Mahabharata · Chapter 2.44

avyakto vyaktaliṅgastho ya eva bhagavānprabhuḥ /
naranārāyaṇo bhūtvā harirāsīdyudhiṣṭhira //

brahmā ca śakraḥ sūryaśca dharmaścaiva sanātanaḥ / bahuśaḥ sarvabhūtātmā prādurbhavati kāryataḥ /
prādurbhāvāṃstu vakṣyāmi divyāndevagaṇairyutān /

suptvā yugasahasraṃ sa prādurbhavati kāryavān /
anekabahusāhasrairdevadevo jagatpatiḥ //

brahmāṇaṃ kapilaṃ caiva parameṣṭhiṃ tathaiva ca /
devānsaptarṣibhiścaiva śaṅkaraṃ ca mahāyaśāḥ //

sanatkumāraṃ bhagavānmanuṃ caiva prajāpatim /
purā cakre ca devādiḥ pradīptāgnisamaprabhaḥ //

yena cārṇavamadhyasthau naṣṭesthāvarajaṅgame /
naṣṭadevāsuravare pranaṣṭoragarākṣase //

yoddhukāmau sudurdharṣau bhrātarau madhukaiṭhabhau /
hatau bhagavatā tena tato dattvā varaṃ param //

bhūmiṃ baddhvā kṛtau pūrvāvajeyau dvau mahā'surau /
tau karṇamalasambhūtau viṣṇostasya mahātmanaḥ //

mahārṇave prasvapataḥ śailarājasamau sthitau /
tau viveśa svayaṃ vāyurbrahmaṇā sādhu coditaḥ //

tau divaṃ chādayitvā tu vavṛdhāte mahā'surau /
vāyupramāṇau tau dṛṣṭvā brahmā paryamṛśacchanaiḥ //

ekaṃ mṛdutaraṃ vetti kaṭhinaṃ vetti cāparam /
nāmanī tu tayoścake savitā salilodbhavaḥ //

mṛdustvayaṃ madhurnāma kaṭhinaḥ kaiṭhabhaḥ svayam /
tau daityau kṛtanāmānau ceraturbalagarvitau //

tau purā'tha divaṃ sarvāṃ prāptau rājanmahāsurau /
pracchādyātha divaṃ sarvāṃ ceraturmadhukaiṭhabhau //

sarvamekārṇavaṃ lokaṃ yoddhukāmau sunirbhayau /
tau gatāvasurau dṛṣṭvā brahmā lokapitāmahaḥ //

ekārṇavāmbunicaye tatraivāntaradhīyata /
sa padmātpadmanābhasya nābhideśātsamutthitāt //

āsasāda svayaṃ janma tatpaṅkajamapaṅkajam /
pūjayāmāsa vasatiṃ brahmā lokapitāmahaḥ //

tāvubhau jalagarbhasthau nārāyaṇacaturmukhau /
bahūnvarṣāyutānapsu śayānau na ca kampitau //

atha dīrghasya kālasya tāvubhau madhukaiṭhabhau /
ājagmatustau taṃ deśaṃ yatra brahmā vyavasthitaḥ //

tau dṛṣṭvā lokanāthastu roṣātsaṃraktalocanaḥ /
utpapātātha śayanātpadmanābho mahādyutiḥ //

tadyuddhamabhavadghoraṃ tayostasya ca bhārata /
ekārṇave tadā ghore trailokye jalatāṃ gate //

tadabhūttumulaṃ yuddhaṃ varṣasaṅkhyāsahasraśaḥ /
na ca tāvasurau yuddhe tadā śramamavāpatuḥ //

atha dīrghasya kālasya tau daityau yuddhadurmadau /
ūcatuḥ prītamanasau devaṃ nārāyaṇaṃ prabhum //

prītau svastava yuddhena ślāghyastvaṃ mṛtyurāvayoḥ /
āvāṃ jahi na yatrorvā salilena piraplutā //

hatau ca tava putratvaṃ prāpnuyāva surottama /
yo hyānāṃ yudhi nirjetā tasyāvāṃ vihitau sutau //

tayostu vacanaṃ śrutvā tadā nārāyaṇaḥ prabhuḥ /
tau prahasya mṛdhe daityau dorbhyāṃ ca samapīḍayam //

ūrubhyāṃ nidhanaṃ cakre tāvubhau madhukaiṭhabau /
tau hatau cāplutau toye vapurbhyāmekatāṃ gatau //

medo mumucaturdaityau majjamānau jalormibhiḥ /
medasā tajjalaṃ vyāptaṃ tābhyāmantardadhe tadā //

nārāyaṇaśca bhagavānasṛjadvividhāḥ prajāḥ /
daityayormedasā channā sarvā rājanvasundharā //

tadāprabhṛti kaunteya medinīti smṛtā mahī /
prabhāvātpadmanābhasya śāśvatī ca kṛtā nṛṇām //