Mahabharata · Chapter 2.56

nihatya narakaṃ bhaumaṃ satyabhāmāsahāyavān /
sahito lokapālaiśca dadarśa narakālayam //

athāsya gṛhamāsādya nārakasya mahātmanaḥ / dadarśa dhanamakṣayyaṃ ratnāni vividhāni ca /

maṇimuktāpravālāni vaiḍūryavikṛtāni ca /
vistārālpāṃścārkamaṇīnvipulānsphāṭikānapi //

jāmbūnadamayānyeva śātakumbhamayāni ca /
pradīptajvalanābhāni śītaraśmiprabhāṇi ca //

hiraṇyavarṇaṃ ruciraṃ śvetamabhyantaraṃ gṛham /
tadakṣayyaṃ gṛhe dṛṣṭaṃ narakasya dhanaṃ bahu //

na hi rājñaḥ kuberasya tāvaddhanasamucchrayaḥ /
dṛṣṭapūrvaḥ purā sākṣānmahendrabhavaneṣvapi //

hate bhaume niśumbhe ca vāsavaḥ sagaṇo'bravīt /
dāśārhapatimāsīnamāhṛtya maṇikuṇḍale //

hemasūtrā mahākakṣyāstomarairvīryaśālinaḥ /
vimalāni patākāni vāsāṃsi vividhāni ca //

bhīmarūpāśca mātaṅgāḥ pravālavikṛtāḥ kuthāḥ /
te ca viṃśatisāhasrā dvāstāvatyaḥ kareṇavaḥ //

aṣṭau śatasahasrāṇi deśajāścottamā hayāḥ /
gobhiścāvikṛtairyāvatkāmāttava janārdana //

etatte prāpayiṣyāṇi vṛṣṇyāvāsamarindama /
vasu yatriṣu lokeṣu dharmeṇāvarjitaṃ tvayā //
bhīṣma uvāca /

devagandharvaratnāni daiteyāsurajāni ca /
yāni santi hiraṇyāni narakasya niveśane //

etattu garuḍe sarvaṃ kṣipramāropya vāsavaḥ /
dārśārhapatinā sārdhamupāyānmaṇiparvatam //

citragrathitameghābhaḥ prababhau maṇiparvataḥ /
hemacitravitānaiśca prāsādairupaśobhitaḥ //

harmyāṇi ca viśālāni maṇisopānavanti ca /
tatrasthā varavarṇinyo dadṛśurmadhusūdanam //

gandharvasuramukhyānāṃ priyā duhitarastadā /
triviṣṭapasame deśe tiṣṭhantamaparājitam //

parivavrurmahābāhumekaveṇīdharāḥ striyaḥ /
parvāḥ kāṣāyavāsinyaḥ sarvāśca niyatendriyāḥ //

vratasantāpajaḥ śoke nātra kaścidapīḍayat /
arajāṃsi ca vāsāṃsi bibhratyaḥ kauśikānyapi //

sametya yadusiṃhasya cakrurasyāñjaliṃ striyaḥ /
ūcuścainaṃ hṛṣīkeśaṃ sarvāstāḥ kamalekṣaṇāḥ //

nāradena samākhyātamasmākaṃ puruṣottama /
āgamiṣyati govindaḥ surakāryārthasiddhaye //

so'suraṃ narakaṃ hatvā niśumbhaṃ murameva ca /
bhaumaṃ ca saparīvāraṃ hayagrīvaṃ ca dānavam //

tathā pañcajanaṃ caiva prāpsyate dhanamakṣayam /
so'cireṇaiva kālena yuṣmanmoktā bhaviṣyati //

evamuktvāgamaddhīro devarṣirnāradastathā /
tvāṃ cintayānāḥ satataṃ tapo ghoramupāsmahe //

kāle'tīte mahābāhuṃ kadā drakṣyāma mādhavam / ityevaṃ hṛdi saṅkalpaṃ kṛtvā puruṣasattama /
tapaścarāma satataṃ rakṣyamāṇā hi dānavaiḥ //

