasudhādhipān //

śiśupālo rathenaikaḥ pratyupāyātsa keśavam /
ruṣā tāmrekṣaṇo rājañchalabhaḥ pāvakaṃ yathā //