Mahabharata · Chapter 2.45

prādurbhāvasahasrāṇi samatītānyanekaśaḥ /
yathāśakti tu vakṣyāmi śṛṇu tānkurunandana //

purā kamalanābhasya svapataḥ sāgarāmbhasi /
puṣkare yatra sambhūtā devā ṛṣigaṇaiḥ saha //

eṣa pauṣkariko nāma prādurbhāvaḥ prakīrtitaḥ /
purāṇaiḥ kathyate yatra vedaśrutisamāhitaḥ //

vārāhastu śrutisukhaḥ prādurbhāvo mahātmanaḥ /
yatra viṣṇuḥ suraśreṣṭho vārāhaṃ rūpamāsthitaḥ //

ujjahāra mahīṃ toyātsaśailavanakānanām /
vedapādo yūpadaṃṣṭraḥ kraturdantaścitīmukhaḥ //

agnijihvo darbharomā brahmaśīrṣo mahātapāḥ /
ahorātrekṣaṇo divyo vedāṅgaḥ śrutibhūṣaṇaḥ //

ājyanāsaḥ sruvaṃ tuṇḍaṃ sāmaghoṣasvano mahān /
dharmasatyamayaḥ śrīmānkarmavikramasatkṛtaḥ //

prāyaścittamukho dhīraḥ paśujānurmahāvṛṣaḥ /
audgātrahomaliṅgo'sau paśubījamahauṣadhiḥ //

bāhyantarātmā mantrāsthivikṛtaḥ saumyadarśanaḥ /
vediskandho havirgandho havyakavyābhivegavān //

prāgvaṃśakāyo dyutimānnānādīkṣābhirūrjitaḥ /
dakṣiṇāhṛdayo yogī mahāśāstramayo mahān //

upākarmoṣṭharucakaḥ prāvargyāvartabhūṣaṇaḥ /
śālāpatnīsahāyo vai maṇiśṛṅgasamucchritaḥ //

evaṃ yajñavarāho vai bhūtvā viṣṇuḥ sanātanaḥ /
mahīṃ sāgaraparyantāṃ saśailavanakānanām //

ekārṇavajale bhraṣṭāmekārṇavagataḥ prabhuḥ /
majjantīṃ salile tasminsvadevīṃ pṛthivīṃ tadā //

ujjahāra viṣāṇena mārgaṇḍeyasya paśyataḥ /
śṛṅgeṇa yaḥ samuddhṛtya lokānāṃ hitakāmyayā //

sahasraśīrṣo deveśo nirmame jagatīṃ prabhuḥ /
evaṃ yajñavarāheṇa bhūtabhavyabhātmanā //

uddhṛtā pṛthivī devī pūjyā vai sāgarāmbarā /
nihatā dānavāḥ sarve devadevena viṣṇunā //

vārāhaḥ kathito hyeṣa nārasiṃhamato śṛṇu /
yatra bhūtvā mṛgendreṇa hiraṇyakaśipurhataḥ //