Mahabharata · Chapter 2.60

dvārakāyāṃ tataḥ kṛṣṇaḥ svadāreṣu divāniśam /
sukhaṃ labdhvā mahārāja pramumoda mahāyaśāḥ //

pautrasya kāraṇāccakre vibudhānāṃ priyaṃ tadā /
sāvasavaiḥ suraiḥ sarvairduṣkaraṃ bharatarṣabha //

bāṇo nāmā'bhavadrājā balerjyeṣṭhasuto balī /
vīryavānbharataśreṣṭha sa ca bāhusahasravān //

tatastepe tapastīvraṃ satvena manasā nṛpa /
rudramārādhayāmāsa sa ca bāṇaḥ samā bahu //

tasmai bahuvarā dattāḥ śaṅkareṇa mahātmanā /
tāṃśca labdhvā varānbāṇo durlabhānasurairbhuvi //

sa śoṇitapure rājyaṃ cakārāpratimo balī /
trāsitāśca surāḥ sarve tena bāṇena pāṇḍava //

vijitya vibudhānsendrānbāṇaḥ saṃvatsarānbahūn /
aśāsata mahadrājyaṃ kubera iva bhārata //

tato rājannuṣā nāma bāṇasya duhitā yathā /
yenopāyena kaunteya aniruddho mahādyutiḥ //

prādyumnistāmuṣāṃ prāpya pracchannaḥ pramumoda ha /
atha bāṇo mahātejāstadā tatra yudhiṣṭhira //

taṃ gṛhyanilayaṃ jñātvā prādyumniṃ sutayā tadā /
gṛhītvā kārayāmāsa vastuṃ kārāgṛhe balāt //

sa kumāraḥ sukhārho'tha tadā duḥkhasamanvitaḥ /
bāmena ghātito rājannaniruddho mumoha ca //

etasminneva kāle tu nārado munipuṅgavaḥ /
dvārakāṃ prāpya kaunteya kṛṣṇaṃ dṛṣṭvā vaco'bravīt //

kṛṣṇa kṛṣṇa mahābāho yadūnāṃ kīrtivardhana /
pautraste bādhyamāno'tra bāṇenāmitatejasā //

kṛcchraṃ prāpto'niruddho vai śete kārāgṛhe sadā /
etaduktvā surarṣirvai bāṇasyātha puraṃ yayau //

nāradasya vacaḥ śrutvā tato rājañjanārdanaḥ /
jāhūya baladevaṃ hi pradyumnaṃ ca mahādyutim //

āruroha garutmantaṃ tābhyāṃ saha janārdanaḥ /
tataḥ suparṇamāruhya jayāya bharatarṣabha //

jagmuḥ krudhā mahāvīryā bāṇasya nagaraṃ prati /
athāsādya mahārāja tatpuraṃ dadṛśuśca te //

tāmraprākārasaṅguptāṃ hemaprāsādasaṅkulām /
dṛṣṭvā mudā yutāḥ sarve vismayaṃ paramaṃ yayuḥ //

tathā bāṇapurasyāsandvārasthā devatāḥ sadā /
maheśvaro guhaścaiva bhadrakālī vināyakaḥ //

atha kṛṣṇo balājjitvā dvārapālānyudhiṣṭhira /
susaṅkruddho mahātejāḥ śaṅkhacakragadāsibhṛt //

āsasādottaradvāraṃ śaṅkareṇābhirakṣitam /
tatra tasthau mahātejāḥ śūlapāṇirmaheśvaraḥ //

pinākaṃ saśaraṃ gṛhya bāṇasya hitakāmyayā /
jñātvā tamāgataṃ kṛṣṇaṃ vyāditāsyamivāntakam //

tatastau cakraturyuddhaṃ vāsudevamaheśvarau /
tadyuddhamabhavadghoramacintyaṃ romaharṣaṇam //

anyonyaṃ tau tatakṣāte anyonyajayakāṅkṣiṇau /
divyānyastrāṇi tau devau kruddhau mumucatustadā //

tataḥ kṛṣṇo raṇaṃ kṛtvā muhūrtaṃ śūlapāṇinā / vijitya taṃ mahādevaṃ tato yuddhe śūlapāṇinā /
anyāṃśca jitvā dvārasthānpraviveśa purottamam //

praviśya bāṇamāsādya sa tatrātha janārdanaḥ / cakre yuddhaṃ mahākruddhastena bāṇena bharatarṣabha /

bāṇo'pi sarvaśastrāṇi śitāni bharatarṣabha /
susaṅkruddhastadā yuddhe pātayāmāsa keśave //

punarudyamya śastrāṇi sahasraṃ sarvabāhubhiḥ /
mumoca bāṇaḥ saṅkruddhaḥ kṛṣṇaṃ prati raṇājire //

tataḥ kṛṣṇastadā kṛttvā tāni sarvāṇi bhārata /
kṛttvā muhūrtaṃ bāṇena yuddhaṃ rājannagokṣajaḥ //

cakramudyamya roṣādvai divyaṃ śastrottamaṃ tataḥ /
sahasrabāhūṃściccheda bāṇasyāmitatejasaḥ //

tato bāṇo mahārāja kṛṣṇena bhṛśapīḍitaḥ /
bhinnabāhuḥ papātāśu viśākha iva pādapaḥ //

sa pātayitvā bāṇaistaṃ bāṇaṃ kṛṣṇastvarānvitaḥ /
prādyumniṃ mocayāmāsa kṣipraṃ rājagṛhāttadā //

mokṣayitvā'tha govindaḥ prādyumniṃ saha bhāryayā /
bāṇasya sarvaratnāni asaṅkhyāni jahāra saḥ //

godhanāni ca sarvasvaṃ sa bāṇasyālaye balāt /
jahāra ca hṛṣīkeśo yadūnāṃ kulavardhanaḥ //

tataḥ sa sarvaratnāni cāhṛtya madhusūdanaḥ /
kṣipramāropayāñcakre sarvasvaṃ garuḍopari //

tvarayā'tha sa kaunteya baladevaṃ mahābalam /
prādumniṃ ca mahāvīryamaniruddhaṃ mahādyutim //

uṣāṃ ca sundarīṃ rājanbhṛtyadāragaṇaiḥ saha /
sarvānetānsamāropya garuḍopari vīryavān //

mudā yukto mahātejāḥ pītāmbaradharo balī / divyābharamacitrāṅgaḥ śaṅkacakragadāsibhṛt / 2-60-38ca āruroha garutmantamudayaṃ bhāskaro yathā //