tato'smatpriyakāmārthaṃ bhagavānmāruto'bravīt /
yathoktaṃ nāradenātha na cirāttadbhaviṣyati //
bhīṣṇa uvāca //

tāsāṃ paramanārīṇāmṛṣabhākṣaṃ puraḥ sthitam /
dadṛśurdevagandharvā gṛṣṭīnāmiva gopatim //

tasya candropamaṃ vaktramudīkṣya muditendriyāḥ / samprahṛṣṭā mahābāhumidaṃ vacanamabruvan /

satyavrata purā vāyuridamasmānihābravīt /
sarvabhūtahitajñaśca maharṣirapi nāradaḥ //

viṣṇurnārāyaṇo devaḥ śaṅkhacakragadāsibhṛt /
sa bhaumaṃ narakaṃ hatvā bhartā vo bhavitā dhruvam //

diṣṭyā tasyarṣimukhyasya nāradasya mahātmanaḥ /
vacanādeva satyaṃ no bhartā bhavitumarhasi //

yatpriyaṃ bata paśyāma śrutaṃ priyamarindama /
darśanena kṛtārthāḥ smo vayamasya mahātmanaḥ //

uvāca hi yaduśreṣṭhaḥ sarvāstā jātamanmathāḥ /
yathā brūta viśālākṣyastatsarvaṃ vo bhaviṣyati //

tatastā garuḍe sarvāḥ saratnadhanasañcayāḥ /
kṣipramāropayāñcakre bhagavāndevakīsutaḥ //

sapakṣigaṇamātaṅgaṃ savyālamṛgapannagam /
śākhāmṛgagaṇairjuṣṭaṃ saprastaraśilātalam //

nyaṅkubhiśca varāhaiśca rurubhiśca niṣevitam /
saprapātamahāsānuṃ vicitraśikhisaṅkulam //

sa mahendrānujaḥ śauriścakāra guruḍopari /
paśyatāṃ sarvabhūtānāmutpāṭya maṇiparvatam //

upendraṃ baladevaṃ ca vāsavaṃ ca mahābalam /
svapakṣabalavikṣepairmahādriśikharopamaḥ //

dikṣu sarvāsu saṃrāvaṃ sa cakre garuḍo vahan /
ārujanparvatāgrāṇi pādapāṃśca samutkṣipan //

sañjahāra mahābhrāṇi vaiśvānarapathaṃ gataḥ /
grahanakṣatratārāṇāṃ saptarṣīṇāṃ svatejasā //

prabhājālamatikramya cāśvinośca parantapa /
prāpya puṇyatamaṃ sthānaṃ devalokamarindamaḥ //

śakrasadma samāsādya cāvaruhya janārdanaḥ / so'bhivādyāditeḥ pādāvarcitaḥ sarvadaivataiḥ /
brahmadakṣapurogaiśca prajāpatibhireva ca //

aditeḥ kuṇḍale divye dadāvatha tadā vibhuḥ /
ratnāna ca parārghyāṇi rāmeṇa saha keśavaḥ //

pratigṛhya ca tatsarvamaditirvāsavānujam /
pūjayāmāsa dāśārhaṃ rāmaṃ ca vigatajvarā //

śacī mahendramahiṣī kṛṣṇasya mahiṣīṃ tadā /
satyabhāmāṃ tu saṅgṛhya adityai sā nyavedayat //

sā tasyāḥ satyabhāmāyāḥ kṛṣṇāpriyacikīrṣayā /
varaṃ prādāddevamātā satyāyai vigatajvarā //

jarāṃ na yāsyasi śubhe yāvatkṛṣṇo'sti bhūtale /
sarvagandhaguṇopetā bhaviṣyasi varānane //

visṛjya satyabhāmā vai paulomīṃ ca sumadhyamā /
śacyāpi samanujñātā yayau kṛṣṇaniveśanam //

sampūjyamānastridaśairmaharṣigaṇasevitaḥ /
dvārakāṃ prayayau kṛṣṇo devalokādarindamaḥ //

śīghrādetya mahābāhurdīrghamadhvānamacyutaḥ /
varghamānapuradvāramāsasāda surottamaḥ //