Mahabharata · Chapter 2.36

rakṣaṇāddharmarājasya satyasya paripālanāt /
śatrūṇāṃ kṣapaṇāccaiva svakarmaniratāḥ prajāḥ //

balīnāṃ samyagādānāddharmataścānuśāsanāt /
nikāmavarṣī parjanyaḥ sphīto janapado'bhavat //

sarvārambhāḥ supravṛttā gorakṣā karṣaṇaṃ vaṇik /
viśeṣātsarvamevaitatsañjajñe rājakarmaṇaḥ //

dasyubhyo vañcakebhyo vā rājanprati parasparam /
rājavallabhataścaiva nāśrūyanta mṛṣāgiraḥ //

avarṣaṃ cātivarṣaṃ ca vyādhipāvakamūrchanam /
sarvametattadā nāsīddharmanitye yudhiṣṭhire //

priyaṃ kartumupasthātuṃ balikarma svabhāvajam /
abhihartuṃ nṛpā jagmurnānyaiḥ kāryaiḥ kathañcanaḥ //

dharmairdhanāgamaistasya vavadhe nicayo mahān /
kartuṃ yasya na śakyena kṣayo varṣaśatairapi //

svakoṣṭhasya parīmāṇaṃ kośasya ca mahīpatiḥ /
vijñāya rājā kaunteyo yajñāyaiva mano dadhe //

suhṛdaścaiva ye sarve pṛthakca sahacābruvan /
yajñakālastava vibho kriyatāmatra sāmpratam //

athaivaṃ bruvatāmeva teṣāmabhyāyayau hariḥ /
ṛṣiḥ purāṇo vedātmā dṛśyaścaiva vijānatām //

jagatastasthuṣāṃ śreṣṭhaḥ prabhavaścāpyayaśca ha /
bhūtabhavyabhavannāthaḥ keśavaḥ keśisūdanaḥ //

prākāraḥ sarvavṛṣṇīnāmāpatsvabhayado'rihā /
balādhikāre nikṣipya samyagānakadundubhim //

uccāvacamupādāya dharmarājāya mādhavaḥ /
dhanaughaṃ puruṣavyāghro balena mahatā vṛtaḥ //

taṃ dhanaughamaparyantaṃ ratnasāgaramakṣayam /
nādayanrathaghoṣeṇa praviśeśa purottamam //

pūrṇamāpūrayaṃsteṣāṃ dviṣacchokāvaho'bhavat / asūryamiva sūryeṇa nivātamiva vāyunā /
kṛṣṇena samupetena jahṛṣe bhārataṃ puram //

taṃ mudā'bhisamāgamya satkṛtya ca yathāvidhi /
sa pṛṣṭvā kuśalaṃ caiva sukhāsīnaṃ yudhiṣṭhiraḥ //

dhaumyadvaipāyanamukhairṛtvigbhiḥ puruṣarṣabhaḥ /
bhīmārjunayamaiścaiva sahitaḥ kṛṣṇamabravīt //
yudhiṣṭhira uvāca //

tvatkṛte pṛthivī sarvā madvaśe kṛṣṇa vartate /
dhanaṃ ca bahu vārṣṇeya tvatprasādādupārjitam //

so'hamicchāmi tatsarvaṃ vidhivaddevakīsuta /
upayoktuṃ dvijāgryebhyo havyavāhe ca mādhava //

tadahaṃ yaṣṭumicchāmi dāśārha sahitastvayā /
anujaiśca mahābāho tanmā'nujñātumarhasi //

taddīkṣāpaya govinda tvamātmānaṃ mahābhuja /
tvayīṣṭavati dāśārha vipāpmā bhavitā hyaham //

māṃ vāpyabhyanujānīha sahaibhiranujairvibho /
anujñātastvayā kṛṣṇa prāpnuyāṃ kratumuttamam //
vaiśampāyana uvāca /

taṃ kṛṣṇaḥsa pratyuvācedaṃ bahūktvā guṇavistaram / tvameva rājaśārdūla ramrāḍarho mahākratum /
samprāpnuhi tvayā prāpte kṛtakṛtyāstato vayam //

yadasvābhīpsitaṃ yajñaṃ mayi śreyasyavasthite /
niyuṅkṣva tvaṃ ca māṃ kṛtye sarvaṃ kartāsmi te vacaḥ //
yudhiṣṭhira uvāca /

saphalaḥ kṛṣṇa saṅkalpaḥ siddhiśca niyatā mama /
yasyame tvaṃ hṛṣīkeśa yathepsitamupasthitaḥ //
vaiśampāyana uvāca /

anujñātastu kṛṣṇena pāṇḍavo bhrātṛbhiḥ saha /
ījituṃ rājasūyena sādhanānyupacakrame //

tatastvājñāpayāmāsa pāṇḍavo'rinibarhaṇaḥ /
sahadevaṃ yudhāṃ śreṣṭhaṃ mantriṇaścaiva sarvaśaḥ //

