Mahabharata · Chapter 2.37

tata āmantritā rājanrājānaḥ satkṛtāstadā /
purebhyaḥ prayayustebhyo vimānebhya ivāmarāḥ //

te vai digbhyaḥ samāpetuḥ pārthivāstatra bhārata /
samādāya mahārhāṇi ratnāni vividhāni ca //

tacchrutvā dharmarājasya yajñe yajñavidastadā /
rājānaḥ śataśastuṣṭairmanobhirmanurṣabha //

bahu vittaṃ samādāya vividhaṃ pārthivā yayuḥ /
draṣṭukāmāḥ sabhāṃ caiva dharmarājaṃ ca pāṇḍavam //

sa gatvā hāstinapuraṃ nakulaḥ samitiñjayaḥ /
bhīṣmamāmantrayāñcakre dhṛtarāṣṭraṃ ca pāṇḍavaḥ //

prayataḥ prāñjalirbhūtvā bhāratānānayattadā /
dhṛtarāṣṭraṃ ca bhīṣmaṃ ca viduraṃ ca mahāmatim //

duryodhanamukhāṃścaiva bhrātṝnsarvānathānayat //

satkṛtyāmantritāḥ sarve hyācāryapramukhāstataḥ /
prayayuḥ prītamanaso yajñaṃ brahmapurassarāḥ //

dhṛtarāṣṭraśca bhīṣmaśca vidurasca mahāmatiḥ / duryodhanapurogāśca bhrātaraḥ sarva eva te /
gāndhārarājaḥ subalaḥ śakuniśca mahābalaḥ //

acalo vṛṣakaścaiva karṇaśca rathināṃ varaḥ /
tathā śalyaśca balavānbāhlikaśca mahābalaḥ //

somadatto'tha kauravyo bhūrirbhūriśravāḥ śalaḥ /
aśvatthāmā kṛpo droṇaḥ saindhavaśca jayadrathaḥ //

yajñasenaḥ saputraśca sālvaśca vasudhādhipaḥ /
prāgjyotiṣaśca nṛpatirbhagadatto mahārathaḥ //

sa tu sarvaiḥ saha mlecchaiḥ sāgarānūpavāsibhiḥ /
pārvatīyāśca rājāno rājā caiva bṛhadbalaḥ //

pauṇḍrako vāsudevaśca vaṅgaḥ kāliṅgakastathā /
ākarṣāḥ kuntalāścaiva gālavāścāndhrakāstathā //

drāviḍāḥ siṃhalāścaiva rājā kāśmīrakastathā /
kuntibhojo mahātejāḥ pārthivo gauravāhanaḥ //

bāhlikāścāpare śūrā rājānaḥ sarva eva te /
virāṭaḥ saha putrābhyāṃ māvellaśca mahābalaḥ //

rājāno rājaputrāśca nānājanapadeśvarāḥ /
śiśupālo mahāvīryaḥ saha putreṇa bhārata //

āgacchatpāṇḍaveyasya yajñaṃ samaradurmadaḥ /
rāmaścaivāniruddhaśca kaṅkaśca sahasāraṇaḥ //

gadapradyumnasāmbāśca cārudeṣṇaśca vīryavān /
ulmuko niśaṭhaścaiva vīraścāṅgāvahastathā //

vṛṣṇayo nikhilāścānye samājagmurmahārathāḥ /
ete cānye ca bahavo rājāno madhyadeśajāḥ //

ājagmuḥ pāṇḍuputrasya rājasūyaṃ mahākratum /
dadusteṣāmāvasathāndharmarājasya śāsanāt //

bahubhakṣyānvitānrājandīrghikāvṛkṣaśobhitān /
tathā dharmātmajaḥ pūjāṃ cakre teṣāṃ mahātmanām //

satkṛtāśca yathoddiṣṭāñjagmurāvasathānnṛpāḥ /
kailāsaśikharaprakhyānmanojñāndravyabhūṣitān //

sarvataḥ saṃvṛtānuccaiḥ prākāraiḥ sukṛtaiḥ sitaiḥ /
suvarṇajālasaṃvītānmaṇikuṭṭimabhūṣitān //

sukhārohaṇasopānānmahāsanaparicchadān /
snagdāmasamavacchannānuttamāgurugandhinaḥ //

haṃsenduvarṇasadṛśānāyojanasudarśanān /
asambādhānsamadvārānyutānuccāvacairguṇaiḥ //

bahudhātunibaddhāṅgānhimavacchikharāniva /
viśrāntāste tato'paśyanbhūmipā bhūridakṣiṇam //

vṛtaṃ sadasyairbahubhirdharmarājaṃ yudhiṣṭhiram / tatsadaḥ pārthivaiḥ kīrṇaṃ brāhmaṇaiśca maharṣibhiḥ /
bhrājate sma tadā rājannākapṛṣṭhaṃ yathā'maraiḥ //