Mahabharata · Chapter 2.65

sa me bahumato rājā jarāsandho mahābalaḥ /
yo'nena yuddhaṃ neyeṣa dākṣo'yamiti saṃyuge //

keśavena kṛtaṃ karma jarāsandhavadhe tadā /
bhīmasenārjunābhyāṃ ca kastatsādhviti manyate //

udvāreṇa praviṣṭena chadmanā brahmavādinā /
dṛṣṭaḥ prabhāvaḥ kṛṣṇena jarāsandhasya bhūpateḥ //

yena dharmātmanā'tmānaṃ brahmaṇyamabhijānatā /
preṣitaṃ pādyamasmai taddātumagre dūrātmane //

bhujyatāmiti tenoktāḥ kṛṣṇabīmadhanañjayāṭaḥ /
jarāsandhena kauravya kṛṣṇena vikṛtaṃ kṛtam //

yadyayaṃ jagataḥ kartā yathainaṃ mūrkha manyase /
kasmānna brāhmaṇaṃ samyagātmānamavagacchati //

idaṃ tvāścaryabhūtaṃ me yadibhe pāṇḍavāstvayā /
apakṛṣṭāḥ satāṃ mārgānmanyante tacca sādhviti //

athavā naitadāścaryaṃ yeṣāṃ tvamasi bhārata /
strīsadharmā ca vṛddhaśca sarvārthānāṃ pradarśakaḥ //
vaiśampāyana uvāca //

tasya tadvacanaṃ śrutvā rūkṣaṃ rūkṣākṣaraṃ bahu /
cakopa balināṃ śreṣṭho bhīmasenaḥ pratāpavān //

tathā padmapratīkāśe svabhāvāyatavistṛte /
bhūyaḥ krodhābhitāmrākṣe rakte netre babhūvatuḥ //

triśikhāṃ bhrakuṭīṃ cāsya dadṛśuḥ sarvapārthivāḥ /
lalāṭasthāṃ trikūṭasthāṃ gaṅgāṃ tripathagāmiva //

dantānsandaśatastasya kopāddadṛśurānanam /
yugānte sarvabhūtāni kālasyeva jighatsataḥ //

utpatantaṃ tu vegena jagrāhainaṃ manasvin /
bhīṣma eva mahābāhurmahāsenamiveśvaraḥ //

tasva bhīmasya bhīṣmeṇa vāryamāṇasya bhārata /
guruṇā vividhairvākyaiḥ krodhaḥ praśamamāgataḥ //

nāticakrāma bhīṣmasya sa hi vākyamarindamaḥ /
samudvṛtto ghanāpāye velāmiva mahodadhiḥ //

śiśupālastu saṅkruddhe bhīmasene janādhipa /
nākampata tadā vīraḥ pauruṣe vyavasthitaḥ //

utpatantaṃ tu vegena punaḥ punararindamaḥ /
na sa taṃ cintayāmāsa siṃhaḥ kruddho mṛgaṃ yathā //

prahasaṃścābravīdvākyaṃ cedirājaḥ pratāpavān /
bhīmasenamabhikruddhaṃ dṛṣṭvā bhīmaparākramam //

muñcainaṃ bhīṣma paśyantu yāvadenaṃ narādhipaḥ /
matprabhāvavinirdagdhaṃ pataṅgamiva vahninā //

tataścedipatervākyaṃ śrutvā tatkurusattamaḥ /
bhīmasenamuvācedaṃ bhīṣme matimatāṃ varaḥ //

naiṣā cedipaterbuddhiryattvāmāhvayate'cyutam /
bhīmasena mahābāho kṛṣṇasyaiva viniścayaḥ //