asminkratau yathoktāni yajñāṅgāni dvjātibhiḥ /
yathopakaraṇaṃ sarvaṃ maṅgalāni ca sarvaśaḥ //

adhiyajñāṃśca sambhārāndaumyoktānkṣiprameva hi /
samānayantu puruṣā yathāyogaṃ yathākramam //

indraseno viśokaśca pūraścārjunasārathiḥ /
annādyāharaṇe yuktāḥ santu matpriyakāmyayā //

sarvakāmāśca kāryantāṃ rasagandhasamanvitāḥ /
manorathaprītikarā dvijānāṃ kurusattama //
vaiśampāyana uvāca //

tadvākyasamakālaṃ ca kṛtaṃ sarvaṃ nyavedayat /
sahadevo yudhāṃ śreṣṭho dharmarājo yudhiṣṭhire //

tato dvaipāyano rājannṛtvijaḥ samupānayat /
vedāniva mahābhāgānsākṣānmūrtimato dvijān //

svayaṃ brahmatvamakarottasya satyavatīsutaḥ /
dhanañjayānāmṛṣabhaḥ susāmā sāmago'bhavat //

yājñavalkyo babhūvātha brahmiṣṭho'dhvaryusattamaḥ /
pailo hotā vasoḥ putro dhaumyena sahito'bhavat //

eteṣāṃ putravargāśca śiṣyāśca bharatarṣabha /
babhūvurhotragāḥ sarve vedavedāṅgapāragāḥ //

te vācayitvā puṇyāhamūhayitvā ca taṃ vidhim /
śāstroktaṃ pūjayāmāsustaddevayajanaṃ mahat //

tatra cakruranujñātāḥ śaraṇānyuta śilpinaḥ /
gandhavanti viśālāni veśmānīva divaukasām //

tata ājñāpayāmāsa sa rājā rājasattamaḥ /
sahadevaṃ tadā sadyo mantriṇaṃ puruṣarṣabhaḥ //

āmantraṇārthaṃ dūtāṃstvaṃ preṣayasvāśugāndrutam /
upaśrutya vaco rājñaḥ sa dūtānprāhiṇottadā //

āmantrayadhvaṃ rāṣṭreṣu brāhmaṇānbhūmipānatha /
vināśca mānyāñśūdrāṃśca sarvānānayateti ca //
vaiśampāyana uvāca //

te sarvānpṛthivīpālānpāṇḍaveyasya śāsanāt /
āmantrayāmbabhūvuste preṣayāmāsa cāparān //

dūtāśca vāhanairjagbhū rāṣṭrāṇi subahūnyapi /
tato yudhiṣṭhiro rājā preṣayāmāsa pāṇḍavam //

nakulaṃ hāstinapuraṃ bhīṣmāya bharatarṣabha / droṇāya dhṛtarāṣṭrāya vidurāya kṛpāya ca /
bhrātṛṇāṃ caiva sarveṇāṃ ye'nuraktā yudhiṣṭhire //

tataste tu yathākālaṃ kuntīputraṃ yudhiṣṭhiram /
dīkṣayāñcakrire viprā rājasūyāya bhārata //

jyeṣṭhāmūle amāvāsyāṃ mṛgājinasamāvṛtaḥ /
rauravājinasaṃvīto navanītāktadehavān //

dīkṣitaḥ sa tu dharmātmā dharmarājo yudhiṣṭhiraḥ /
jagāma yajñāyatanaṃ vṛto vipraiḥ sahasraśaḥ //

bhātṛbhirjñātibhiścaiva suhṛdbhiḥ sacivaiḥ saha /
kṣatriyaiśca manuṣyendrairnānādeśasamāgataiḥ //

amātyaiśca naraśreṣṭho dharmo vigrahavāniva /
ājagmurbrāhmaṇāstatra viṣayebhyastatastataḥ //

sarvavidyāsu niṣṇātā vedavedāṅgapāragāḥ /
teṣāmāvasathāṃścakrurdharmarājasya śāsanāt //

bahvannācchādanairyuktānsagaṇānāṃ pṛthak pṛthak /
sarvartuguṇasampannāñśilpino'tha sahasraśaḥ //

teṣu te nyavasanrājanbrāhmaṇā nṛpasatkṛtāḥ /
kathayantaḥ kathā bahvīḥ paśyanto naṭanartakān //

bhuñjatāṃ caiva viprāṇāṃ vadatāṃ ca mahāsvanaḥ /
aniśaṃ śrūyate tatra muditānāṃ mahātmanām //

dīyatāṃ dīyatāmeṣāṃ bhujyatāṃ bhujyatāmiti /
evamprakārāḥ sañjalpāḥ śrūyantesmātra nityaśaḥ //

gavāṃ śatasahasrāṇi śayanānāṃ ca bhārata /
rukmasya yoṣitāṃ caiva dharmarājaḥ pṛthak dadau //

prāvartataiva yajñaḥ sa pāṇḍavasya mahātmanaḥ /
pṛthivyāmekavīrasya śakrasyeva triviṣṭape //