Mahabharata · Chapter 2.61

sūditā dvārapālāśca niśumbhanarakau hatau /
kṛtakṣemaḥ punaḥ panthāḥ puraṃ prāgjyotiṣaṃ prati //

śauriṇā pṛthivīpālāstrāsitā bharatarṣabha /
dhanuṣaśca praṇādena pāñcajanyasvanena ca //

meghaprakhyairanekaiśca dākṣiṇātyābhisaṃvṛtam /
rukmiṇaṃ trāsayāmāsa keśavo bharatarṣabha //

tataḥ parjanyaghoṣeṇa rathenādityavarcasā /
uvāha mahiṣīṃ bhojyāmeṣa cakragadādharaḥ //

jārūthya āhṛtakrodhaḥ śiśupālaśca nirjitaḥ /
vakraśca sa hataḥ saṅkhye śatadhanvā ca kṣatriyaḥ //

indradyumno hataḥ kopādyavanaśca kaśerukaḥ /
hataḥ saubhapatiścaiva sālvaśca kṛtadhanvanā //

parvatānāṃ sahasraṃ ca cakreṇa puruṣottamaḥ /
vibhajya puṇḍarīkākṣo dyumatsenamapothayat //

mahendraśikhare caiva nimeṣāntaracāriṇau /
jagrāha bharataśreṣṭha vānarāvabhitaścarau //

irāvatyāṃ mahābhojo vahnisūryasamo bale /
gopatistālaketuśca nihatau śārṅgadhanvanā //

akṣaprapattane rājannavahelanatatparau /
ubhau tāvapi kṛṣṇena svarāṣṭre vinipātitau //

dagdhā vārāṇasī tāta keśavena mahātmanā /
pāṇḍyaṃ pauṇḍraṃ ca mātsyaṃ ca kaliṅgaṃ ca janārdanaḥ //

jaghāna sahitānsarvānaṅgarājaṃ ca mādhavaḥ //

eṣa caiva śataṃ hatvā rathena kṣatrapuṅgavān /
gāndhārīmavahatkṛṣṇo mahiṣīṃ yādavarṣabhaḥ //

atha gāṇḍīvadhanvānaṃ krīḍārthaṃ madhusūdanaḥ /
jigāya bharataśreṣṭha kuntyāśca pramukhe vibhuḥ //

drauṇiṃ kṛpaṃ ca karṇaṃ ca bhīmasenaṃ suyodhanam /
yuddhāya sahitāntrājañjigāya bharatarṣabha //

babhrośca priyamanvicchanneṣa cakragadādharaḥ /
veṇudārivṛtāṃ bhāryāṃ pramamātha yudhiṣṭhira //

paryāptāṃ pṛthivīṃ sarvāṃ sāśvāṃ sarathakuñjarām /
veṇudārivaśe yuktāṃ jigāya madhusūdanaḥ //

avāpya tapasā vīryaṃ balamojaśca bhārata /
trāsitāḥ sagaṇāḥ sarve bāṇena vibudhādhipāḥ //

vajrāśanigadābāmaistāḍayadbhiranekaśaḥ /
tasya nāsīdraṇe mṛtyurdevairapi savāsavaiḥ //

so'bhibhūtaśca kṛṣṇena na hataśca magātmanā /
chitvā bāhusahasraṃ tu govindena mahātmanā //

eṣo'pīḍanmahābāhuḥ kaṃsaṃ ca madhusūdanaḥ / avāptaṃ tapasā vīryaṃ balamojaśca bhārata /
kaiṭabhaṃ cātilomāni nijaghāna janārdanaḥ //

jambumairāvataṃ caiva virūpaṃ ca mahāyaśāḥ / 2-61-22bjaghāna bharataśreṣṭha śambaraṃ cārimardanam //

eṣa bhogavatīṃ gatvā vāsukiṃ bharatarṣabha /
nirjitya puṇḍarīkākṣo raukmiṇeyamamocayat //

evaṃ bahūni karmāṇi śiśureva janārdanaḥ /
kṛtavānpuṇḍarīkākṣaḥ saṅkarṣaṇasahāyavān //

evameṣo'surāṇāṃ casurāṇāmapi sarvaśaḥ /
bhayāmayakaraḥ kṛṣṇaḥ sarvalokeśvaraḥ prabhuḥ //

evameva mahābāhuḥ śāstā sarvadurātmanām /
kṛtvā devārthamamitaṃ svasthānaṃ prāpsyate punaḥ //

eṣa bhogavatīṃ puṇyāṃ ravikāntiṃ mahāyaśāḥ /
dvārakāmātmasātkṛtvā sāgaraṃ plāvayiṣyati //

surāsuramanuṣyeṣu nābhūnna bhavitā kvacit /
yastāmadhyavasadrājā nānyatra madhusūdanāt //

bhrājamānāstu vai sarve vṛṣṇyandhakamahārathāḥ /
tejiṣṭhaṃ pratipatsyante nākapṛṣṭaṃ gatāsavaḥ //

evameva daśārhāṇāṃ vidhāya vidhinā vidhim /
viṣṇurnārāyaṇaḥ sākṣātsvasthānaṃ prāpsyate dhruvam //

aprameyo'niyojyaśca yatra kāmagamo vaśī / 2-61-32ab modate bhagavānprīto vālaḥ krīḍānakairiva //

naiṣa garbhatvamāpede na yonyāmāvasatprabhuḥ /
ātmanastejasā kṛṣṇaḥ sarveṣāṃ kurute gatim //

yathā budbuda utthāya tatraiva pravilīyate /
carācarāṇi bhūtāni tathā nārāyaṇe sadā //

na pramātuṃ mahābāhuḥ śakyo bhārata keśavaḥ /
paraṃ hi paratastasmādviśvarūpānna vidyate //