મહાભારત · અધ્યાય 2.63

તતઃ સાગરસઙ્કાશં દૃષ્ટ્વા નૃપતિમણ્ડલમ્ । સંવર્તવાતાભિહતં ભીમં ક્ષુબ્ધમિવાર્ણવમ્ ।

રોષાત્પ્રચલિતં સર્વમિદમાહ યુધિષ્ઠિરઃ । ભીષ્મં મતિમતાં મુખ્યં વૃદ્ધં કુરુપિતામહમ્ ।
બૃહસ્પતિં બૃહત્તેજાઃ પુરુહૂત ઇવારિહા ।

અસૌ રોષાત્પ્રચલિતો મહાન્નૃપતિસાગરઃ ।
અત્ર યત્પ્રતિપત્તવ્યં તન્મે બ્રૂહિ પિતામહ ॥

યજ્ઞસ્ય ચ ન વિઘ્નઃ સ્યાત્પ્રજાનાં ચ હિતં ભવેત્ ।
યથા સર્વત્ર તત્સર્વં બ્રૂહિ મેઽદ્ય પિતામહ ॥

ઇત્યુક્તવતિ ધર્મજ્ઞે ધર્મરાજે યુધિષ્ઠિરે ।
ઉવાચેદં વચો ભીષ્મસ્તતઃ કુરુપિતામહઃ ॥

મા ભૈસ્ત્વં કુરુશાર્દૂલ શ્વા સિંહં હન્તુમર્હતિ ।
શિવઃ પન્થાઃ સુનીતોઽત્ર મયા પૂર્વતરં વૃતઃ ॥

પ્રસુપ્તે હિ યથા સિંહે શ્વાનસ્તાત સમાગતાઃ ।
ભષેયુઃ સહિતાઃ સર્વે તથેમે વસુધાધિપાઃ ॥

વૃષ્ણિસિંહસ્ય સુપ્તસ્ય તથાઽમી પ્રમુકે સ્થિતાઃ ।
ભષન્તે તાત સઙ્ક્રુદ્ધાઃ શ્વાનઃ સિંહસ્ય સન્નિધૌ ॥

ન હિ સમ્બુધ્યતે યાવત્સુપ્તઃ સિંહ ઇવાચ્યુતઃ । તદિદં જ્ઞાતપૂર્વં હિ તવ સંસ્તોતુમિચ્છસિ ।
તેન સિંહીકરોત્યેતાનસિંહશ્ચેદિપુઙ્ગવઃ ॥

પાર્થિવાન્પાર્થિવશ્રેષ્ઠ શિશુપાલોઽલ્પચેતનઃ ।
સર્વાન્સર્વાત્મના તાત નેતુકામો યમક્ષયમ્ ॥

નૂનમેતત્સમાદાતું પુનરિચ્છત્યધોક્ષજઃ ।
યદસ્ય શિશુપાલસ્ય તેજસ્તિષ્ઠતિ ભારત ॥

વિપ્લુતા ચાસ્ય ભદ્રં તે બુદ્ધિર્બુદ્ધિમતાં વર ।
ચેદિરાજસ્ય કૌન્તેય સર્વેષાં ચ મહીક્ષિતમ્ ॥

આદાતું ચ નરવ્યાઘ્રો યં યમિચ્છત્યયં તદા ।
તસ્ય વિપ્લવતે બુદ્ધિરેવં ચેદિપતેર્યથા ॥

ચતુર્વિધાનાં ભૂતાનાં ત્રિષુ લોકેષુ માધવઃ ।
પ્રભવશ્ચૈવ સર્વેષાં નિધનં ચ યુધિષ્ઠિર ॥
વૈશમ્પાયન ઉવાચ ।

ઇતિ તસ્ય વચઃ શ્રુત્વા તતશ્ચેદિપતિર્નૃપઃ ।
ભીષ્મં રૂક્ષાક્ષરા વાચઃ શ્રાવયામાસ ભારત ॥