Mahabharata · Chapter 2.40

nāyamarhati vārṣṇeyastiṣṭhatsviha mahātmasu /
mahīpatiṣu kauravya rājavatpārthivārhaṇam //

nāyaṃ yuktaḥ samācāraḥ pāṇḍaveṣu mahātmasu /
yatkāmāddevakīputraṃ pāṇḍavārcitavānasi //

bālā yūyaṃ na jānīdhvaṃ dharmaḥ sūkṣmo hi pāṇḍavāḥ /
ayaṃ tatrābhyatikrānto hyāpageyo'lpadarśanaḥ //

tvādṛśo dharmayukto hi kurvāṇaḥ priyakāmyayā /
bhavatyabhyadhikaṃ bhīṣmo lokeṣvavamataḥ satām //

kathaṃ hyarājā dāśārho madhye sarvamahīkṣitām /
arhaṇāmarhati tathā yathā yuṣmābhirarcitaḥ //

athavā manyase kṛṣṇaṃ sthaviraṃ kurupuṅgavaḥ /
vasudeve sthite vṛddhe kathamarhati tatsutaḥ //

athavā vāsudevo'pi priyakāmo'nuvṛttavān /
drupade tiṣṭhati kathaṃ mādhavo'rhati pūjanam //

ācāryaṃ manyase kṛṣṇamathavā kurunandana /
droṇe tiṣṭhati vārṣṇeyaṃ kasmādarcitavānasi //

ṛtvijaṃ manyase kṛṣṇamathavā kurunandana /
dvaupāyane sthite vṛddhe kathaṃ kṛṣṇo'rcitastvayā //

bhīṣme śāntanave rājansthite puruṣasattame /
svacchandamṛtyuke rājankathaṃ kṛṣṇo'rcitastvayā //

aśvatthāmni sthite vīre sarvaśāstraviśārade /
kathaṃ kṛṣṇastvayā rājannarcitaḥ kurunandana //

duryodhane ca rājendre sthite puruṣasattame /
kṛpe ca bhāratācārye kathaṃ kṛṣṇastvayā'rcitaḥ //

drumaṃ kampuruṣācāryamatikramya tathā'rcitaḥ /
bhīṣmake caiva durdharṣe pāṇḍuvatkṛtalakṣaṇe //

nṛpe ca rukmiṇi śreṣṭhe ekalavye tathaiva ca /
śalye madrādhipe caiva kathaṃ kṛṣṇastvayārcitaḥ //

ayaṃ ca sarvarājñāṃ vai balaślāghī mahābalaḥ /
jāmadagnyasya dayitaḥ śiṣyo viprasya bhārata //

yenātmabalamāśritya rājāno yudhi nirjitāḥ /
taṃ ca karṇamatikramya kathaṃ kṛṣṇastvayārcitaḥ //

naivartviṅnaiva cācāryo na rājā madhusūdanaḥ /
arcitaśca kuruśreṣṭha kimanyatpriyakāmyayā //

athavā'bhyarcanīyo'yaṃ yuṣmākaṃ madhusūdanaḥ /
kiṃ rājabhirihānītairavamānāya bhārata //

vayaṃ tu na bhayādasya kaunteyasya mahātmanaḥ /
prayacchāmaḥ karānsarve na lobhānna ca sāntvanāt //

asya dharmapravṛttasya pārthivatvaṃ cikīrṣataḥ /
karānasmai prayacchāmaḥ so'yamasmānna manyate //

kimanyadavamanānāddhe yadenaṃ rājasaṃsadi /
aprāptalakṣaṇaṃ kṛṣṇamarghyeṇārcitavānasi //

akasmāddharmaputrasya dharmātmeti yaśo gatam /
ko hi dharmacyute pūjāmevaṃ yuktāṃ niyojayet //

yoyaṃ vṛṣṇikule jāto rājānaṃ hatavānpurā /
jarāsandhaṃ mahātmānamanyāyena durātmavān //

adya dharmātmatā caiva vyapakṛṣṭā yudhiṣṭhirāt /
darśitaṃ kṛpaṇatvaṃ ca kṛṣṇe'rghyasya nivedanāt //

yadi bhītāśca kaunteyāḥ kṛpaṇāśca tapasvinaḥ /
nanu tvayā'pi boddhavyaṃ yāṃ pūjāṃ mādhavārhasi //

athavā kṛpaṇairetāmupanītāṃ janārdana /
pūjāmanarhaḥ kasmāttvamabhyanujñātavānasi //

ayuktāmātmanaḥ pūjāṃ tvaṃ punarbahumanyase /
haviṣaḥ prāpya niṣyandaṃ prāśitā śveva nirjane //

na tvaṃ pārthivendrāṇāmapamānaḥ prayujyate /
tvāmeva kuravo vyaktaṃ pralambhante janārdana //

klībe dārakriyā yādṛgandhe vā rūpadarśanam /
arājño rājavatpūjā tathā te madhusūdana //

dṛṣṭo yudhiṣṭhiro rājā dṛṣṭo bhīṣmaśca yādṛśaḥ /
vāsudevo'pyayaṃ dṛṣṭaḥ sarvametadyathātatham //

ityuktvā śiśupālastānutthāya paramāsanāt /
niryayau sadasastasmātsahito rājabhistadā //