Mahabharata · Chapter 2.66

cedirājakule jātakhyakṣa eṣa caturbhujaḥ /
rāsabhārāvasadṛśaṃ rarāsa ca nanāda ca //

tenāsya mātāpitarau tresatustau sabāndhavau /
vaikṛtaṃ tasyata tau dṛṣṭvā tyāgāyākurutāṃ matim //

tataḥ sabhāryaṃ nṛpatiṃ sāmātyaṃ sapurohitam /
cintāsammūḍhahṛdayaṃ vāguvācāśarīreṇī //

eṣa te nṛpate putraḥ śrīmāñjāto balādhikaḥ /
tasmādasmānna bhetavyamavyagraḥ pāhi vai śiśum //

na ca vai tasya mṛtyustvaṃ na kālaḥ pratyupasthitaḥ /
yaśca śastreṇa hantā'sya sa cotpanno narādhipa //

saṃśrutyodāhṛtaṃ vākyaṃ bhūtamantarhitaṃ tataḥ /
putrasnehābhisantaptā jananī vākyamabravīt //

yenedamīritaṃ vākyaṃ mamaitaṃ tanayaṃ prati /
prāñjalistaṃ namasyāmi bravītu sa punarvacaḥ //

yāthātathyena bhagavāndevo vā yadi vetaraḥ /
śrotumicchāmi putrasya ko'sya mṛtyurbhaviṣyati //

antarbhūtaṃ tato bhūtamuvācedaṃ punarvacaḥ /
yasyotsaṅge gṛhītasya bhujāvabhyadhikāvubhau //

patiṣyataḥ kṣititale pañcaśīrṣāvivoragau /
tṛtīyametadbālasya lalāṭasthaṃ tu locanam //

nimajjiṣyati yaṃ dṛṣṭvā so'sya mṛtyurbhaviṣyati /
tryakṣaṃ caturbhujaṃ śrutvā tathā ca samudāhṛtam //

pṛthivyāṃ pārthivāḥ sarve abhyāgacchandidṛkṣavaḥ /
tānpūjayitvā samprāptānyathārhaṃ sa mahīpatiḥ //

ekaikasya nṛpasyāṅke putramāropayattadā /
evaṃ rājasahasrāṇā pṛthaktvena yathākramam //

śiśuraṅke samārūḍho na tatprāya nidarśanam /
etadeva tu saṃśrutya dvāravatyāṃ mahābalau //

tataścedipuraṃ prāptau saṅkarṣaṇajanārdanau /
yādavau yādavīṃ druṣṭuṃ svasāraṃ tau pitustadā //

abhivādya yathānyāyaṃ yathāśreṣṭhaṃ nṛpaṃ ca tām /
kuśalānāmayaṃ pṛṣṭvā niṣaṇṇau rāmakeśavau //

sā'bhyarcya tau tadā vīrau prītyā cābhyadhikaṃ tataḥ /
putraṃ dāmodarotsaṅge devī sannyadadhātsvayam //

nyastamātrasya tasyāṅke bhujāvabhyadhikāvubhau /
petatustacca nayanaṃ nyamajjata lalāṭajam //

taddṛṣṭvā vyathitā trastā varaṃ kṛṣṇamayācata /
dadasva me varaṃ kṛṣṇa bhayārtāyā mahābhuja //

tvaṃ hyārtānāṃ samāśvāso bhītānāmabhayapradaḥ /
evamuktastataḥ kṛṣṇaḥ so'bravīdyadunandanaḥ //

mā bhaistvaṃ devi dharmajñe na matto'sti bhayaṃ tava /
dadāmi kaṃ varaṃ kiṃ ca karavāṇi pitṛṣvasaḥ //

śakyaṃ vā yadi vā'śakyaṃ kariṣyāṇi vacastava /
evamuktā tataḥ kṛṣṇamabravīdyadunandanam //

śiśupālasyāparādhānkṣamethāstvaṃ mahābala /
matkṛte yaduśārdūla viddhyenaṃ me varaṃ prabho //
kṛṣṇa uvāca /

aparādhaśataṃ kṣāmyaṃ mayā hyasya pitṛṣvasaḥ /
putrasya te vadhārhasya mā tvaṃ śoke manaḥ kṛthāḥ //
bhīṣma uvāca /

sa jānannātmano mṛtyuṃ kṛṣṇaṃ yadusukhāvaham / evameṣa nṛpaḥ pāpaḥ śiśupāḥ sumandadhīḥ /
tvāṃ samāhvayate vīra govindavaradarpitaḥ //