Mahabharata · Chapter 2.54

tatastau jagmatustatra guruṃ sāndīpiniṃ punaḥ /
guruśuśrūṣaṇāyuktau dharmajñau dharmacāriṇau //

vratamugraṃ mahātmānau vicarantāvavantiṣu /
ahorātraiścatuṣpaṣṭyā sāṅgānvedānavāpatuḥ //

lekhyaṃ ca gaṇitaṃ cobhau prāpnutāṃ yadunandanau /
gāndharvavedaṃ vaidyaṃ ca sakalaṃ samāvāpatuḥ //

hastiśikṣāmaśviśikṣāṃ dvādaśāhena cāpnutām /
tāvubhau jagmaturvīrau guruṃ sāndīpiniṃ punaḥ //

dhanurvedacikīrṣārthaṃ dharmajñau dharmacāriṇau /
tāviṣvāsavarācāryamabhigamya praṇamya ca //

tena vai satkṛtau rājaṃścarantau tāvavantiṣu /
pañcāśadbhirahorātrairdaśāṅgaṃ supratiṣṭhitam //

sarahasyaṃ dhanurvedaṃ sakalaṃ tāvavāpatuḥ /
dṛṣṭvā kṛtārtho viprendro gurvarthe tāvacodayat //

ayācatārthaṃ govindaṃ tadā sāndīpinirvibhum /
mama putraḥ samudre'smiṃstiminā cāpavāhitaḥ //

putramānaya bhadraṃ te bhakṣitaṃ timinā mama /
ārtāya gurave tatra pratiśuśrāva duṣkaram //

aśakyaṃ sarvabhūteṣu kartumanyena kenacit /
yaśca sāndīpineḥ putraṃ jahāra bharatarṣabha //

so'suraḥ samare tābhyāṃ samudre vinipātitaḥ /
tataḥ sāndīpineḥ putraḥ prasādādamitaujasaḥ //

dīrghakālaṃ kṛtaḥ pretaḥ punarāsīccharīravān /
tadaśakyamacintyaṃ ca dṛṣṭvā sumahadadbhutam //

sarveṣāmeva bhūtānāṃ vismayaḥ samajāyata /
āsanāni ca sarvāṇi gavāśvaṃ ca dhanādikam //

sarvaṃ tadupajahāte gurave rāmakeśavau /
gadāparighayuddhe ca sarvāstreṣu ca keśavaḥ //

paramāṃ mukhyatāṃ prāptaḥ sarvalokeṣu viśrutaḥ /
kaśca nārāyaṇādanyaḥ sarvaratnavibhūṣitam //

rathamādityasaṅkāśamātiṣṭheta śacīpateḥ /
kasya cāpratimo yantā vajrapāṇeḥ priyaḥ sakhā //

mātaliḥ saṅgṛhītā syādanyatra puruṣottamāt /
bhojarājātmajo vāpi kaṃsastāta yudhiṣṭhira //

astrajāte bale vīrye kārtavīryasamo'bhavat /
tasya bhojapateḥ putrādbhojarājanyavardhanāt //

udvijante sma rājānaḥ suparṇādiva pannagāḥ /
citrakārmukanistriṃśavimalaprāsayodhinaḥ //

śataṃ śatasahasrāṇi pādātāstasya bhārata /
aṣṭau śatasahasrāṇi śūrāṇāmanivartinām //

abhavanbhojarājasya jāmbūnadamayā dhvajāḥ /
rukmakāñcanakakṣyāstu rathāstasya yudhiṣṭhi //

abhavanbhojaputrasya dvipāstāvaddhi tadbalam /
citrakārmukanistriṃśavimalaprāsayodhinām //

ṣoḍaśāśvasahasrāṇi kiṃśukābhāni tasya vai /
aparastu mahāvyūhaḥ kiśoraṇāṃ yudhiṣṭhira //

ārohavarasampanno durdharṣaḥ kenacidbalān /
sa ca ṣoḍaśasāhasraḥ kaṃsabhrātṛpuraḥ saraḥ //

sunāmā sarvatastvenaṃ sa kaṃsaṃ paryapālayat /
sagaṇo miśrako nāma ṣaṣṭimasāhasra ucyate //

kaṃsaroṣamahāvegāṃ vaivasvatavaśānugām //
mattadvipamahāgrāhāṃ vaivasvatavaśānugām //

śasrajālamahāphenāṃ sādivegamahājalām /
gadāparighapāṭhīnāṃ nānākavacaśaivalām //

rathanāgamahāvartāṃ nānārudhirakardamām /
citrakārmukakallolāṃ rathāśvakalilahradām //

mahāmṛdhanadīṃ ghorāṃ yodhāvartananisvanām /
ko'nyo nārāyaṇādetya kaṃsahantā yudhiṣṭhira //

eṣa śakrarathe tiṣṭhaṃstānyanīkāni bhārata /
vyadhamadbhojaputrasya mahābhrāṇīva mārutaḥ //

taṃ sabhāsthaṃ sahāmātyaṃ hatvā kaṃsaṃ sahānvayam /
ānayāmāsa mānārhāṃ devakīṃ samuhṛdgaṇām //

yaśodāṃ rohiṇīṃ caiva abhivādya punaḥ punaḥ /
ugrasenaṃ ca rājānamabhiṣicya janārdanaḥ //

arcito yadumukhyaiśca bhagavānvāsavānujaḥ / tataḥ pārthivamāyāntaṃ sahitaṃ sarvarājabhiḥ /
sarasvatyāṃ jarāsandhamajayatpuruṣottamaḥ //