Mahabharata · Chapter 2.38

pitāmahaṃ guruṃ caiva pratyudgamya yudhiṣṭhiraḥ /
abhivādya tato rājannidaṃ vacanamabravīt //

bhīṣmaṃ droṇaṃ kṛpaṃ drauṇiṃ duryodhanaviviṃśatī /
asminyajñe bhavanto māmanugṛhṇantu sarvaśaḥ //

idaṃ vaḥ sumahaccaiva yadihāsti dhanaṃ mama /
praṇayantu bhavanto māṃ yatheṣṭamabhimantritaḥ //

evamuktvā sa tānsarvāndīkṣitaḥ pāṇḍavāgrajaḥ /
yuyoja sa yathāyogamadhikāreṣvanantaram //

paṅktyāropaṇakārye ca ucchiṣṭāpanaye punaḥ /
bhojanāvekṣaṇe caiva yuyutsuṃ samayojayat //

bhakṣyabhojyādhikāreṣu duḥśāsanamayojayat / parigrahe brāhmaṇānāmaśvatthāmānamuktavān /

rājñāṃ tu pratipūjārthaṃ sañjayaṃ nyayojayat /
kṛtākṛtaparijñāne bhīṣṇadroṇau mahāmatī //

hiraṇyasya suvarṇasya ratnānāṃ cānvavekṣaṇe /
dakṣiṇānāṃ ca vai dāne kṛpaṃ rājā nyayojayat //

tathā'nyānpuruṣavyāghrāṃstasmiṃstasminnyayojayat / bāhliko dhṛtarāṣṭraśca somadatto jayadrathaḥ /
nakulena samānītāḥ svāmivattatra remire //

kṣattā vyayakarastvāsīdviduraḥ sarvadharmavit /
duryodhanastvarhaṇāni pratijagrāha sarvaśaḥ //

kuntī sādhvī ca gāndhārī strīṇāṃ kurvanti cārcanam // anyāḥ sarvāḥ snuṣāstāsāṃ sandeśaṃ yāntu māciram /
tiṣṭhetkṛṣṇāntike soyamarjunaḥ kāryasiddhaye //

caraṇakṣālane kṛṣṇo brāhmaṇānāṃ svayaṃ hyabhūt /
sarvalokasamāvṛttaḥ piprīṣuḥ phalamuttamam //

draṣṭukāmaḥ sabhāṃ caiva dharmarājaṃ yadhiṣṭhiram /
na kaścidāharattatra sahasrāvaramarhaṇam //

ratnaiśca bahubhistatra dharmarājamavardhayat /
kathaṃ tu mama kauravyo ratnadānaiḥ samāpnuyāt //

yajñamityeva rājānaḥ spardhamānā dadurdhanam /
bhavanaiḥ savimānāgraiḥ sodarkairbalasaṃvṛtaiḥ //

lokarājavimānaiśca brāhmaṇāvasathaiḥ saha /
kṛtairāvasathairdivyairvimānapratimaistathā //

vicitrai ratvavadbhiśca ṛddhyā paramayā yutaiḥ / rājabhiśca samāvṛttairatīva śrīsamṛddhibhiḥ /
aśobhata sado rājankaunteyasya mahātmanaḥ //

ṛddhyā tu varuṇaṃ devaṃ spardhamāno yudhiṣṭhiraḥ /
ṣaḍagninātha yajñena so'yajaddakṣiṇāvatā //

sarvāñjanānsarvakāmaiḥ samṛddhaiḥ samatarpayat / annavānbahubhakṣyaśca bhuktavajjanasaṃvṛtaḥ /
ratnopahārasampanno babhūva sa samāgamaḥ //

iḍājyahomāhutibhirmantraśikṣāviśāradaiḥ /
tasminhi tatṛpurdevāstate yajñe maharṣibhiḥ //

yathā devāstathā viprā dakṣiṇānnamahādhanaiḥ /
tatṛpuḥ sarvavarṇāśca tasminyajñe mudā'nvitāḥ //