Mahabharata · Chapter 2.63

tataḥ sāgarasaṅkāśaṃ dṛṣṭvā nṛpatimaṇḍalam / saṃvartavātābhihataṃ bhīmaṃ kṣubdhamivārṇavam /

roṣātpracalitaṃ sarvamidamāha yudhiṣṭhiraḥ / bhīṣmaṃ matimatāṃ mukhyaṃ vṛddhaṃ kurupitāmaham /
bṛhaspatiṃ bṛhattejāḥ puruhūta ivārihā /

asau roṣātpracalito mahānnṛpatisāgaraḥ /
atra yatpratipattavyaṃ tanme brūhi pitāmaha //

yajñasya ca na vighnaḥ syātprajānāṃ ca hitaṃ bhavet /
yathā sarvatra tatsarvaṃ brūhi me'dya pitāmaha //

ityuktavati dharmajñe dharmarāje yudhiṣṭhire /
uvācedaṃ vaco bhīṣmastataḥ kurupitāmahaḥ //

mā bhaistvaṃ kuruśārdūla śvā siṃhaṃ hantumarhati /
śivaḥ panthāḥ sunīto'tra mayā pūrvataraṃ vṛtaḥ //

prasupte hi yathā siṃhe śvānastāta samāgatāḥ /
bhaṣeyuḥ sahitāḥ sarve tatheme vasudhādhipāḥ //

vṛṣṇisiṃhasya suptasya tathā'mī pramuke sthitāḥ /
bhaṣante tāta saṅkruddhāḥ śvānaḥ siṃhasya sannidhau //

na hi sambudhyate yāvatsuptaḥ siṃha ivācyutaḥ / tadidaṃ jñātapūrvaṃ hi tava saṃstotumicchasi /
tena siṃhīkarotyetānasiṃhaścedipuṅgavaḥ //

pārthivānpārthivaśreṣṭha śiśupālo'lpacetanaḥ /
sarvānsarvātmanā tāta netukāmo yamakṣayam //

nūnametatsamādātuṃ punaricchatyadhokṣajaḥ /
yadasya śiśupālasya tejastiṣṭhati bhārata //

viplutā cāsya bhadraṃ te buddhirbuddhimatāṃ vara /
cedirājasya kaunteya sarveṣāṃ ca mahīkṣitam //

ādātuṃ ca naravyāghro yaṃ yamicchatyayaṃ tadā /
tasya viplavate buddhirevaṃ cedipateryathā //

caturvidhānāṃ bhūtānāṃ triṣu lokeṣu mādhavaḥ /
prabhavaścaiva sarveṣāṃ nidhanaṃ ca yudhiṣṭhira //
vaiśampāyana uvāca /

iti tasya vacaḥ śrutvā tataścedipatirnṛpaḥ /
bhīṣmaṃ rūkṣākṣarā vācaḥ śrāvayāmāsa bhārata //